Yohana 9

Munhu yaleligwe kimbugumbugu

1Hata viyakalile yobita, kamona munhu, kimbugumbugu kulawa kuleligwa kwake. 2Wanahina wake wamuuza, “Rabi (Mkulufunzi), iyo yalihi yatendile zambi, munhu yuno, hebu waja wamulelile, kileka yaleligwe kimbugumbugu?” 3Yesu kalonga, “Kuduhu kilagwa cha matozo gake hebu ga waja wamulelile, komu giladi viloto vya Mulungu vyoneke kumwake! 4Itwandama kusanghana kazi zake Yangalile, kihali kikomo cha imisi chabaha; chokwiza ikilo chonda yalemelwe munhu kusanghana. 5Kipigiti kino kinili mulumwengu, na mlangaza wa ulumwengu.” 6Yomala katema mate hasi, kavuluga nhope na gamate, kambakaza kimbugumbugu dija ditope mmeso. 7Kamulongela, “Genda ukanawe mdilamba ja Siloamu;” kihindukizo chake “Mtumigwa”. Kachola kanawa, kabwela yolola.

8Waja wamtangile na waja wamonaga umwaka viyapulaga, walonga, “Che, yuno si yuja yakalile yopula?” 9Wayagwe walonga, “Aka, kagalamka kamba heyo.” Heyo mwenyecho kalonga, “Iyo nene.” 10Wamulongela, “Meso gako gamamazuka vilihi?” 11Na heyo kalonga, “Munhu yuja yokemigwa Yesu kavuluga mitope, kambakaza mmeso, kanongela, Genda Siloamu ukanawe; basi nyhola kunawa, nidukila nilola.” 12Wamulongela, “Ka kwahi munhu hiyo?” Kedika, “Sivimanya.”

Gomba da sabato; Kimbugumbugu viyamsindile Yesu

13Avija wamsola wamgala kwa Mafariseo yuja yaleligwe kimbugumbugu. 14Na siku hiyo ikala Sabato baho Yesu hayavuluge dija ditope na kumnanazula gameso. 15Mafariseo na hewo wamuuza, Kwidukila ulola vilihi? Kawalongela, “Kambakaza nhope mmeso, na niye nawa, na vino nolola.” 16Wayagwe mmwanza wao walonga, “Munhu hiyo halawile kwa Mulungu, kwa mzoko haigoga Sabato.” Wayagwe walonga, “Munhu mwene zambi kodahaze kutenda unzonza kamba uno?” Wamana kwibagula wawo kwa wawo.

17Wamuuza viyagwe yuja kimbugumbugu, “Gweye komulongaze, kwa vija viyakunanazule gameso?” Kalonga, Heyo Mtulandagu. 18Wayuda hawatogole kamba kakala kimbugumbugu, kuli bule leka yolola; hata vuwawakemile waja wamulelile yuja yamamazuke gameso. 19Wawauza wolonga, “Yuno yuyo mwanenu ija imulongaga kaleligwa kimbugumbugu? Vilihi kedukila yolola?” 20Waja iwelesi wake wedika wolonga, “Tuvitanga yuno yuyo mwanetu yaleligwe kimbugumbugu. 21Komu vino sambi viyolola, hatuvimanya, wala hatutangile yalihi yambabazule gameso; muuzeni mwenyecho, na heyo munhu mgima, kokilongela mwenyecho.” 22Na waja wamweleke walonga higo, kilumbo wawadumba Wayuda, kwa mzoko Wayuda wakala wekile kilaga, kamba munhu yahamtogola Kristo, kobaguligwa mngʼanda ya nhambiko. 23Sokomoko hiyo kileka waja wamulelile walonga, “Munhu mgima, muuzeni mwenyecho!” 24Baho wamkema lwekabili yuja yakalile kimbugumbugu, wamulongela, “Mtunize Mulungu (Tupetele ili kweli); tuvimanya munhu hiyo kana matozo!” 25Heyo kalonga, “Kamba kana matozo, sivimanya; nhanga mbuli imonga, nghala kimbugumbugu, avino sambi nolola.”

26Baho wamulongela, “Kakutendela choni? kakunanazula gameso vilihi?” 27Kawalongela, “Nimala kuwalongela, hamuhulike; habali molonda kupetelwa lwekabili? mmanye molonda mgalamke wanahina wake?” 28Wamkengemeka walonga, “Gweye gwegwe mwanahina wake yuja; atweye twa wanahina wa Mose. 29Tweye tuvimanya, Mulungu kalonga na Mose, bali yuja hatumtangile kuyolawa.” 30Yuja imunhu kawedika yolonga, “Uno unzonza mweye hamumtangile kuyolawa, na heyo kanimamazula gameso! 31Tuvitanga kamba Mulungu hahulika wene zambi, komu munhu yahamdumba Mulungu na kutenda goyolonda, komuhulika heyo. 32Lulawile haikilongozi havinahulikwa, munhu yaleligwe kimbugumbugu kananazulwa meso na munhu yoyose. 33Kamba hiyo halawile kwa Mulungu, hisambi yadahe kutenda mbuli yoyose.” 34Wedika wamulongela, “Aka gweye kuleligwa mmatozo yeka; kotulangukiza tweye?” Wamuwinga mdidale ja nhambiko.

Vimbugumbugu senhambo iwo walihi

35Yesu kahulika kamba wamuwinga; avo kamona kamuuza, “Gweye komvumila Mwanage Mulungu?” 36Heyo kedika yolonga, “Mndewa, yuyo yalihi, na niye nimtogole?” 37Yesu kamulongela, “Ahivo kumona, viyemela yuulonga nayo, iyo yuyo.” 38Kalonga, “Nhogola, Mndewa;” kamfugamila mavindi.

39Yesu kalonga, “Niye niza mulumwengu muno kwa kitala, giladi waja hawalola walole, na waja wolola wagalamke vimbugumbugu.” 40Na Mafariseo wayagwe wakalile baho hamonga na Heyo, vuwagahulike gaja, wamulongela, “Che! hivo na tweye twa vimbugumbugu?” 41Yesu kawalongela, “Kamba muwile vimbugumbugu, hisambi muwe na zambi; komu vino molonga, Tolola; basi na zambi zenu zokala.”

Currently Selected:

Yohana 9: ZAM75

Highlight

Copy