Marko 2

Mtamu wa kunyolila

1Siku vizibitile, kengila chusa Kapernaumu, wanhu vuwahulike kamba kamumo mngʼanda. 2Bwando weilundiza, hawenele muja mngʼanda na hamulango. Kawapetela dija dilonga. 3Weza wanhu wamgalile mtamu wa lunyondenyonde, yapapigwe na wanhu wane. 4Vuwalemelwe kumwingiza kilumbo cha wanhu bwando, wafumula ikiswili aho hayali Yesu; vuwamalile kutobola, waluhulumusa ulusazi luyatambalale yuja imtamu wa kunyolila. 5Yesu viyawene nhamanilo yawo, kamulongela mwene lunyondenyonde, “Mwanangu, matozo gako kusegezelwa.” 6Kumbe vija wana Nzuma wakala mumo, wasonga kuwalanga munda mmwawo, 7“Gano kogalongaze? Kombeza Mulungu! Yalihi yodaha kusegeza matozo kamba si Mulungu yaiyeka?” 8Na heyo katambula mloho yake kamba wogelegeza hivo, kawalongela, “Habali mgesa hivo mmiyoyo mmwenu? 9Kibuhile kilihi, kumulongela mwene lunyondenyonde, Kusegezelwa matozo gako, hebu kulonga, Inuka usole lusazi lwako uchole? 10Komu giladi mvitange kamba Mwanage Munhu kana mhiko muisi za kusegeza matozo,” kamulongela mwene lunyondenyonde, 11“Nokulongela, inuka widwike lusazi lwako, uchole ukaye!” 12Mhunde baho kenuka yokidwika lusazi, kahalawa hameso gawo wose; wose wasinhuka wamtunila Mulungu, walonga, “Magweka gali vino hatunagona ngʼo.”

Lawi viyakemigwe

13Kalawa kabili, kachola mmamwegambwega mwa ibahali. Dale jose ja wanhu dimuwinza, kuwalangukiza. 14Na viyakalile yotembela, kamona Lawi mwanage Alfeo, kakala folozani yowila kodi; kamulongela, “Ngholeleza!” Na heyo kenuka, kamuwinza.

15Na viyakalile mngʼanda ya Lawi hana gamandiya, wawila kodi na wene matozo bwando wakala hana gamandiya hamonga na Yesu na wanahina zake, kwa mzoko bwando wamkoleleza. 16Wana Nzuma wa Kifariseo vuwamuwene kamba koja hamonga na wene matozo na wawila kodi, wawalongela wanahina wake, “Kumbe koja hamonga na wawila kodi na wene matozo?” 17Yesu viyagahulike kawalongela, “Waja wolonda mganga iwo watamu, siwo wagima; sizile kuwakema wene ihoko, komu wene gamatozo.”

Gomba da kuleka ukuja

18Wanahina wa Yohana na Mafariseo wakala na luto lwa kuleka kuja; weza wamulongela, “Habali wanahina wa Yohana na wanahina wa Mafariseo walekaga kuja, komu wanahina wako hawalekaga kuja?” 19Yesu kawalongela, “Wagonekwe halusona wadahaze kuleka kuja, kikomo Mlawila mhambe yahali hamonga na hewo? Mazuwa gose vowokala na Mlawila mhambe, hawadaha kufunga. 20Komu mazuwa gokwiza honda wasegezelwe Mlawila mhambe; siku hiyo baho honda waleke ukuja.

21Haduhu munhu yogela kinzazi cha nguwo ya sambi muna inghanzu ilalile; kamba yahatenda hivo, kija ikinzazi cha isambi chodega hose hasomigwe muna inghanzu ilalile, avo zonzo jake dokuwa kulu nghani. 22Kabili haduhu munhu yogela ugimbi wa sambi mmiyandulo ilalile; kilumbo yahagela, ugimbi otula imiyandulo na kwitika hasi, na miyandulo yobanangika; komu ugimbi wa nyipa ugelagwa mmiyandulo ya sambi.”

Kuigoga sabato

23Kakala yobita muna imigunda siku ja ukuhumula, na hewo wanahina wake wasonga kubasiliza nzila, wabena lukuso lwa uhemba. 24Mafariseo wamulongela, “Lola mbona wotenda gagambile umwiko siku da ukuhumula?” 25Na heyo kawalongela, “Hamnasoma tanhu Daudi viyatendile, viyonile nzala heyo na wanage? 26Baho kengila mngʼanda ya Mulungu kwa Mkulu wa nhambiko Abyatari, kaija imigate ija ikilwe Mndewa; na kuija ija migate mwiko, komu ijagwa na Wakulu wa nhambiko waiyeka; ilawabaho kawengha na wayage wakalile hamonga na heyo.” 27Kawalongela, “Siku ja ukuhumula dikigwa giladi ja munhu, komu munhu hekigwe giladi ja Sabato. 28Avo Mwana wa Munhu yuyo Mndewa wa Sabato.”

Currently Selected:

Marko 2: ZAM75

Highlight

Copy