Luka 22

Atee Yesu yinɔ apam ni agbe lɛ

(Mateo 26.1-5, 14-16; Marko 14.1-2, 10, 11; Yohane 11.45-53)

1 # Ɛks 12.1-27 Agbɛnɛ Akpiti Gbijurɔ ni atsɛɔ lɛ Hehoo lɛ miishɛ. 2#Luk 20.19 Ni osɔfonukpai lɛ kɛ mlatsɔɔlɔi lɛ tao bɔ ni amɛaafee ni amɛgbe lɛ; shi amɛmiishe maŋ lɛ gbeyei.

3 # Yoh 13.2, 27 Shi Satan yabote Yuda mɔ ni atsɛɔ lɛ Iskariot ni ji mɛi nyɔŋma kɛ enyɔ lɛ ateŋ mɔ kome lɛ mli. 4Ni eyiŋ etee ni ekɛ osɔfonukpai lɛ kɛ asafoiatsɛmɛi lɛ yawie, bɔ ni eeefee ni ejie lɛ ehã amɛ. 5Ni amɛnya, ni amɛwo lɛ shi akɛ amɛaahã lɛ shika, 6ni ekpɛlɛ̃; ni etao be ni sa ni ekɛaajie lɛ ehã amɛ ni mɛi bɛ jɛi.

Yesu to gbɛjianɔ hã Hehoo lɛ yeli

(Mateo 26.17-25; Marko 14.12-21; Yohane 13.21-30)

7 # Ɛks 12.18-20 Agbɛnɛ Akpiti Gbijurɔ ni sa akɛ agbeɔ Hehoo toobi lɛ yɛ nɔ lɛ bashɛ; 8ni etsu Petro kɛ Yohane ni ekɛɛ, “Nyɛyaa ni nyɛyasaa Hehoo niyenii lɛ nyɛtoa wɔ, koni wɔbaye.” 9Ni amɛbi lɛ akɛ, “Nɛgbɛ osumɔɔ akɛ wɔyasaa wɔto yɛ?” 10Ni ekɛɛ amɛ akɛ, “Kɛji nyɛbote maŋ lɛ mli lɛ, naa, nuu ko kɛ nyɛ aaakpe ni ehiɛ nu kɛ kpulu; nyɛnyiɛa esɛɛ kɛyaa shĩa he ni eeeyabote lɛ, 11ni nyɛyakɛa shĩatsɛ lɛ akɛ, ‘Tsɔɔlɔ lɛ kɛɛ wɔbakɛɛ bo akɛ, Nɛgbɛ gbɔiatoohe lɛ ni mi kɛ mikaselɔi lɛ baaye Hehoo niyenii lɛ yɛ mli lɛ yɔɔ?’ 12Ni eeetsɔ̃ɔ nyɛ ŋwɛiasa kpele ko ni awula mli; nyɛsaa Hehoo niyenii lɛ nyɛtoa yɛ jɛi.” 13#Luk 19.32 Ni amɛyiŋ amɛtee ni amɛyana tamɔ bɔ ni ekɛɛ amɛ lɛ, ni amɛsaa Hehoo niyenii lɛ amɛto.

Nuŋtsɔ niyenii lɛ shishitoo

(Mateo 26.26-30; Marko 14.22-26; 1 Korintobii 11.23-25)

14Ni be ni ŋmɛlɛtswaa lɛ shɛ lɛ, eho eta niyenii lɛ ahe, ni bɔfoi lɛ fata ehe. 15Ni ekɛɛ amɛ akɛ, “Taomɔ pam mitaoɔ akɛ mikɛ nyɛ aye nɛkɛ Hehoo nɛɛ dani mana amanehulu lɛ; 16#Luk 13.29 ejaakɛ miikɛɛ nyɛ akɛ miyeŋ eko dɔŋŋ kɛyashi beyinɔ ni nɔ ni etsɔ̃ɔ lɛ aaaba mli yɛ Nyɔŋmɔ maŋtsɛyeli lɛ mli.” 17Ni ewo kpulu lɛ, ni eda shi, ni ekɛɛ, “Nyɛhea ni nyɛjaa; 18ejaakɛ miikɛɛ nyɛ akɛ minuŋ waintso yibii nɛɛ eko dɔŋŋ kɛyashi beyinɔ ni Nyɔŋmɔ maŋtsɛyeli lɛ aaaba.” 19#1 Kor 11.23, 24 Ni ekɔ aboloo, ni eda shi, ni ekumɔ mli, ni ekɛhã amɛ ni ekɛɛ, [“Enɛ ji migbɔmɔtso ni akɛhã yɛ nyɛhewɔ lɛ; nyɛfea enɛ ni nyɛkɛkaia mi.” 20#1 Kor 11.25; Yer 31.31-34 Nakai nɔŋŋ ewo kpulu lɛ hu yɛ niyenii lɛ asɛɛ, ni ekɛɛ, “Nɛkɛ kpulu nɛɛ ji kpãŋmɔ hee lɛ yɛ mila ni akɛshwie shi ahã nyɛ lɛ mli.]

21 # Yoh 13.21-22; Lal 41.9 “Shi naa, mɔ ni baatsɔ̃ɔ misɛɛgbɛ lɛ nine kɛ minine yɛ okplɔ̃ lɛ nɔ; 22ni Gbɔmɔ Bi lɛ miiya, tamɔ bɔ ni akpɛ mli ato lɛ moŋ; shi kpoo hã mɔ ni tsɔ̃ɔ esɛɛgbɛ lɛ!”

23Ni amɛbɔ̃i amɛhe bimɔ akɛ amɛteŋ namɔ po baafee enɛ!

Namɔ ji agbo fe fɛɛ?

24 # Luk 9.46 Shi naataamɔ hu bate shi yɛ amɛteŋ akɛ amɛteŋ namɔ sa akɛ abu lɛ agbo fe fɛɛ. 25Ni ekɛɛ amɛ akɛ, “Jeŋmaji lɛ anɔ maŋtsɛmɛi lɛ yeɔ amɛnɔ akɛ nuŋtsɔmɛi, ni mɛi ni yɔɔ amɛnɔ hewalɛ lɛ, atsɛɔ amɛ ejurɔfeelɔi. 26Shi nyɛ lɛ ebɛ nyɛ nakai; shi moŋ mɔ ni ji agbo yɛ nyɛteŋ lɛ, etsɔ tamɔ gbekɛ, ni mɔ ni ji onukpa hu tamɔ mɔ ni sɔmɔɔ. 27#Yoh 13.4-14 Ejaakɛ te mɔ ni fe mɔ hu, mɔ ni taa okplɔ̃ he lɛ, aloo mɔ ni sɔmɔɔ lɛ? Ani jeee mɔ ni taa okplɔ̃ he lɛ? Shi mi lɛ miyɛ nyɛteŋ akɛ mɔ ni sɔmɔɔ. 28Shi nyɛ ji mɛi ni kɛ mi ehi shi yɛ mikai lɛ amli. 29Ni mi hu miito maŋtsɛyeli mahã nyɛ tamɔ bɔ ni miTsɛ eto ehã mi lɛ, 30#Mat 19.28 koni nyɛye nii ni nyɛnu yɛ mikpɔlɔ̃ lɛ he yɛ mimaŋtsɛyeli lɛ mli; ni nyɛaatara sɛii anɔ ni nyɛkojo Israel akutsei nyɔŋma kɛ enyɔ lɛ.”

Yesu gba bɔ ni Petro baakwa lɛ eto

(Mateo 26.31-35; Marko 14.27-31; Yohane 13.36-38)

31 # 2 Kor 2.11 Shi Nuŋtsɔ lɛ kɛɛ, “Simon, Simon, naa, Satan ena hegbɛ, koni esha nyɛ mli tamɔ ŋmaa. 32#Yoh 17.11, 15, 20; Lal 51.13 Shi mi lɛ mikpa fai miha bo, koni ohemɔkɛyeli akatã; ni bo hu, kɛ okpale lɛ, wo onyɛmimɛi lɛ hewalɛ.” 33Shi ekɛɛ lɛ akɛ, “Nuŋtsɔ, misaa mihe mito ni kɛ tsuŋ po, gbele mli po, mikɛ bo aya.” 34Ekɛɛ, “Petro, miikɛɛ bo akɛ ŋmɛnɛ wuɔ naŋ agbɛɛ ni ootso shii etɛ̃ akɛ oleee mi.”

Fotro, kotoku kɛ klante

35 # Luk 9.3; 10.4 Ni ebi amɛ akɛ, “Be ni mitsu nyɛ ni nyɛhiɛɛɛ fotro kɛ kotoku kɛ tokotai lɛ, ani nɔ ko he hia nyɛ” Ni amɛkɛɛ, “Nɔ ko nɔ ko he ehiaaa wɔ.” 36Kɛkɛ lɛ ekɛɛ amɛ akɛ, “Shi agbɛnɛ lɛ, mɔ ni yɔɔ fotro lɛ, ekɔ, nakai nɔŋŋ mɔ ni yɔɔ kotoku hu akɔ; ni mɔ ni bɛ klante lɛ, ehɔ̃ɔ etade ni ekɛhe eko. 37#Yes 53.12 Ejaakɛ miikɛɛ nyɛ akɛ nɔ ni aŋma nɛɛ hu, ja eba mli yɛ mihe, akɛ, ‘Ni abu lɛ ashi mlatɔlɔi anɔ’; ejaakɛ nibii ni aŋmala yɛ mihe lɛ miiba mli.” 38Ni amɛkɛɛ, “Nuŋtsɔ, naa, klantei enyɔ nɛ.” Shi ekɛɛ amɛ akɛ, “Efa.”

Yesu yasɔle yɛ Mugɔŋ lɛ nɔ

(Mateo 26.36-46; Marko 14.32-42)

39 # Yoh 18.1 Ni eje kpo, ni tamɔ bɔ ni efɔɔ feemɔ lɛ eyiŋ kɛtee Mugɔŋ lɛ nɔ, ni ekaselɔi lɛ hu nyiɛ esɛɛ. 40Ni be ni eshɛ jɛi lɛ, ekɛɛ amɛ akɛ, “Nyɛsɔlea koni nyɛkabote kaa mli.” 41Ni egbala ehe shi kɛjɛ amɛŋɔɔ aaafee tɛfɔ̃ɔ jɛkɛmɔ, ni eho ekula shi, ni esɔle 42ekɛɛ, “Ataa, kɛji oosumɔ lɛ, jiemɔ kpulu nɛɛ kɛje minɔ! Shi kɛ̃lɛ jeee bɔ ni mi misumɔɔ, shi moŋ bɔ ni bo osumɔɔ.” [ 43#1 Maŋ 19.5 Ni bɔfo ko jɛ ŋwɛi bajie ehe kpo etsɔ̃ɔ lɛ, ni ebawo lɛ hewalɛ. 44Ni be ni ehe jaraa lɛ lɛ, ehã esɔlemɔ lɛ mli wa. Ni ehe latsaa tsɔ̃ tamɔ lákulibii ni tsereɔ shwieɔ shi.] 45Ni be ni esɔle egbe naa ni ete shi kɛba ekaselɔi lɛ aŋɔɔ lɛ, ebana amɛ akɛ amɛmiiwɔ ejaakɛ amɛwerɛ eho amɛhe; 46ni ekɛɛ amɛ akɛ, “Mɛɛba nyɛwɔɔ? Nyɛtea shi ni nyɛsɔlea, koni nyɛkabote kaa mli.”

Yesu sɛɛgbɛtsɔ̃ɔmɔ

(Mateo 26.47-56; Marko 14.43-50; Yohane 18.2-12)

47Be ni ewieɔ lolo lɛ, naa asafoku ko ni mɛi nyɔŋma kɛ enyɔ lɛ ateŋ mɔ kome ni atsɛɔ lɛ Yuda lɛ nyiɛ amɛhiɛ! Ni etsi ebɛŋkɛ Yesu, koni eshwɔ enaa. 48Shi Yesu kɛɛ lɛ akɛ, “Yuda, okɛ naashwɔmɔ miitsɔ̃ɔ Gbɔmɔ Bi lɛ sɛɛgbɛ?” 49Ni be ni mɛi ni kɛ lɛ yɔɔ lɛ na nɔ ni baaba lɛ, amɛbi lɛ akɛ, “Nuŋtsɔ, wɔbamɔ klante lo?” 50Ni amɛteŋ mɔ kome bã osɔfonukpa lɛ tsulɔ lɛ klante ni efo eninejurɔ toi. 51Ni Yesu kɛɛ, “Awa biɛ!” Ni eta etoi lɛ he ni etsa lɛ. 52Shi Yesu kɛɛ osɔfonukpai lɛ kɛ Sɔlemɔ we lɛ asafoiatsɛmɛi lɛ kɛ maŋ onukpai lɛ ni ba enɔ lɛ akɛ, “Mi minɔ nyɛje kpo kɛba kɛ klante kɛ kpotii tamɔ abaa awuyelɔ nɔ nɛɛ? 53Daa ni mikɛ nyɛ yɔɔ Sɔlemɔ we lɛ, nyɛtaaa mihe; shi nyɛŋmɛlɛtswaa lɛ kɛ duŋ hewalɛ lɛ nɛ!”

Petro kwa Yesu

(Mateo 26.57-58, 69-75; Marko 14.53-54, 66-72; Yohane 18.12-18, 25-27)

54Ni amɛmɔ lɛ ni amɛkpala lɛ kɛtee osɔfonukpa lɛ we lɛ. Shi Petro nyiɛ sɛɛ shɔŋŋ. 55Ni be ni amɛshɛre la yɛ mɔɔ teŋ lɛ mli ni amɛho amɛtara he lɛ, Petro hu ho yata amɛteŋ. 56Ni tsulɔ yoo fioo ko na lɛ ni eta la lɛ he, ni ekwɛ lɛ totooto ni ekɛɛ, “Nuu nɛɛ hu kɛ lɛ yɔɔ.” 57Shi etso ekɛɛ, “Awo, mileee lɛ!” 58No sɛɛ etsɛɛɛ lɛ, mɔ kroko hu na lɛ ni ekɛɛ, “Bo hu, amɛteŋ mɔ ko ji bo.” Shi Petro kɛɛ, “Ataa, jeee amɛteŋ mɔ ko ji mi!” 59No sɛɛ aaafee ŋmɛlɛtswaa kome lɛ mɔ kroko hu ma nɔ mi veveeve akɛ, “Asonɔkwa, nuu nɛɛ hu kɛ lɛ yɔɔ; ejaakɛ Galileanyo hu ni!” 60Shi Petro kɛɛ, “Ataa, mileee nɔ ni okɛɔ nɛɛ!” Ni amrɔ lɛ nɔŋŋ, be ni ekã he ewieɔ lolo lɛ, wuɔ gbɛɛ. 61#Luk 22.34 Ni Nuŋtsɔ lɛ tsɔ̃ ehe, ni ekwɛ Petro; ni Petro kai Nuŋtsɔ lɛ wiemɔ lɛ ni ekɛɛ lɛ akɛ, “Ŋmɛnɛ wuɔ naŋ agbɛɛ ni oookpa yɛ misɛɛ shii etɛ̃”, lɛ. 62Ni Petro je kpo ni eyafo kɛ dɔlɛ.

Aye Yesu he fɛo ni ayi lɛ

(Mateo 26.67-68; Marko 14.65)

63Shi hii ni hiɛ Yesu lɛ ye ehe fɛo ni amɛyi lɛ. 64Ni amɛha ehiɛ ni amɛbibii lɛ akɛ, “Gbaa, namɔ ji mɔ ni gba bo ma lɛ?” 65Ni amɛwie nibii krokomɛi pii amɛkɛbɔ musu amɛshi lɛ.

Yesu yɛ Akwaashɔŋ lɛ hiɛ

(Mateo 26.59-66; Marko 14.55-64; Yohane 18.19-24)

66 # Yoh 18.24 Ni be ni je tsɛre lɛ, maŋ onukpai lɛ kɛ osɔfonukpai lɛ kɛ mlatsɔɔlɔi lɛ anaa bakpe shi, ni amɛkpala lɛ kɛtee amɛkwaashɔŋ lɛ hiɛ, 67ni amɛkɛɛ, “Kɛji bo ji Kristo lɛ, kɛɛmɔ wɔ.” Ni ekɛɛ amɛ akɛ, “Kɛji mikɛɛ nyɛ lɛ nyɛheŋ nyɛyeŋ; 68ni kɛ sane ko mibi hu, nyɛhaŋ mi hetoo. 69Shi kɛjɛ be nɛɛ nɔ kɛyaa nɛɛ Gbɔmɔ Bi lɛ aaata Nyɔŋmɔ hewalɛ lɛ ninejurɔ nɔ.” 70Kɛkɛ lɛ amɛ fɛɛ amɛkɛɛ, “Belɛ bo ji Nyɔŋmɔ Bi lɛ? Ni ekɛɛ amɛ akɛ, ‘Nyɛkɛɛ, ejaakɛ mi ni.’ ” 71Kɛkɛ ni amɛkɛɛ, “Mɛni wɔsaa wɔtaoɔ odase wɔfee dɔŋŋ? Ejaakɛ wɔ diɛŋtsɛ wɔnu yɛ enaa.”

Currently Selected:

Luka 22: NEGAB

Highlight

Copy