Mateo 9

Mwene kuholola kasegezelwa matozo

1Kengila mngalawa kaloka, kavika kukiwambo chake (Kapernaumu). 2Avo lola, wamgalila munhu mwene kuholola, katambalala mulusazi. Na heyo Yesu viyaiwene ngogelo yawo, kamulongela ija mwene kuholola, “Gangamala mwanangu, kusegezelwa matozo gako!” 3Baho wayagwe wa Wana-Nzuma wagelegeza munda na kitupe, “Yuno kofukula.” 4Aheyo Yesu viyazitangile ngelegeza zawo, kalonga, “Habali mogelegeza gehile mmiyoyo mmwenu? 5Dibuhile dilihi: kulonga, ‘Kusegezelwa matozo gakoʼ bule kulonga: ‘Inuka, ucholeʼ? 6Bali mweye mvitange kamba Mwanage Munhu kanazo mhiko mulumwengu za kusegeza matozo,” kamulongela yuja mwene kuholola, “Inuka, widwike lusazi lwako, uchole kungʼanda yako!” 7Kenuka, kachola kungʼanda yake. 8Matinghanilo vuwagawene, wagogigwe na bwembwe, wamtuniza Mulungu yawenghile wanhu mhiko kamba zino.

Mateo kakemigwa

9Na heyo Yesu viyabitile yolawa hiko, kamona munhu tagwa jake Mateo, yakalile hasi yowila kodi; kamulongela, “Ngholeleza”.

Kenuka kamkoleleza.

10Avija viyakalile mngʼanda yake yaje mandiya, lola wawila kodi na wene matozo bwando weza, wakala hamonga na Yesu na wanahina zake. 11Mafariseo viwawene, wawalongela wanahina zake, “Habali mkulufunzi wenu yoja hamonga na wawilakodi na wene gamatozo?” 12Na heyo viyahulike, kawalongela, “Wene upile hawalonda mganga, bali waja wolumwa. 13Gendeni mwilangulize nhambulilo za malonga gano, Nolonda bazi si kamba nhambiko. Kilumbo sizile kuwakema wene ihoko bali wene matozo.”

Kuleka ukuja

14Baho wanahina za Yohana wamgendela Yesu, walonga, “Habali vino tweye na Mafariseo tuna luto lwa kuleka kuja, bali wanahina zako hawaleka kuja?” 15Yesu kawalongela, “Wagonekwe halusona wodahaze kususuwala, kikomo Mlawila-mhambe yali baho hamonga na hewo. Mazuwa gokwiza vondawasegezelwe mndewa wa mhambe, baho hondawaleke kuja.

16Haduhu munhu yagelile kinzazi cha nguwo ya sambi mnguwo ya umwaka, kilumbo kija kinzazi cha isambi kigeligwe kwiza chodega nguwo ya umwaka, ahaja hadegeke hokongezeka. 17Kabili wanhu hawagela ugimbi wa sambi mwiyandulo ya umwaka; kamba wahagela, ija miyandulo yotulika, ugimbi wokwitika, na miyandulo yobanangika; bali wogela ugimbi wa sambi mmiyandulo ya sambi, ihone vyose.”

Biti Yairo; Mtwanzi mtamu wa mulopa

18Viyakalile yowalongela higo, keza mkulu imonga wa Wayuda, kamfugamila mavindi kalonga, “Biti wangu sambi-sambi vivino kafa, bali izo wike mkono wako mulukuli lwake, na heyo kokuwa mpile.” 19Kenuka Yesu kamkoleleza ha-monga na wanahina zake.

20Avo lola mtwanzi yakalile na utamu wa kulawa mulopa kikomo cha miyaka mulongo umwe na mibili, keza hachugu, kaukwasa umusa wa nguwo yake. 21Kilumbo kagesa mmoyo mmwake, “Nihakwasa umusa wa nguwo yake uyeka, noho-na.” 22Yesu kahinduka kamona, kamulongela, “Gangamala, biti wangu, nhamanilo yako ikuhonya.” Ija imtwanzi kahona kimilo kikija.

23Yesu viyavikile kungʼanda ya mkulu yuja, kawavika wolila na luto lwa filimbi, na bwando wokiyalala. Kawalongela, “Segeleni; imndele hafile, kawasa utulo.” 24Wamana kumseka nghani. 25Matinghanilo vuwasegezwe, kengila, kamgoga umkono; ija mndele kakala ukala. 26Zimana kubwililika mbuli hizo muisi ija yose.

Vimbugumbugu

27Yesu viyakalile yobita yolawa hiko, vimbugumbugu wabili wakoleleza, watowa nyangi wolonga, “Utonele bazi, Mwanage Daudi!” 28Na heyo viyavikile ukaye, waja mbugumbugu wamgendela. Yesu kawauza, “Motogola kamba nodaha kuditenda dino?” Wamulongela, “Ona, Mndewa.” 29Baho kawakwasa gameso yolonga, “Mogwelelwa vumtamanile.” 30Meso gawo gamamazuka. Na heyo Yesu kawalagiza kwa mhiko yolonga, “Teganyeni, hata munhu sikuyavitange!” 31Komu walawa wazipwililisa mbuli zake muisi yose.

Bubuwi

32Aluja luwalawile wano, lola wamgalila bubuwi mwene mizuka. 33Na imizuka vilavigwe, dija dibubuwi dilonga; matinghanilo wakanganya, walonga, “Havinakoneka vino muno mwa Israeli milongo yose!” 34Bali Mafariseo walonga, “Yomwingha mhiko za kuilava mizuka iyo mkulu wa mizuka.”

Migaduko iyo ndigwa kwa Mulungu

35Na heyo Yesu kakala yozunguluka viwambo vyose na vibuga, yowalanguliza mzingʼanda za nhambiko, yowapetela mbuli inogile ya Undewa, yowahonya watamu wose na udodwa wa kiyekakiyeka. 36Avija viyawawene matinghanilo, kawonela bazi kilumbo wakala wandonhile na kupwililika, wagamba nghondolo wali bule mchunga. 37Baho yawalongele wanahina zake, “Ndigwa bwando, bali wasanghani wadodo. 38Mpuleni Mndewa wa ndigwa, yagale wasanghani mumgunda wake!”

Currently Selected:

Mateo 9: ZAM75

Highlight

Copy