Yohana 8

Yesu kamuhonya mpinga yatinghanizwe muugoni

1Imala baho Yesu kachola kavika kudigongo ja Mizeituni. 2Vuuchele imitondo, kengila kabili mdihekalu, na wanhu wose wamgendela; kakala hasi yowalanguliza. 3Aho Wana Nzuma na Mafariseo wamgalila mtwanzi yatinghanizwe muugoni, wamwika hagatigati womulongela, 4“Mkulufunzi, mtwanzi yuno katinghanizwa muugoni. 5Avo Mose mwinzuma kalangukiza kuwatowa na mabwe kamba wano. Agweye kotangaze?” 6Ago wakala wogalonga kwa kumgeza, giladi wagoge kilumbo cha kumdununza. Komu Yesu kenamila, yomana kwandika na kidole chake mmisenga. 7Na hewo vuwagendelele kumdununza, kenula ditwi kawalongela, “Mmwenu ayo yali bule tozo, na yasonge kumwasila dibwe!” 8Kenamila lwekabili kandika na kidole chake mmisenga. 9Na hewo vuwahulike, munda na kitupe wagagesa, walawa yumweyumwe wasonga wavyele kuvikila wa ikimambukizo; kasigala Yesu yaiyeka na yuja mtwanzi bahaja. 10Yesu viyenule meso gake, hamonile munhu, komu yuja mtwanzi, kamulongela, “Agweye mtwanzi, wakwahi waja wakudununze; haduhu mwene kukutagusa?” 11Kamwidika, “Haduhu. Bwana!” Yesu kamulongela, “Hata niye sikutagusa. Genda na zako, bali sikuubwelele kutoza!”

Yesu yuyo Mlangaza wa imbago

12Baho Yesu kawalongela kabili, “Niye nene mulangaza wa ulumwengu. Yongholeleza, honda yachole mdiziza ngʼo, komu kokuwa na mulangaza wa upile.” 13Mafariseo wamulongela, “Gweye kokisindila mwenyecho; usindi wako si wa ihoko.” 14Yesu kawedika yolonga, “Vilema nihesindila mwenyecho, usindi wangu uwo wa ihoko, kwa kilamso nikutanga kundawile na kunigenda amweye hamnhangile kundawile, wala kunichola hamnhanga. 15Mweye motagusa kwa kuwinza viloto vya mulukuli, niye simtagusa munhu. 16Hata nihatagusa, utagusi wangu uwo ihoko, kilumbo niye sili yeka, bali niye na Yuja Yangalile. 17Muna Inzuma yenu yandikigwa, Usindi wa wanhu wabili uwo wa ihoko. 18Niye nene nikisindila mwenyecho, na heyo Tata Yangalile konisindila.” 19Wamulongela, “Kakwahi Tata wako?” Yesu kawedika, “Mweye hamnhangile, wala Tata wangu hamumtanga; kamba mnhangile niye, muhamtangile Tata wangu.”

20Higo kagalonga viyakalile yolanguliza mdihekalu, hana digati da kwikila mhiya. Wala haduhu yamgogile, kilumbo kidami chake kikala hakinavika tanhu.

Usindi wa ihoko wa kumtanga Yesu zizo sanghano

21Viyagwe kawalongela, “Niye nochola, na mweye monzahila; mweye mofa mmatozo genu, na kunichola niye, mweye hamdaha kwiza.” 22Baho walonga, “Che, kokikoma mwenyecho? habali kolonga, kunichola niye, mweye hamdaha kwiza?” 23Kawalongela, “Mweye mwa hasi, niye na uchana. Mweye mulawa muisi ino, bali niye silawile muisi ino. 24Kileka hivo nimulongelani, mofa mmatozo genu. Kilumbo kamba hamtogole, niye iyo nene, avo mofa mmatozo genu.” 25Wamulongela, “Uli nani na gweye?” Yesu kawalongela, “Vilema dilonga, dijo dinimulongelani. 26Ninago bwando ga kulonga na kutagusa; bali Heyo Yangalile iyo wa ihoko, na niye gamhulike kumwake, gago nilonga mulumwengu.”

27Komu hewo hawamtangile kamba kowatambulila Tata.

28Baho Yesu kawalongela, “Vonda mmwinule Mwanage Munhu mbiki, movimanya kamba niye iyo nene, wala sitenda mbuli nili yeka, komu vija Tata viyanangukize, vivo vinilonga. 29Heyo Yangalile kahamonga na niye, handekile nili yeka, kwa mzoko nosanghana sikuzose gaja gamnogele.” 30Yesu viyakalile yolonga higo, bwando wamtogola.

Ihoko ya Yesu yonda itukombole

31Na heyo kawalongela waja Wayuda wamtogole, “Muhakala muna imbuli yangu, mogalamka wanahina wangu wa ihoko. 32Kabili moitanga ya ihoko, na hiyo ihoko iyo yonda imkomboleni.” 33Wamwidika, “Tweye twa lukolo lwa Abrahamu, wala hatunakala utumwa kwa munhu yoyose, na gweye kolongaze, mokomboligwa?” 34Yesu kawalongela, “Togola togola nomulongelani, Munhu yoyose yotenda zambi, yuyo mtumwa wa zambi. 35Viema mtumwa hakala sikuzose mngʼanda, bali Mwana kokala sikuzose.

36Avo Mwana yahamkombolani, mogalamka wagolo kwelikweli.

Umulelo wa Mwenembago uwo womwihila Yesu

37Nivimanya kamba mwa ulelwa wa Abrahamu; komu molonda kunghoma, kilumbo cha malonga gangu gamduhu mgati mmwenu. 38Niye nolonga ganiwene kwa Tata; amweye mtenda gamuhulike kwa tata wenu! 39Wedika wamulongela, “Tata wetu iyo Abrahamu!” Yesu kawalongela, “Kamba muli wanage Abrahamu, muhatendile ziyatendile Abrahamu. 40Komu mweye mozahila kunghoma niye, kilumbo nimlongelani da ihoko dija dinihulike kulawa kwa Mulungu; Abrahamu hatendile hivo. 41Mweye mzitenda kazi za tata wenu.”

Baho wamulongele, “Tweye hatuleligwe kwa ugoni, tweye tunayo tata imonga, viema iyo Mulungu.” 42Yesu kawalongela, “Kamba Mulungu maza yagalamke tata wenu, muhanogele na niye, kwa mzoko ndawa kwa Mulungu nabaha; avo sizile kwa giladi jangu, komu Yuyo Yanhumile. 43Vilihi mweye hamgamanya higo gonilonga? Kileka avo mweye hamdaha kuutegeleza uno ulonzi wangu!

44Mweye mwa wanage Mwenembago tata wenu, na sulukilo za tata wenu zizo zimulonda kuzitenda. Heyo kakala mkoma wanhu kulawa ichanduso, wala hemile muihoko, kilumbo mgati mmwake mduhu ihoko. Hoyolonga uvwizi, kalongaga igake mwenyecho, kilumbo heyo mtungulu, kabili iyo tata wa utungulu. 45Na niye, kwa mzoko nolonga ya ihoko, hamnhogola.

Yesu kabule matozo; kohuma kifo, kamona Abrahamu

46Yalihi mmwanza wenu yodaha kusindila kamba niye nina matozo? Na niye nihalonga ya ihoko, mbona mweye hamnhogola? 47Ayo yali wa Mulungu kozihulika mbuli za Mulungu, komu mweye hamuhulika, kilumbo mweye si wa Mulungu.

48Wayuda wamwidika wolonga, “Che, hatulonga goya kamba gweye kwa Msamaria, kabili kuna luwege?” 49Yesu kalonga, “Niye nabule luwege, bali nomtuniza Tata wangu, na mweye mombeza niye. 50Niye sizahila nhogolwa yangu aka; kabaho mwene kuizahila na kutagusa kitala. 51Ihoko ihoko nomulongelani, Munhu yahaugoga ulonzi wangu, honda yadanganike digunge na digunge.”

52Wayuda wamulongela, “Avino tuhuguza, kumbe kuna luwege. Abrahamu kafa, Watulandagu wafa, na gweye kolonga, Munhu yahaugoga ulonzi wangu, honda yalanze kifo, kokala digunge kwa digunge! 53Gweye kwa mkulu kubanza tata wetu Abrahamu, na Watulandagu wafa. Kokiitenda uwe yalihi?” 54Yesu kedika, “Nihaitogola mwenyecho, nhogolwa yangu si kinhu; bali kabaho Tata wangu yoningha iyenzi, viyemela mweye momulonga yuyo Mulungu wenu. 55Amweye hamumtangile. Bali niye nimtanga; nihalonga kamba simtangile, nogalamka mvwizi kamba mwemwe. Komu nimtanga na Longa jake nidigoga. 56Abrahamu tata wenu kadenghelela vija vonda yayone isiku yangu; na heyo kayona, kaimozamoza.” 57Wayuda wamulongela, “Gweye hunavika miyaka milongo mitano, na gweye kumona Abrahamu?” 58Yesu kawalongela, “lhoko nomulongelani, Abrahamu yali haduhu, kipigiti kija niye nili baho.” 59Basi wadondola mabwe, giladi wamwasile, bali Yesu kayangayuka, kalawa mdihekalu.

Currently Selected:

Yohana 8: ZAM75

Highlight

Copy