Saint Jean 5

1Afal fèn aïnli, name gnèna laka Juifli gui tou, da Jésus mi hé sé guè pou Jérusalem.

2An pou Jérusalem an njaka hila guèl tèna badouali, faon mana ndourou ko̱ lingkè ka njaka Hébreu ba Béthesda, mara njakakè mane dioui. 3An bo̱ko̱ njaka mboro on, njou‐jangmali nyèta makaou ndourou, njou‐foukoura nondi, njou‐komoron ka bo̱ko̱li, da njoukouli ko̱ mone kli mi hou wè, kli bon mi kaou ndourou baï vora wouna mbi. 4Baï ko̱ ange mi diri gui bil mbi ka name hanali, bo̱ko̱ mbéo mbéo ka wou mbi; da njoukouna ko̱ mi ti ri bilkè dambèl hi aféké, ko̱ mbi mi wou, monè mi haï, da jangma nè mi o̱tou.

5Njoukouna mbéo mi na jangma an ndourou ko̱ mane saka bongkè‐saï‐faltoulkè‐difala‐saï. 6Ko̱ Jésus mi ko̱ nè ko̱ kème na bou, kè toutou ko̱ kème na jangma on bongkè dita tou, da sa hi nè: Mo ji baï guina bèlta lé? 7njou‐komoron mi féré sa hi nè: Nanjou, njoukouna tane ti jing mi ya baï bina mi sé bil mbi ko̱ wou, da ko̱ mème tissaon baï dira sé, njou‐afékéli mi ti diri sé dambèl hi mi. 8Jésus sa hi nè: Mo ourou siya da mo bi toko no ka sé. 9Da koukoulion, mona njoukou aïn mi haï tou; da kème ourou siya ka bi toko nè da sé.

Ka séssé o̱kèo̱ ba name sabbat. 10Mono, Juifli mi sa hi njoukou on ko̱ monè mi haï tou: Kassénaï ba name sabbat; ka mboro guingna mo tane ma baï bina toko no ya. 11Da kè mi féré sa hi kli: Njoukou on ko̱ haï moni, kème ko̱ sa hi mi: Mo bi toko no ka sé. 12Kli oui nè: Njoukou on ba guè ko̱ sa hi mo ba: Mo bi toko no ka sé lé? 13Da njoukou on ko̱ monè mi haï tou, tane ga tou nè ya; baï ko̱ Jésus mi ta an wora rokè njoukouli ko̱ mi kaou ndourou. 14Afal on gounfènakè Jésus mi ko̱ nè an bil temple, ka sa hi nè: Mo ko̱, kassénaï ko̱ mono mi haï tou. Nding békéfèn ba aféké ya, baï an fèn aféké bèlya ta maïya mi nding mo ya. 15Njoukou aïn mi sé da sa bongkè hi Juifli, kè ba Jésus mi ko̱ haï monè. 16Baï toul baï on Juifli mi sène Jésus, baï ko̱ kème nding fèn aïnli ka ba name sabbat.

17Da Jésus mi féré sa hi kli: Baba ni mi nding pina bo̱l tèn kassénaï; da mè ndé nding kéng. 18Baï toul roko baï aïn Juifli mi nza mborokè nyèta ba aféké baï ina nè, ti ba baï ko̱ kème moungnourou name sabbat ka ho̱kè ya, da baï ko̱ kè fènè mi di Ouone ba dodok Baba nè kéng, mono, kème kèrè fènè ka toulè ko̱ kè mabahana ka Ouone.

19Mono, Jésus mi féré sa, ka sa hi kli: Babaï, babaï, mi mè sa hi oui, Goune tane ga ma baï ndingna fèna mbéo ka laou‐è fènè ya, bo̱l ba fènli on hokè ko̱ kème ko̱ ko̱ Baba fènè mi nding; baï fènli bon on ko̱ kème nding Goune mi ndé nding mabahana on kéng. 20Baï ko̱ Baba mi ji Goune ta, da kème to̱ko̱ fènli bon ko̱ kè fènè mi nding hi nè; da kè ma to̱ko̱ pina on ko̱ ta aïn hi nè, baï an laou baï mi sé siya. 21Mahana ko̱ Baba mi tome houli ka hi yana hi kli, mono on, Goune mi ndé hi yana hi njoukou on mahana ko̱ kème ji ji. 22Baï ko̱ Baba mi tane wal baï hi njoukou ya, da kème hi bi ndo̱ka Goune tou baï wala baï bon, 23da baï an njoukouli bon mi dik Goune, mahana ko̱ klime dik Baba. Kè on ko̱ mi tane ga dik Goune ya, kè tane ga dik Baba ya kéng, ko̱ mi pi nè. 24Babaï, babaï, mi mè sa hi oui, kè on ko̱ mi la baïnjaka ni, da la bilaou a kè on ko̱ mi pi mi, kè jing yana kambèlè, da kè tane kan guèl walabaï ya, kè ta houl tou, da kan yana kambèlè. 25Babaï, babaï, mi mè sa hi oui, name ma gui o̱, da kan kassénaï tou, ko̱ houli ma la mbo̱ka Goune a Ouone da kli on ko̱ mi la mbo̱kè, yé kli ma yan. 26Baï mahana ko̱ Baba jing yana an bilè fènè, mono mabahana ka on kème ndé hi njèran hi Goune baï kaouna jing yana an bilè fènè kéng. 27Da kè sa bi njaka Goune baï wala baï bon, baï ko̱ kème ba Goune a njoukou. 28Laou baï mi tane sé siya ya, baï toul fèn on; baï ko̱ name ma gui o̱, ko̱ yé njoukouli bon on ko̱ mi kaou an bil pal, yé kli ma la mbo̱kè da ma tèn kala. 29Kli on ko̱ mi nding akli bèlta tou, yé kli ma tome baï yana, da kli on ko̱ mi nding akli ba békéfèn tou, yé kli ma tome baï barabaï. 30Mè tane ga ma baï ndingna fèna mbéo ka laou ni fèni ya: mahana ko̱ mème la, mi ko̱ mè wal baï; da walabaï ni ba guédék, baï ko̱ mème tane ga nza ba baï kaouna mara fal touli ya, da ba baï kaouna mara fal toula kè on ko̱ mi pi mi.

31Da tokoré mème sa bongbaï ni fèni, baïnjaka ni mi tane ti ba babaï ya. 32Kène aféké makaou ko̱ mi sa bongbaï ni, da mè toutou ko̱ sana bongbaï ko̱ kème sa bongbaï ni ba babaï. 33Oui pi njoukouli jinguèl sé baï ouina Jean, da kème sa bongbaï a babaï tou. 34Ami, sana bongbaï ni tane ga gui ka mona njoukou ya; da mè sa fèn aïnli hi oui, an ouime kou. 35Jean ba lampe on ko̱ hèlè mi mba an ndourou da cha ka taka guèl, ko̱ ouime ji bo̱ko̱kè baï kaouna gounfènakè ka jangnandaï an takanafèn nè. 36Da mè jing sana bongbaï ta a Jean; baï ko̱ pina on ko̱ Baba fènè mi hi mi baï ndingnakè o̱da, pina on ho̱kè ko̱ mè nding mi sa bongbaï ni, ko̱ ba Baba ko̱ mi pi mi. 37Da Baba on ko̱ mi pi mi, kè fènè mi ko̱ sa bongbaï ni tou. Oui tane ga la mbo̱kè bo̱ko̱ mbéo ya, da oui tane ga ko̱ monè ya, 38da baïnjakè mi tane ga bi an bil baï ya, ba baï ko̱ ouime tane la bilaou an kè on ya, ko̱ Baba mi pi. 39Oui foul an bil Takarata a Ouone baï ko̱ ouime kèrè oui ma jing yana kambèlè an bilkè, da ba Takarata a Ouone on mi ko̱ sa bongbaï ni. 40Da oui tane ga ji baï guina moni ya, baï an ouime jing yana.

41Jonafèn ni mi tane ga gui ka mona njoukouli ya. 42Da mè toutou oui, ko̱ sénahang a Ouone mi tane ti an bil baï ya. 43Mè gui ka ling a Baba ni, da oui tane ga pame mi ya; da tokoré aféké mi gui ka ba dodok ling‐è fènè, yé oui ma pame nè bon. 44Yé oui ma la bilaou ane mèlè? oui on ko̱ mi ya ba jonafèn a njoukou an woro baï, da oui tane ga nza ba jonafèn on ko̱ mi gui ka Ouone ho̱kè ya. 45Oui ko̱ kèrè ba yé mè ma sa kita baï hi Baba ya; da kè on ko̱ ma sa kita baï ba Moïse, ko̱ ouime bi hang baï toul oliya nè. 46Da tokoré ouime la bilaou baï a Moïse, oui ndé la bilaou baï ni kéng, baï ko̱ kème ndé dé baï ni bi takarata. 47Da tokoré ouime tane la bilaou baï takarata on ko̱ kème dé ya, oui ma la bilaou baïnjaka ni ane mèlé?

Currently Selected:

Saint Jean 5: KBN1947

Highlight

Copy