Saint Matthieu 16

1Da pharisienli da sadducéenli mi guè mona Jésus, da oui nè baï léna nè, an kème to̱ko̱ fèn to̱ko̱naké an nonkala hi kli. 2Da kème féré sa, ka sa hi kli: Da ko̱ bèlaléou mi lé tou oui sa: Guèl ma na wanwang, baï ko̱ nonkala ba sènakè. 3Da ka guèlapélé oui sa: Mbame nding baï to̱na, baï ko̱ nonkala ba sènakè da na doukoum. Oui tou sik nona nonkala, da oui tane ga ma baï touna sik fèn to̱ko̱na namli ya. 4Béké mèran njou‐maïnli mi nza ba fèn to̱ko̱nakè, da hina fèn to̱ko̱nakè hana mbéo hi kli tane tiya, wara fèn to̱ko̱nakè a Jonas ya.

Da kème yèng kli ka ourou.

5Da njou‐séna bongli mi kan héla lèkè da kli yangnaran baï bina tarou guè jing kli. 6Da Jésus mi sa hi kli: Oui pèng mone baï ka ngou vounafèn a pharisienli da sadducéenli. 7Da kli kèrè ka bo̱ko̱ go̱ro̱ kli jing hana, ka sa: Na tane ga bi tarou ya. 8Da Jésus mi toutou baï on, kè sa hi kli: Oui jing tounassaon gounfènakè, baïfèn da ouime kèrè ka bo̱ko̱ go̱ro̱ baï jing hana on, ba baï ko̱ ouime tane ti jing tarou ya lé? 9Oui tane ga tou nguite ya, da oui tane kèrè falkè ya, ka tarou dioui a njoukouli ténakè‐bongkè‐dioui da karo ro̱ko̱ ane ko̱ oui fan garakè rou lé? 10Maléba tarou difala‐séré da njoukouli ténakè bongkè‐nèng da karo ro̱ko̱ ane ko̱ oui fan lé? 11Baïfèn da oui tane ga tou ya ko̱ mè tane ga sa baï toul tarou hi oui ya lé? Da oui ngou vounafèn a pharisienli da sadducéenli. 12Da on, kli tou nguite tou, ko̱ kè wara kli tane ti ba vounafèn a mapa ya, da ba to̱ko̱na fèn a pharisienli da sadducéenli.

13Da on, ko̱ Jésus gui guèl Césarée guèl Philippe, kè oui njou‐séna bong nèli, ka sa: Njoukouli sa mè ba guè, mè Goune a njoukou lé? 14Da kli sa: Hanali sa mo ba Jean‐Baptiste; afékéli sa, Élie, kène afékéli sa Jérémie, maléba mbéo an wora prophèteli. 15Kè sa hi kli: Da abaï, oui sa ba mè ba guè lé? 16Da Simon Pièrre mi féré sa, ka sa: Mo ba Christ, Goune a Ouone ko̱ yan. 17Da Jésus mi féré sa, ka sa hi nè: Jangnandaï ba baï amo, Simon, goune a Jonas; baï ko̱ ti ba naïn‐mone da séme ya, ko̱ to̱ko̱ fèn on hi mo, da ba Baba ni, ko̱ kaou an nonkala. 18Da mè sa hi mo kéng, mo ba Pièrre (kone) da yé mè ma za église ni bi toul loukou kone aïn da njaka mboro an guèl kaouna a houlkèli tane ma baï gnèran nè ya. 19Yé mè ma hi clélé a bilkaou a nonkala hi mo: da fènli on ko̱ mome gna an koukoula, yé ma gna an nonkala, da fènli on ko̱ mome sél an koukoula, yé ma sél an nonkala. 20Da afal kème gna bi njaka njou‐séna bongli an klime sa hi njoukouna mbéo ya ko̱ kè ba Christ.

21Da ka name o̱kèo̱, Jésus mi tissaon baï to̱ko̱na hi njou‐séna bong nèli, on ba baï nè baï séna guè pou Jérusalem da tangchidoli da loukou sacrificateurli tèn njou‐to̱ko̱na bong guingnali ma to̱ko̱ssé hi nè, ka i nè, da name an saïkè kè ma tome an houl. 22Da Pierre mi ya nè da tissaon baï tona nè, ka sa: Nanjou! fèn aïn mi sé dita jing mo, fèn aïn ma gui mono ya. 23Da Jésus ki monè, ka sa hi Pierre: Mo sé kaïn, ni Satan! Mo ba fèn bèna ni; baï ko̱ kèrafèn no mi tane ti toul fènli a Ouone ya, da ba toula fènli a njoukouli.

24Da on, Jésus mi sa hi njou‐séna bong nèli: Tokoré njoukouna mi ji guina fali, dadaon an kème njomo monè fènè, da bi di‐croix nè, ka gui fali. 25Baï ko̱ njoukouna ko̱ mi ji kouna yana nè, yé kè bo̱l yana nè, da njoukouna ko̱ mi bo̱l yana nè baï touli, yé kè jing yana nè. 26Da yé njoukouna mi jing ba fèn ko̱ tokoré kème jing bilkaou koukoula bon, da laou‐è mi bo̱l lé? maléba yé njoukouna ma hi ba fèn baï komona laou‐è rou lé? 27Baï ko̱ Goune a njoukou ma gui an bil jonafèn a Baba nè, jing ange nèli; da ka name o̱kèo̱ yé kè ma hi toul ndo̱ko̱ hi njoukouli mbéo mbéo bon, mane pina nèli. 28Babaï, mi mè sa hi oui, an wora kli on ko̱ mi o guèl aïn hanali ba houl tane tiya bo̱l tèn klime ko̱ Goune a njoukou mi yé guina an bilkaou nè.

Currently Selected:

Saint Matthieu 16: KBN1947

Highlight

Copy