Saint Jean 6

1Afal fèn aïnli, Jésus mi sé mboro hélé loukou mbi Galilée, lingke ba Tibériade. 2Da rokè njoukouli nyèta mi sé falè, baï ko̱ klime ko̱ fèn‐to̱ko̱nakèli on ko̱ kème nding jing njou‐jangmali. 3Da Jésus mi hé sé guè laou souraguèl da kaou ndourou jing njou‐séna bong nèli.

4Ko̱ name gnèna laka Pâque a Juifli mi hèdi tou.

5Jésus mi bi nonè guè siya da ko̱ rokè njoukouli nyèta ko̱ mi gui monè, kè oui Philippe: Yé na ma zé laka an hani, baï an njoukouli on mi son lé? 6Kè sa baï on baï léna nè, da kè fènè mi toutou fèn on ko̱ kème guè baï ndingnakè. 7Philippe mi féré sa hi nè: Mbo̱ri denierli ténakè‐séré ma baï zéna laka an njoukouli mbéo mbéo bon mi son mane kli gounfènakè ya. 8Njou‐séna bong nè hana mbéo ko̱ ling‐è ba André, yine a Simon Pierre, mi sa hi nè: 9Bala goune makaou guèl aïn jing tarou jo dioui da goune lélé njouili séré; da on ba fèn jing ro̱kè njoukouli on lé? 10Da Jésus sa: Oui sa hi njoukouli on bon klime kaou koukoula. An guèi on pa mana ndourou nyèta. Da njoukouli mi kaou tou, kli hèdi ténakè‐bongkè‐dioui. 11Mono on, Jésus mi bi tarou on, da afal ko̱ kème kaou koukoula hi Ouone tou, kè wal hi njoukouli on bon ko̱ mi kaou koukoula; kème ndé bi njouili da wal mabahana kéng, da kli bon mi son mahana ko̱ klime jiji. 12Da afal ko̱ klime son ka mba tou, kè sa hi njou‐séna bong nèli: Oui mang gara mboutoukèli bon ko̱ pane, an hana gounfènakè mi tane bo̱l ya. 13Kli mang gara mboutoukè mba karo mane botoulè‐séré jing tarou jo on dioui, afal ko̱ njoukouli bon mi son tou.

14Mono, afal ko̱ njoukou aïnli mi ko̱ fèn‐to̱ko̱nakè on ko̱ Jésus mi nding, kli sa: Ka babaï, kè ba prophète on ko̱ mi gui mona njou‐koukoulali. 15Da mono, ko̱ Jésus mi toutou ko̱ klime ji baï bana nè ka bi nè nanjoukaou, kè yèng kli da ourou hé sé laou souraguèl ka ho̱kè ba aféké.

16Ko̱ séssé mi hou tou, njou‐séna bong nèli mi diri gui bèl loukou mbi. 17Da klime kaou kombone baï hérakè sé hélé loukou mbi guè pou Capernaüm. Guèl mi yiri tou, da Jésus mi pane ga guè mone kli ya. 18Koukouna mi kou mingta da wou loukou mbi nyèta. 19Afal ko̱ klime hélé hèdi mane kilomètre dioui maléba difal‐mbéo, kli ko̱ Jésus ko̱ mi sé gui an toul loukou mbi on, kè gui diya guè bèl kombone; da waou mi i kli ta. 20Da Jésus mi sa hi kli: Mè mini; oui ngou waou ya! 21Da mono, klime ji bo̱ko̱kè baï bina Jésus gui bil kombone, da koukoulion kombone mi ba nguéng tou, an guèl on ko̱ klime guè baï séna rou.

22Ko̱ pélé mi taka tou, ro̱kè njoukouli on ko̱ mi pane an hélé loukou mbi an lèkè, klime ko̱ko̱ ko̱ kombone mi na an guèl on mbéo bo̱l, da Jésus mi tane ga hé bil kombone on jing njou‐séna bong nèli ya, da ba njou‐séna bong nèli mi ko̱ sé ka ho̱ko̱ kli. 23Kombone afékéli ko̱ mi gui ka Tibériade guè diya jing guèl sona laka on, afal ko̱ Nanjou mi kaou koukoula hi Ouone tou. 24Mono on, ko̱ rokè njoukouli on mi tane ga ko̱ Jésus da njou‐séna bong nèli mi tane ga ti guèl on ya, kli fèn kli mi hé bil kombondi on baï séna guè pou Capernaüm ka nza Jésus. 25Da ko̱ klime jing nè an mboro hélé loukou mbi, kli sa hi nè: Rabbi, mo kan guèl aïn kassé hane dé? 26Jésus mi féré sa hi kli, ka sa: Babaï, babaï, mi mè sa hi oui, oui tane ga nza mi ti ba baï ko̱ ouime ko̱ fèn‐to̱ko̱nakeli on ko̱ mème nding ya, da ba baï laka on ko̱ ouime son ka mba tou. 27Oui tane nding pina ba baï laka on ko̱ mi poume ya, da oui nding pina ba baï laka on ko̱ mi na kan yana kambèlè, laka on ko̱ Goune a njoukou ma hi oui; baï ko̱ Baba Ouone mi baka nè bi jing fèn mbo̱la amè. 28Kli sa hi nè: Yé name nding ba fèn baï an name nding pina Ouone dé? 29Jésus mi féré sa, ka sa hi kli: Pina Ouone mini ko̱ ba lana bilaou a kè on ko̱ Ouone mi pi tou. 30Mono da klime sa hi nè: Mo nding fèn‐to̱ko̱nakè ba fèn da na ma ko̱ ka la bilaou‐o̱ lé? Pina fèn mi ko̱ mo nding lé? 31Tangko nali mi son manne an woropa jinguèl, mahana ka on ko̱ mi dé:

Kè hi mapa on hi kli ko̱ mi diri gui ka nonkala baï sonakè.

32Mono, Jésus sa hi kli: Babaï, babaï, mi mè sa hi oui, tane ti ba Moïse mi ko̱ hi mapa on hi oui ko̱ mi diri gui ka nonkala ya, da ba Baba ni mi ko̱ hi gba mapa hi oui ko̱ mi diri gui ka nonkala. 33Baï mapa a Ouone ba kè on ko̱ mi diri gui tiya ka nonkala, da hi yana hi njou‐koukoulali.

34Mono, kli sa hi nè: Nanjou, mo hi mapa on hi na guèbassoko.

35Jésus sa hi kli: Mè ba mapa yana. Kè ko̱ mi gui moni nzala ba ina nè tane tiya, da kè ko̱ mi la bilaou ni, yé po̱ko̱ mbi ba ina nè tane tiya. 36Da mè sa hi oui, oui ko̱ mi tou da tane ga la bilaou ni ya. 37Njoukouli on bon ko̱ Baba fènè mi hi kli hi mi, kli ma gui moni, da kè ko̱ mi gui moni mè ba bouna nè kala tane tiya; 38baï ko̱ mè tane ga diri gui tiya ka nonkala, baï kaouna mara fal touli ya, da ba baï kaouna mara fal toula kè on ko̱ mi pi mi. 39Da baï kaouna mara fal toula kè on ko̱ mi pi mi mono, njoukouli bon on ko̱ kème hi kli hi mi, baï an mème tane bo̱l hana mbéo an ndo̱ko̱ ni ya, da mè ma tome kli ka sèkèrè name. 40Baï kaouna mara fal toula Baba mono, njoukouli on bon ko̱ mi ko̱ Goune nè, da la bilaou‐è ma jing yana kambèlè; da mè ma tome nè ka sèkèrè name.

41Juifli mi gnoronfèn toulè baï fèn on ko̱ kème sa, Mè ba mapa ko̱ diri gui tiya ka nonkala tou. 42Da kli sa: Aïn tane ga ti ba Jésus, goune a Joseph mini ya lé? kè on ko̱ name toutou baba nè tèn ma nè ya lé? Fème ko̱ kème sa: Mè diri gui tiya ka nonkala lé?

43Jésus mi féré sa, ka sa hi kli: Oui tane gnoronfèn jing hana bo̱on ya. 44Njoukouna mbéo tane ma baï guina moni ya, wara ko̱ Baba fènè ko̱ pi mi, mi lang nè ya; da mè ma tome nè ka sèkèrè name. 45Mahana ka on ko̱ mi dé an takarata a prophèteli:

Ouone ma to̱ko̱ baï hi kli bon.

Njoukouna ko̱ la Baba da fèn on ko̱ kème to̱ko̱ kara nè, mi gui moni. 46Njoukouna mbéo tane ga ko̱ Baba ya, bo̱l ba kè on ko̱ mi ourou gui ka mona Ouone, kème ko̱ ko̱ Baba. 47Babaï, babaï, mi mè sa hi oui, kè ko̱ mi la bilaou ni, kème jing yana kambèlè. 48Mè ba mapa yana. 49Tangko baïli mi son manne an woropa jinguèl, da klime hou bon tou. 50Mapa aïn mini ko̱ mi diri gui tiya ka nonkala baï an njoukou mi son da tane hou ya. 51Mè ba mapa yana, on ko̱ mi diri gui tiya ka nonkala tou. Tokoré njoukouna mi son mapa aïn, kè ma yan kambèlè; da mapa aïn ko̱ mè ma hi, on ba naïn‐moni, baï hina yana hi njou‐koukoulali.

52Baï toul baï on Juifli mi njaka jing hana ka sa: Njoukou aïn ma baï hina naïn‐monè hi na baï sonakè ane dé?

53Mono, Jésus sa hi kli: Babaï, babaï, mi mè sa hi oui, tokoré ouime tane son naïn‐mona Goune a njoukou ya, da tane njo séme monè ya, oui tane ga ti jing yana an bil baï fèn baï ya. 54Kè on ko̱ mi son naïn‐moni da njo séme moni jing yana kambèlè; da mè ma tome nè ka sèkèrè name. 55Baï naïn‐moni ba laka sona ka babaï, da séme moni ba fèn njona ka babaï. 56Kè on ko̱ mi son naïn‐moni, da njo séme moni, kè bi an bili da mème bi an bilè. 57Mahana ko̱ Baba ba yana, ko̱ mi pi mi, ko̱ mème yan mbo̱l Baba; mono, njoukou on ko̱ mi son mi ma yan mbo̱l mè. 58Aïn ba mapa on ko̱ mi diri gui tiya ka nonkala tou. Kè tane ti mahana ka ba manne on ko̱ tangko baïli mi son jinguèl ka hou ya; da kè ko̱ son mapa aïn ma yan kambèlè.

59Jésus mi sa baï aïnli bon an bil synagogue, ko̱ kème to̱ko̱ fèn an pou Capernaüm.

60Afal ko̱ njou‐séna bong nèli nyèta mi la baï on, kli sa: Baïnjaka aïn lata; yé guème ko̱ ma baï lanakè kan lé? 61Da ko̱ Jésus mi toutou fènè ko̱ njou‐séna bong nèli mi gnoronfèn jing hana baï toul baï on, kè sa hi kli: Fèn aïn tèn jing oui ba fèn bèna lé? 62Yé oui nding ba fèn tokoré ouime ko̱ Goune a njoukou mi hé sé guè nonkala an guèl on ko̱ kème kaou ndourou ti dambèl lé? 63Kè ba esprit ho̱kè on mi ko̱ hi yana; ka naïn‐mone tane ga nding fèna mbéo ya. Da baïnjaka ni on ko̱ mème sa hi oui tou ba esprit da yana. 64Da njoukounali makaou an woro baï ko̱ mi tane ga la bilaou ya. Baï ko̱ Jésus mi toutou ka titilikè njoukouli on ko̱ mi tane ga la bilaou ya, da kè on ko̱ ma jo̱lè. 65Da kè sa: Mono, baï on ko̱ mème sa hi oui jinguèl, njoukouna mbéo tane ma baï guina moni ya, wara ko̱ Baba fènè mi tane ga hi nè hi nè ya.

66Baï toul baï on njou‐séna bong nèli nyèta mi féré fal tou, da tane ga sé bong‐è ba aféké ya.

67Mono, da Jésus mi oui kli botoulè‐séré: Da abaï oui ji baï oura kéng lé? 68Simon Pierre mi féré sa hi nè: Nanjou, yé na ma sé ba mona guè lé? Baï ko̱ mome jing baïnjaka yana kambèlè. 69Da name la bilaou tou, da na toutou ko̱ mo ba Christ, Tangna Fofoto Goune a Ouone. 70Jésus mi féré sa hi kli: Tane ga ti ba mème ko̱ sane oui botoulè‐séré ya lé? da hana mbéo an woro baï ba zabolo. 71Kè sa baï on ba toula Judas Iscariot goune a Simon; baï ko̱ ba kè mi ko̱ ma jo̱lè, kè ba aïn mbéo an wora botoulè‐séré.

Currently Selected:

Saint Jean 6: KBN1947

Highlight

Copy