Luka 23

Akɛ Yesu tee Pilato hiɛ

(Mateo 27.1-2, 11-14; Marko 15.1-5; Yohane 18.28-38)

1Ni amɛsafo muu lɛ fɛɛ te shi, ni amɛkpala Yesu kɛtee Pilato ŋɔɔ. 2#Luk 20.25 Ni amɛbɔ̃i enaa folɔmɔ amɛkɛɛ, “Wɔna nuu nɛɛ ni eewo wɔmaŋ lɛ yiŋ ni eegu oniatsumɔ kɛ Kaisare hamɔ, ni ekɛɔ akɛ lɛ ji Kristo, maŋtsɛ lɛ.” 3Ni Pilato bi lɛ akɛ, “Ani bo ji Yudafoi lɛ amaŋtsɛ lɛ?” Ni eto he ehã lɛ akɛ, “Okɛɛ.” 4Ni Pilato kɛɛ osɔfonukpai lɛ kɛ asafoi lɛ akɛ, “Minaaa fɔbuu sane ko yɛ nuu nɛɛ he.” 5Shi amɛka nɔ, ni amɛkɛɛ “Ewoɔ maŋ lɛŋ hirihiri kɛ enii ni etsɔ̃ɔ yɛ Yudea fɛɛ, ni ebɔi kɛjɛ Galilea kɛbashi biɛ nɛɛ.”

Yesu yɛ Herode hiɛ

6Shi be ni Pilato nu Galilea gbɛi lɛ, ebi akɛ nuu lɛ Galileanyo lo? 7#Luk 3.1 Ni be ni ena ele akɛ ejɛ Herode nɔyelihe lɛ, ehã akɛ lɛ tee Herode, mɔ hu ni eba Yerusalɛm yɛ nakai gbii lɛ amli lɛ ŋɔɔ. 8#Luk 9.9 Shi be ni Herode na Yesu lɛ, ena miishɛɛ babaoo, ejaakɛ jeeŋmɔ beebe ejɛ etaoɔ lɛ ena, ejaakɛ enu ehe saji pii, ni ehiɛ kã nɔ akɛ eeefee okadi ko ni ena. 9Ni ebibii lɛ saji pii; shi ehãaa lɛ ekomeflo hetoo. 10Ni osɔfonukpai lɛ kɛ mlatsɔɔlɔi lɛ badamɔ shi ni amɛfolɔ enaa naakpa. 11Ni be ni Herode kɛ esraafoi lɛ ebɔ lɛ ahora ni amɛye ehe fɛo ni amɛwo lɛ atade kaŋkaŋ lɛ, ehã akɛ lɛ tee Pilato ŋɔɔ ekoŋŋ. 12Shi nakai gbi lɛ nɔ nɔŋŋ Pilato kɛ Herode bɔ naanyo, shikulɛ sa lɛ amɛkɛ amɛhe yeee.

Abu Yesu gbele fɔ

(Mateo 27.15-26; Marko 15.6-15; Yohane 18.19—19.16)

13Ni Pilato tsɛ osɔfonukpai lɛ kɛ onukpai lɛ kɛ maŋ lɛ kɛkpe, 14ni ekɛɛ amɛ akɛ, “Nyɛkɛ nɛkɛ nuu nɛɛ bahã mi akɛ eewo maŋ lɛ yiŋ; ni naa, mitao esane lɛ mli yɛ nyɛhiɛ nɛɛ, minaaa fɔbuu sane ko yɛ ehe yɛ saji ni nyɛkɛbafolɔ enaa lɛ ekoeko mli. 15Ni Herode hu enaaa eko, ejaakɛ ekpale lɛ kɛbahã wɔ; ni naa, efeko nɔ ko ni sa gbele. 16No hewɔ lɛ, mibayi lɛ ni maŋmɛɛ ehe.” 17[Shi ehia akɛ gbijurɔ lɛ nɔ lɛ eŋmɛɛ mɔ kome he ehã amɛ.]

18Shi amɛ fɛɛ amɛbolɔ shi kome amɛkɛɛ, “Okɛ mɔ nɛ aya, ni oŋmɛɛ Baraba he ohã wɔ!” 19(Baraba nɛɛ ji nuu ko ni atua ko ni atse yɛ maŋ lɛŋ kɛ awui ko ni aye hewɔ lɛ awo lɛ tsuŋ.) 20Shi akɛni Pilato miitao akɛ eŋmɛɛ Yesu he hewɔ lɛ, ekɛ amɛ wie ekoŋŋ. 21Shi amɛbolɔ akɛ, “Sɛŋmɔ lɛ! Sɛŋmɔ lɛ” 22Ni ekɛɛ amɛ nɔ ni ji shi etɛ̃ akɛ, “Shi mɔ nɛ lɛ, mɛɛ efɔŋ efee? Minako nɔ ko ni sa gbele yɛ ehe, no hewɔ lɛ, mibayi lɛ ni maŋmɛɛ ehe.” 23Shi amɛka nɔ kɛ gbee ni wa ni amɛmiitao akɛ asɛŋ lɛ; ni amɛgbei kɛ osɔfonukpai lɛ anɔ lɛ ye nɔ. 24Kɛkɛ ni Pilato gbe sane lɛ naa akɛ afee bɔ ni amɛtaoɔ lɛ; 25ni eŋmɛɛ mɔ ni atuatsemɔ kɛ awuyeli hewɔ ni awo lɛ tsuŋ ni amɛtaoɔ lɛ lɛ he; shi Yesu lɛ, ekɛ lɛ hã yɛ amɛtaomɔ lɛ naa.

Yesu sɛŋmɔ kɛ egbele

(Mateo 27.32-56; Marko 15.21-41; Yohane 19.17-30)

26 # Mat 27.32; Mar 15.21 Ni be ni amɛkpala lɛ kɛyaa lɛ amɛmɔ Simon Kirenenyo ko ni jɛ kosɛɛ baa lɛ, ni amɛwo Yesu sɛŋmɔtso lɛ amɛtere lɛ ni ekɛnyiɛ esɛɛ.

27Ni maŋ lɛ mli bii pii kɛ yei hu ni yeɔ ŋkɔmɔ ni amɛfoɔ yɛ ehewɔ lɛ nyiɛ esɛɛ. 28Shi Yesu tsɔ̃ ehe ehã amɛ ni ekɛɛ, “Yerusalɛm biyei, nyɛkafoa yɛ mihewɔ; shi moŋ nyɛfoa yɛ nyɛ diɛŋtsɛ kɛ nyɛbii ahewɔ. 29#Luk 21.23 Ejaakɛ naa, gbii miiba no mli ni amɛaakɛɛ, ‘Ajɔɔ kenei kɛ musui ni fɔko dã kɛ fufɔi ni ayeko dã!’ 30#Hos 10.8; Kpoj 6.16; 9.6 No mli lɛ amɛaabɔ̃i gɔji lɛ akɛɛmɔ akɛ, ‘Nyɛbagbea wɔnɔ!’ Kɛ gɔ̃ŋkpɔi lɛ hu akɛ, ‘Nyɛbahaa wɔnɔ!’ 31#1 Pet 4.17 Ejaakɛ kɛ tso ŋmɔŋ afeɔ enɛ lɛ, tso gbiŋ lɛ, te aaafee lɛ tɛŋŋ?” 32Ni akpala mɛi krokomɛi enyɔ hu ni ji efɔŋfeelɔi afata ehe kɛtee ni ayagbe amɛ.

33Ni be ni amɛshɛ he ni atsɛɔ jɛi akɛ Yitsoŋoŋo lɛ, amɛsɛŋ lɛ kɛ efɔŋfeelɔi lɛ yɛ jɛi, mɔ kome ye ninejurɔgbɛ ni mɔ kome hu ye abɛkugbɛ. 34#Mat 5.44; Yes 53.12; Lal 22.18 Shi Yesu kɛɛ, “Ataa, kɛfa amɛ; shi amɛleee nɔ ni amɛfeɔ lɛ.” Ni amɛfɔ̃ oshiki amɛkɛja etadei lɛ. 35#Lal 22.7 Ni maŋbii lɛ damɔ shi amɛmiikwɛ. Ni maŋ onukpai lɛ hu ye lɛ ahi amɛkɛɛ, “Ehereɔ mɛi krokomɛi ayiwala; kɛ lɛ ji Kristo mɔ ni Nyɔŋmɔ ehala lɛ, ehere lɛ diɛŋtsɛ eyiwala!” 36#Lal 69.21 Ni asraafoi lɛ hu ye ehe fɛo, ni amɛba eŋɔɔ ni amɛbahã lɛ ashiŋ, 37ni amɛkɛɛ, “Kɛ bo ji Yudafoi lɛ amaŋtsɛ lɛ, heremɔ bo diɛŋtsɛ oyiwala!” 38Shi aŋma ŋmalɛ ko hu yɛ eyiteŋ akɛ, “YUDAFOI LƐ AMAŊTSƐ LƐ NƐ!” 39Ni efɔŋfeelɔi ni asɛŋ lɛ ateŋ mɔ kome wie musubɔɔ wiemɔ eshi lɛ ekɛɛ, “Jeee bo ji Kristo lɛ? Jiemɔ bo diɛŋtsɛ ohe kɛ wɔ hu!” 40Shi mɔ kome lɛ here nɔ ni ekã ehiɛ ekɛɛ, “Ani bo hu ni oyɔɔ fɔbuu kome lɛ nɔŋŋ mli nɛɛ osheee Nyɔŋmɔ gbeyei? 41Ni wɔnɔ lɛ sa wɔ, ejaakɛ wɔnifeemɔnii ahe nyɔmɔwoo wɔna nɛɛ; shi mɔ nɛ lɛ efeko nɔ ko ni esaaa.” 42#Mat 16.28 Ni ekɛɛ Yesu akɛ, “Nuŋtsɔ, kaimɔ mi be ni oooba yɛ omaŋtsɛyeli lɛ mli lɛ!” 43Ni Yesu kɛɛ lɛ akɛ, “Miikɛɛ bo anɔkwale mli akɛ, ‘Ŋmɛnɛ okɛ mi aaahi Paradeiso!’ ”

44Agbɛnɛ aaafee shwane ŋmɛlɛ nyɔŋma kɛ enyɔ mli lɛ, duŋ wo yɛ shikpɔŋ lɛ nɔ fɛɛ kɛyashi gbɛkɛ ŋmɛji etɛ̃ mli; 45#Ɛks 36.35 ni hulu wo duŋ, ni Sɔlemɔtsu lɛ mli muhɔɔ lɛ mli gba kɛyi shi yɛ teŋ tuuŋtu. 46#Lal 31.5; Bɔf 7.59 Ni Yesu bo kɛ gbee ni wa ekɛɛ, “Ataa, odɛ̃ŋ mituɔ mimumɔ miwoɔ nɛɛ!” Ni be ni ekɛɛ nɛkɛ lɛ ebu enaa. 47Shi be ni asraafoiohaiatsɛ lɛ na nɔ ni efee lɛ, ewo Nyɔŋmɔ hiɛ nyam ni ekɛɛ, “Yɛŋ lɛɛlɛŋ akɛ nɛkɛ nuu nɛɛ jalɔŋ!” 48Be ni mɛi fɛɛ ni ebabua amɛhe naa ni amɛkwɛɔ nii nɛɛ na nibii ni ba lɛ, amɛshimɔ amɛtsitsi ni amɛku amɛsɛɛ amɛtee shĩa. 49#Luk 8.2, 3 Shi mɛi ni le lɛ fɛɛ kɛ yei ni nyiɛ esɛɛ kɛjɛ Galilea lɛ hu damɔ sɛɛ flɛŋŋ amɛmiikwɛ nii nɛɛ.

Yesu fuu

(Mateo 27.57-61; Marko 15.42-47; Yohane 19.38-42)

50Ni naa, nuu ko yɛ ni atsɛɔ lɛ Yosef, ni ji akwaashɔŋnyo; eji gbɔmɔ kpakpa kɛ jalɔ. 51#Luk 2.25, 38 Ni ejɛ Arimatia, Yudafoi lɛ amaji lɛ eko nɔ, lɛ lɛ ekpɛlɛ̃ɛɛ amɛyiŋtoo kɛ amɛnifeemɔnii lɛ nɔ, ni eekwɛ Nyɔŋmɔ maŋtsɛyeli lɛ gbɛ; 52lɛ eyiŋ etee Pilato ŋɔɔ ni eyakpa lɛ fai ni eŋɔ Yesu gbonyo lɛ ehã lɛ. 53Ni ejie lɛ kɛkpeleke shi, ni eŋɔ klala ebala ehe, ni eyato lɛ yɛ gbonyobu ni akpɛ yɛ tɛsaa mli ni atoko mɔ ko yɛ mli dã lɛ mli. 54Ni nakai gbi lɛ Hesaamɔkɛtoo gbi ni, ni Hejɔɔmɔ gbi lɛ miishɛ. 55#Luk 23.49 Ni yei lɛ ni kɛ Yesu jɛ Galilea ba lɛ nyiɛ sɛɛ, amɛbakwɛ toohe lɛ kɛ bɔ ni ato egbonyo lɛ ahã. 56#Ɛks 20.10 Ni amɛku amɛsɛɛ, ni amɛyasaa tsofaikɛŋmai; ni hejɔɔmɔ gbi lɛ nɔ lɛ amɛfee kpoo yɛ kitã lɛ naa.

Currently Selected:

Luka 23: NEGAB

Highlight

Copy