Pinali a Njou‐Mboro‐Pinali 10

1Njoukouna mbéo makaou an pou Césarée ling‐è ba Corneille, kabita pèngna tourougouli té ka sarang an guèl Italie, 2Kè ba njoukou ko̱ pèng bong njaka Ouone, da ko̱ mi waou nona Ouone tèn voulè bon, kème nding ko̱ko̱ jing njoukouli ta, da hiou Ouone guèbassoko.

3Ko̱ l’heure mi hèdi difala‐nèng, kème ko̱ fèn tangta mahana ka lo̱la, ko̱ ange a Ouone mi guè monè an bil voulou, ka sa hi nè: Corneille! 4Da Corneille mi ènrèn guè monè mbilili, da waou mi ba nè ta, kè sa: Fèna lé Nanjou? Da ange mi sa hi nè: Hiouna Ouone no da ndingna ko̱ko̱ no jing njoukouli mi hé tèn nonkala an nona Ouone tou, da tèn ba fèn yangnarankè ya kambèlè. 5Da kassénaï mo pi njoukouli sé guè pou Joppé, baï yana njoukouna ko̱ ling‐è ba Simon gui, kè on ko̱ kène ling‐è ba Pierre. 6Kè makaou jing njoukouna ko̱ ling‐è ba Simon, on ko̱ ba njou‐koura ga, ko̱ voulè mi na an bèl loukou‐mbi‐tome.

7Da ko̱ ange aïn mi sa baï o̱ ka ourou tou, kè di njou‐bakara bil voulèli séré jing tourougou mbéo, ko̱ pèng bong njaka Ouone, an wora kli on ko̱ laïbi jing nè, 8da afal ko̱ kème to̱ko̱ bongbaï aïn hi kli tou kème pi kli sé guè pou Joppé.

9Ko̱ guèl mi taka tou, ko̱ klime pane guina an domboro ka hèdi bèl pou tou, Pierre mi hé sé guè laou toul voulou baï hiouna Ouone ko̱ l’heure mi hèdi baï mana difala‐mbéo. 10Nzala mi i nè, da kème ji baï sona laka, da ko̱ klime pane jouna laka, kème lé jing baï mahana ka lo̱la. 11Da kème ko̱ nonkala bourou tou, da fèn mi diri gui mahana ka ba loukou la ka kouroukè nèng gui tiya koukoula, 12da an bilkè ba naïnli on toutoul toutoul ko̱ bo̱ko̱ kli nèng, da goune saïnli on ko̱ koro an koukoula, tèn ndoïli an nonkala. 13Da mbo̱ko̱ baï mi sa gui monè: Mo ourou siya, Pierre, ka i ka son. 14Da Pierre mi sa: Haï, Nanjou, baï ko̱ mè tane ga son fèn bèlya ka dol malèba fèn dakame hana bo̱ko̱ mbéo ya. 15Da mbo̱ko̱ baï mi sa guè monè bo̱ko̱ séré: Fèn on ko̱ Ouone mi tourou tangta tou, mo ko̱ mahana ka fèn bèlya ka dol ya. 16Da fèn on mi diri gui mane bo̱ko̱ saï; da koukoulion fèn on mi féré ré sé guè nonkala.

17Da ko̱ Pierre mi kère fal fèn aïnli pélé, da yé fèn on ko̱ kème ko̱ mahana ka lo̱la, sa ba fèn lé, mono njoukouli on ko̱ Corneille mi pi mi oui ba voula Simon an hane dé, da kli tèn gui ka o njaka mboro. 18Kli di fèn ka oui fèn guè siya kong ba ling a njoukou on ko̱ ba Simon da kène ling‐è ba Pierre makaou guèl aïn lé.

19Da ko̱ Pierre mi pane kèra fal fèn aïn ko̱ kème ko̱ mahana ka lo̱la, Esprit fènè mi sa hi nè: Mo ko̱ njoukouli saï ma nza mo. 20Da mo ourou siya ka diri guè tiya da sé jing kli, ka tane fa baï hana mbéo ya, baï mème ko̱ pi kli. 21Da Pierre mi diri gui tiya guè mona njoukouli on, ka sa: Mè mini ko̱ ouime nza mi; oui gui baïfèn lé? 22Da klime sa: Corneille, ko̱ ba kabita pèngna tourougouli té njoukou guédék da njoukou ko̱ mi waou nona Ouone, da pime pou Juifli bon mi sa bongbaï toulè bèlta, Ouone mi pi tangna fofoto ange nè guè monè baï wara nè, an kème pi gui mono baï dina mo, an mome guè voulè, baï an kème la baï an njako̱. 23Da mono Pierre mi di kli guè bil voulou da to̱ko̱ guèl kaouna hi kli. Ko̱ guèl mi taka tou, kème ourou ka sé jing kli, da yine hanali an pou Joppé mi ndé ba nè sé kéng.

24Da ko̱ guèl mi taka ba aféké tou, kème kan pou Césarée. Da Corneille mi voro kli ka ndoï yine nèli da bako̱la nèli ko̱ hang kli mi na toul hana ta. 25Da ko̱ Pierre mi ri gui bil voulou, Corneille mi ko̱ nè, ka lé bou mbèla Pierre, ka hiou nè. 26Da Pierre mi ko̱ko̱ nè bi siya, ka sa: Mo ourou siya; mè kéng ba mbé njoukou. 27Da ko̱ kème sa baï jing nè, kè ri gui bil voulou, da ko̱ njoukouli mi ndoï nyèta. 28Da kème sa hi kli: Oui fèn baï, oui toutou ko̱ koungna guingna mana baï an njoukou on ko̱ ba Juif mi ndoï jing mèran goni njoukouli maléba guina mone kli ya; da ba Ouone mi ko̱ to̱ko̱ hi mi an mème tane ma baï ko̱na njoukouna bèlya maléba fèn dakame ya. 29Da mono on, baï on mi ko̱ mème gui, da tane ga fa baï ya, ko̱ ouime pi guè moni. Mono mè oui oui none pina on ko̱ ouime pi guè moni ba fèn lé?

30Da Corneille mi sa: Mane name nèng ka l’heure aïn mè pèng l’heure an difala‐nèngkè ka hiou Ouone an bil vouli; da mono njoukouna mi bou la ko̱ chata, da o bèl moni, 31ka sa: Corneille, Ouone mi la hiouna no tou, da Ouone mi bi laou‐è toul ndingna ko̱ko̱ no jing njoukouli. 32Mono on, mo pi sé guè pou Joppé, baï dina Simon gui mono, kè on ko̱ kène ling‐è ba Pierre; kè makaou an bil voula Simon, ko̱ ba njou‐koura ga, an bèl loukou‐mbi‐tome. 33Mono on, koukoulion mème pi guè mono, da mome nding bèlta ko̱ mome gui. Mono on, na bon ko̱ kaou guèl aïn, name ndoï an nona Ouone baï lana baïli bon on ko̱ Nanjou mi sa bi njako̱ baï sanakè.

34Da Pierre mi bourou njakè, ka sa: Ka babaï, mè toutou ko̱ Ouone mi tane ga jone njoukouna mbéo baï nonè ya, 35da an pime pouli mbéo mbéo bon, njoukou on ko̱ mi waou nona Ouone ka nding guédék, mi mapélékè an nona Ouone. 36Baïnjaka on ko̱ kème pi hi goundi a Israël baï sana mboura bèlabaï a ikina go̱ro̱ ka mbora Jésus‐Christ, kè on ko̱ ba Nanjou a njoukouli bon. 37Oui ndé toutou ko̱ baïnjaka aïn mi ti manguèl bon an pou Judée, tinassaonkè an Galilée, da afal baptême on ko̱ Jean mi sa mboura, 38ka mboro on ko̱ Ouone mi mèn Saint‐Esprit, da njèran kon toula Jésus an pou Nazareth, kè on ko̱ mi sé manguèl baï ndingna bèlafèn, da baï séla kli on bon ko̱ zabolo mi ya kli ka koï, baï ko̱ Ouone mi kaou jing nè. 39Da na ba njou‐sana bongbaïli toul fènli on bon ko̱ kème nding an bil sél koukoula a Juifli, da an pou Jérusalem, kè on ko̱ klime bara nè bi di croix, da i nè. 40Ouone mi tome nè ka name an saïkè, da yèng nè an kème tèn nona njoukouli, 41da tane ti ba an nona njoukouli bon ya, da ba an nona njou‐sana bongbaïli on ko̱ Ouone mi sane kli ka tang ambèl, da na ko̱ son ka njo jing nè, afal on ko̱ kème tome an wora houli. 42Da kème sa bi njaka na baï sana mboura bèlabaï hi njoukouli, da baï sana bongbaï ko̱ ba kè mini ko̱ Ouone mi badi ka walè bi ba Njou‐Walabaï an kli on ko̱ yan da an kli on ko̱ hou. 43Prophèteli bon mi ndé sa bongbaï nè, baï ko̱ ka mboro ling‐è njoukouli mbéo mbéo bon on ko̱ mi la bilaou‐è, yé kli ma jing yèngna bi mboro békéfèn aklili.

44Da ko̱ Pierre mi pane sana baïnjaka aïnli, Saint‐Esprit mi diri gui kon toul kli bon ko̱ mi la baïnjaka. 45Da kli on ko̱ mi i gassa ko̱ la bilaou da ko̱ gui jing Pierre, laou kli mi sè siya, baï ko̱ mi ndé mèn toul ndo̱ka Saint‐Esprit kon toula mèran gentili kéng. 46Baï ko̱ klime la ko̱ klime sa ka njaka baïli toutoul, ka jone Ouone.

47Mono Pierre mi sa: Njoukouna makaï ko̱ ma dèn mbi baï an klime ya baptême ya ko̱ mi ya Saint‐Esprit bèl mahana ka na lé? 48Da kème sa bi njaka kli baï yana baptême ka bil ling a Nanjou. Da mono klime sa jo̱jo̱ nè an kème kaou jing kli ma name hanali.

Currently Selected:

Pinali a Njou‐Mboro‐Pinali 10: KBN1947

Highlight

Copy