Mateo 10

Yesu viyagalile watumigwa

1Kawakema wanahina zake longo dimwe na wabili, kawengha magweka muna imizuka ihile wailave, na kuhoza mitamu yose na udodwa wa nzila zose. 2Na matagwa gawo iwatumigwa longo dimwe na wabili gago gano: wa ikilongozi Simoni yokemigwa Petro, na Andrea ndugu yake; Yakobo wa Zebedeo na Yohana ndugu yake; 3Filipo na Bartolomeo; Toma na Mateo muwila kodi; Yakobo wa Alfeo, na Tadeo; 4Simoni Mkananeo na Yuda Iskariota, heyo yuyo mwene kumuhimbila.

5Hiwo mulongo umwe na wabili Yesu kawatuma, yowalagiza yolonga, “Sikumgende muja muna ziisi zawo hawamtangile Mulungu, bule mdiwambo jojose ja Wasamaria sukumwingile! 6Fadali muwavikile nghondolo wagile wa ngʼanda ya Israeli! 7Gendeni mlonga, muwapetele mbuli ino: Undewa wa Mulungu wahabehi! 8Wahonyeni watamu, wazuseni wafile, watendeni wene dikulu wabwele wagima, laveni mizuka. Mwinghigwa bule, goleni bule! 9Sikumsole zahabu, mhiya hebu hela mmikwizi yenu. 10Wala mkoba wa mwanza au nghanzu mbili, bule vilatu au ngoda, kilumbo msanghani kandakanwa na mandiya gake.

11Kamba wambo jojose bule lubuga lolose londamwingile, zahileni himo munhu yanogile moyo, mkale mmwake kikomo vondamuhalawe! 12Na mweye muhengila muna ingʼanda, ilamuseni na mbeho. 13Wanhu wa ija ingʼanda wahambokelani, tindiwalo jenu jowakalila; kamba hawandame, tindiwalo jenu jombwelelani wenyego. 14Kamba ngʼanda bule kiwambo kihalema kumgomelani hebu kuwategeleza, laweni himo, mkungʼunhe timbwisi dili mmigulu yenu. 15Ihoko nomulongelani, vokuwa vibuhile muiisi ya Sodomu na Gomora kwazaganya usungu wa siku ja ukutaguswa kamba lubuga hilo.

Kamba izinghondolo hana iwambwizi

16Teganyeni, niye nomtumani kamba nghondolo hana iwambwizi, avo muwe na ubala kamba zoka, kabili muwe muholile kamba nziwa.

17Wateganyeni wanhu, kilumbo womgalani mnhaguso na mzingʼanda zawo za nhambiko, womtowani. 18Na mweye mogaligwa mmwawo watagusi na wandewa kwa kilumbo changu, kuwa kihumo kumwawo na kwa waja hawamtangile Mulungu. 19Bali aho hondawamgaleni, sikumgelegezegelegeze vija vya ukulonga, kilumbo mogolelwa kipigiti kicho ga ukulonga, 20kwa mzoko si mwemwe mondamulonge, bali Loho ya Tata wenu yondayalonge mgati mmwenu.

21Na ndugu komulava ndugu yake giladi yafe, na tata komulava mwanage; iwana wowenukila wawalelile, wawakome. 22Na mweye mokwihilwa na wanhu wose kilumbo cha tagwa jangu; komu heyo yondayafunye umoyo mpaka kimambukizo, yuyo yondayahone. 23Kamba wahamuwingani muna ikiwambo kino, kimbilileni kiyagwe; kingongongo nomulongelani, hondamwimambukize miwambo ya Israeli, hata vondayeze Mwanage Munhu.

24Mwanahina habanzaga mkulufunzi wake, bule nyakadala habanza yamgulile heyo. 25Vilinganya mwanahina yagambe mkulufunzi wake, na nyakadala yagambe kamba yamgulile. Ihawa Mwene ngʼanda wamulonga “Beelzebuli mkulu wa mizuka”, avo wobanza kuwalonga waja wali wa ngʼanda yake.

Sikumdumbe kulonga kinaga ubaga

26Hivo sikumuwadumbe, kilumbo haduhu mbuli ya kwifisa, ileke kubwililika, hata difisigwe kwiza dileke kutangika. 27Dinimulongelani mdiziza, dilongeni chalinze; ajo dimuhulika hakifiso, dipeteni mzimhengo! 28Sikumuwadumbe wokoma lukuli, hawadaha kukoma iloho; fadali mdumbeni ija Yodaha kubananga lukuli hamonga na iloho mmoto! 29Chei videge vibili haviguligwa na lugebe lumonga? Maza kimonga hakigwa hasi, yoleka kuvitanga Tata wenu. 30Kileka azo mvili zenu zili mmatwi genu zipetigwa zose. 31Sikumdumbe bule; mwa wakulu mweye kubanza ividege bwando.

32Ayo imunhu yondayanhogole hawamemile wanhu, na niye nomtogola hakihanga cha Tata wangu yali kuulanga. 33Maza munhu yondayambele hawamemile wanhu, na niye nombela hakihanga cha Tata wangu yali kuulanga.

Mifutuzi; kwihonya iloho

34Sikumwagize kamba niza kugala kukalagoya mulumwengu; aka sizile kugala kukalagoya, komu nghondo. 35Kilumbo niza kumfutula munhu na tata wake, mwana wa kitwanzi na mama wake, kabili mkwe na mkwe yake. 36Na wandumu wa munhu wokuwa waja wali mngʼanda yake.

37Yamnogele tata bule mamaake kubanza niye, hanyandakane. Kabili yamnogele mwanage bule biti wake kubanza niye, hanyandakane. 38Munhu kamba hasolile biki jake ja kufila, yangholeleze, hanyandakane. 39Mwene kulonda upile wake kowagiza, bali mwene kuwasa upile wake kwa kilumbo changu kogolelwa.

40Yombokelani mweye kombokela niye; ayo yombokela niye kombokela Yuja yanhumile. 41Yombokela mlaguzi kilumbo heyo mlaguzi, kobokela kitumetume cha mlaguzi; ayo yombokela mwene ihoko imonga kilumbo kana ihoko, kobokela kitumetume cha mwene ihoko. 42Kabili munhu yoyose yondayamngʼweze imonga wa iwadodo wano kikata cha mazi gaholile, yovitanga kamba mwanahina, ihoko nomulongelani: hondachage bule kitumetume chake.”

Currently Selected:

Mateo 10: ZAM75

Highlight

Copy