Saint Matthieu 15
15
1Da on, njou‐to̱ko̱na bong guingnali da pharisienli an pou Jérusalem guè mona Jésus, ka sa: 2Baïfèn da njou‐séna bong noli mi moungnourou tang baï a tangchidoli lé? Baï ko̱ klime tane ga tourou ndo̱ko̱ kli ya ko̱ klime yé sona laka. 3Da kème féré sa, ka sa hi kli: Oui kéng baïfèn da oui moungnourou bina baïnjaka guingna a Ouone, baï pèngna tang baï abaï lé? 4Baï Ouone sa: Mo dik baba no da ma no; da: Kè ko̱ poukou baba nè maléba ma nè, dadaon ma an kème hou. 5Da oui sa: Yé kè on ko̱ sa hi baba nè maléba ma nè: Bèlafèn ni on ko̱ mi lé mbèlo̱, mè hi Ouone tou. 6Mono kè tane ga dik baba nè maléba ma nè ya. Da oui aïli bina baïnjaka guingna Ouone baï pèngna tang baï abaï. 7Oui njou‐mongnafènli, Ésaïe mi to̱ko̱ bong njaka Ouone bèlta toul baï jinguèl, ka sa:
8Njoukou aïnli mi dik mi ka ba njaka kli,
Da go̱ro̱ kli mi na dita jing mi.
9Da klime hiou mi bo̱on,
Ka to̱ko̱ to̱ko̱nafèn akli ka ba bina baïnjaka a njoukouli.
10Da kè di ro̱kè njoukouli guè monè, ka sa hi kli: Oui la, da oui tou nguite. 11Fèn ko̱ mi ri haou, mi tane ga nding njoukou tèn ba dakame ya; da ba fèn on ko̱ mi tèn gui kala an haou mi ko̱ nding njoukou tèn ba dakame.
12Da on, njou‐séna bongli mi gui, ka sa hi nè: Mo tane ga tou ya ko̱ on mi tèn jing pharisienli ba fèn bèna, ko̱ klime la baïnjaka on. 13Da kème féré sa, ka sa: Gora fènli bon ko̱ Baba ni an nonkala mi tane goro ya, yé kè lourou. 14Oui yèng kli, baï ko̱ kli ba njou‐foukoura nondi, ko̱ ko̱ko̱ ba nè njou‐foukoura nondi. Da tokoré njou‐foukoura none mi ko̱ko̱ ba nè njou‐foukoura none, kli séré bon ma lé lo̱ko̱.
15Da Pièrre mi féré sa, ka sa hi nè: To̱ko̱ hi na saon a ébèlbaï on. 16Da kè sa: Oui kéng, oui kaou bo̱on, tane tounakè nguite lé? 17Oui tane ga tou, fèn ko̱ ri haou, ta sé bila njoukou, da afal da, sé kon pa ya lé? 18Da fèn on ko̱ mi tèn gui kala an haou a njoukou tèn ka bo̱ko̱ go̱rè, da fèn on mi nding njoukou tèn ba dakame. 19Baï ko̱ fèn on ko̱ mi tèn kala a bil go̱ra njoukouli ba béké kèrafèn, da ina njoukou, da ndingna maïn tèn ba ndingna rome, da riya, da bongbaï wo̱ko̱, da kèkènafèn. 20Fèn on ba fèn ko̱ mi nding njoukou tèn ba dakame; da sona laka tane toura ndo̱ko̱ tane ga nding njoukou tèn ba dakame ya.
21Da Jésus ourou an ndourou ka sé guè koukoula Tyre tèn Sidon. 22Da mono, waïn Cananéenne mi ourou an koukoula an ndourou, ka gui, da wan njaka, ka sa: Nanjou mo Goune a David, mo nding haïo hi mi! Zabolo mi to̱ko̱ssé hi goune waïn ni nyèta. 23Da kè tane féré sa baïnjaka hi nè ya. Da njou‐séna bong nèli mi gui ka sa jo̱jo̱ nè, ka sa: Mo pi nè sé fal, baï ko̱ kème wan njaka an bong na. 24Da kème féré sa, ka sa: Mè gui baï a badouali ko̱ mi bo̱l an voula Israël, ka ho̱kè. 25Da waïn mi gui ka houkou mbèlè ka hiou nè, ka sa: Nanjou, mo lé mbèli! 26Da kème féré sa, ka sa: On tane ti bèlta ya, baï yana tarou an ndo̱ka goundi ka wou bou hi mvali. 27Da waïnkè mi sa: Babaï Nanjou, da mvali mi son goune boutoukè ko̱ mi ta lé an bo̱ko̱ table a nanjou akli. 28Da Jésus mi féré sa, ka sa hi nè: O waïn, tounassaon no ba loukoukè, mi nding hi mo, mahana ko̱ mome ji. Da mono goune waïn nè mi haï tou, ka mbé l’heure o̱kèo̱.
29Da Jésus ourou an ndourou ka sé diya jing loukou mbi an guèl Galilée, da kè hé toul souraguèl ka kaou an ndourou. 30Da ro̱kè njoukouli nyè maïya mi guè monè, da kli gui jing njou‐komoron ka bo̱ko̱ kli, da njou‐foukoura nondi, da mbo̱li, da njou‐komoron ka ndo̱ko̱ kli, da njou‐jangma afékéli nyèta jing kli. Da kli yèng kli kon bèl bo̱ka Jésus, da kè haï mone kli; 31mi ko̱ laou a ro̱kè njoukouli sé siya, da ko̱ klime ko̱ko̱ ba mbo̱li mi sa baï, da njou‐komoron ka ndo̱ko̱ kli mi haï tou, da njou‐komoron ka bo̱ko̱ kli mi sé siya, da njou‐foukoura nondi mi ko̱ guèl; kli jone Ouone a Israël.
32Da Jésus mi di njou‐séna bong nèli guè monè, ka sa: Mè ko̱ ro̱kè njoukouli passé ta, baï ko̱ klime laïbi jing mi ma name saï, da tane ga son laka ya. Da mè ji pina kli sé guè fal tane sona laka ya, ka touya kli ma kpéme an domboro. 33Da njou‐séna bongli mi sa hi nè: Yé na jing tarou an woropa an hane, an ro̱kè njoukouli on mi son ka mba lé? 34Da Jésus sa hi kli: Tarou ro̱ko̱ ane an ndo̱ko̱ baï lé? Da kli sa: Difala‐séré, da goune njouï nyè ya. 35Da kè sa bi njaka ro̱kè njoukouli, an klime kaou koukoula. 36Da kè ya tarou difala‐séré on da njouïli on, kè kaou koukoula hi Ouone, ka haou ka hi njou‐séna bongli, da njou‐séna bongli mi hi ro̱kè njoukouli on. 37Da kli bon mi son ka mba, da kli fan gara boutoukèli ko̱ na, mba karo difala‐séré. 38Da kli on ko̱ son ba wonron njoukouli mane ténakè‐bongkè‐nèng, tane waïnli da goundi ya.
39Da kè sa hi ro̱kè njoukouli on an klime sé, da kè hé kombone, da sé guè sél koukoula an guèl Magadan.
Currently Selected:
Saint Matthieu 15: KBN1947
Highlight
Share
Copy
Want to have your highlights saved across all your devices? Sign up or sign in
Published by the British and Foreign Bible Society in 1947.
