Marko 1

Kulawilila kwa Yohana Msingula wanhu

1Usenga Unogile wa Yesu Kristo, Mwanage Mulungu: 2wandusa kamba vuwandikigwe na Mlaguzi Yesaya,

“Lola, nomgala msenga wangu, yakulongolele yaitende nzila yako.

3Kuna dizi ja munhu yotowa nyangi kuluwala,

Isanghaneni goya nzila ya Mndewa,

Ugoloseni ubito wake.”

4Yohana msingula wanhu kakala kuluwala yobatiza, kuno yopeta mgaluko wasegezelwe matozo. 5Wamulawila wose wa Uyuda na wenekaye wose wa Yerusalemu wasingulwa na heyo muna ulwanda lwa Yordani, wazipupula zambi zao.

6Na heyo Yohana kakala yavalile nguwo ya usinga wa ngamia, na lukumbulu lwa kwembe mkigudi chake, na mandiya gake gakala mbalangulu na uki wa mmuhulo. 7Kafambula yolonga, “Hachugu changu kokwiza mwene mhiko kumbanza niye, na niye sidaha kwinamila nimdoholele nzabi za vilatu vyake. 8Niye nombatizani na mazi, bali heyo kowabatiza na Loho Yangʼalile.”

Yesu kabatizwa, kagezwa, kandusa kupeta

9Ikala siku zija Yesu keza kulawa Nazareti kiwambo cha Galilea, kabatizwa na Yohana muja mulwanda lwa Yordani. 10Viyalawile mmazi, kawona ulanga ubalaluka, kamona Loho yomuhulumukila kamba nziwa. 11Na dizi dilawa kuulanga dilonga, “Gweye gwegwe Mwanangu mnogelwa inikunogele.”

12Mhunde baho Loho kamsola kamgala kuluwala. 13Kakala hiko kuluwala siku milongo mine, yogezigwa na Mwenembago. Kakala hamonga na mingʼonyo, na malaika weza wamtunduwila.

14Yohana viyamalile kufungigwa, Yesu keza Galilea kuupeta Usenga Unogile wa Mulungu. 15Kalonga, “Kipigiti kiduganya, Undewa wa Mulungu wammabehi. Pupuleni muutamanile Usenga Unogile!”

Wanahina wasongile

16Yesu vyokala yotembela mmambwegambwega mwa bahali ya Galilea, kamona Simoni na ndugu yake Andrea, wogela nyavu zawo mbahali, kilumbo wakala wavuwa somba. 17Kawalongela, “Izoni mngholeleze, na niye nowatendani mgalamke wavuwa wanhu.” 18Mhunde baho wazileka zinyavu, wamuwinza.

19Viyagendele hamwande kamona Yakobo na ndugu yake Yohana, wanage Zebedeo; wakala mngalawa wotenda goya nyavu zawo. 20Mhunde kawakema, na hewo wamuleka tata wawo Zebedeo muja mngalawa hamonga na watenda kazi, weza wamkoleleza hachugu chake.

Mzuka mchapalisi ulavigwe

21Wachola wengila Kapernaumu, na viivikile siku ja ukuhumula, kengila mngʼanda ya nhambiko, kulangukiza. 22Wakangawala na langukizo jake, kilumbo kakala yowalanguliza kamba mwene mhiko, si kamba Wana Nzuma.

23Himo mngʼanda ya nhambiko mkala na munhu mwene mzuka mchapalisi, kenula dizi. 24Kalonga, “Tuna choni tweye na gweye Yesu wa Nazareti? Che, kwiza kutubananga? Nikutanga gweye kwa nani, gweye kwa Yuja Yangʼalile wa Mulungu!” 25Yesu kamkomhokela kalonga, “Vudala, umulawe!” 26Leka yuja imzuka mchapalisi kamkenhezakenheza, kalila na dizi kulu, ilawabaho kamulawa. 27Wose wengilwa na kituhuma, weuzagiza wenyego kwa wenyego walonga, “Mbuli yaki ino? Dijo langukizo ja mhiko za sambi! Kowalagiza mizuka michapalisi, na heyo yomdumba.” 28Kidinhilo chake kitapakala mbwisa, kibwililika hosehose muna iisi zose zibiduke Galilea.

Yesu mngʼanda ya Simoni Petro

29Mhunde vuwalawile mngʼanda ya nhambiko, wengila mngʼanda yawo Simoni na Andrea hamonga na Yakobo na Yohana. 30Na mamo wa sano jake Simoni kakala yatambalale mtamu wa lubahila. Mhunde baho wampetela viyali. 31Kamwizila kamgoga mkono, kamwinula. Baho lubahila lumulawa, kawatumikila.

32Viivikile ichungulo, zuwa vidiswele, wamgalila wose wakalile watamu na waja wavagalwe na mizuka. 33Kiwambo chose wakala welundize hamulango. 34Kawahonya bwando wakalile watamu wene vyugulo bwando, kaiwinga imizuka bwando, kaigomesa imizuka kulonga, kilumbo imtanga.

35Imitondo yake kaidamka nghani, kalawa kachola hanhu hali bule wanhu, aho baho yampulile Mulungu. 36Na heyo Simoni na wayage wamuwinza mbwisa. 37Vuwamuwene wamulongela, “Wose wakuzahila.” 38Kawalongela, “Tucho-leni kuyagwe kuli zikaye za mmambwegambwega, niwapetele mbuli na hiko; kilumbo iyo inizile.” 39Katembela isi yose ya Galilea, yopeta mbuli muna zingʼanda zawo za nhambiko, kaiwinga mizuka.

Mwene dikulu

40Mwene dikulu imonga keza kumwake, kampembela kuno yomfugamila mavindi kamulongela, “Uhalonda, kodaha kunihonya.” 41Na heyo kamonela bazi, kamgolosela mkono, kamkwasa kamulongela, “Nolonda, uhone!” 42Mhunde dikulu dihamuka, kangʼala. 43Mhunde baho kamulaga, kamkomhokela kalonga, 44“Teganya sukuumulongele munhu mbuli! Komu chola kamulagusile Mkulu wa nhambiko, ulave nhosa ya kuhonyigwa kwako kamba Mose viyalagize, uwo utango kumwao.” 45Bali heyo viyalawile, kasonga kudibwililisa gweka dino na kudidogola hosehose, avo Yesu hadahile kabili kwingila mkiwambo kimwagaiya, komu kakala kunze hanhu hali bule wanhu, na wanhu wamgendela kulawa nyenza zose.

Currently Selected:

Marko 1: ZAM75

Highlight

Copy