Yohana 11

Utamu wa Lazaro hiko Betania; Habali Yesu kabeta kifo cha Lazaro

1Kukala na munhu mtamu, Lazaro wa Betania, kiwambo cha Maria na Marta mkulu wake. 2Yuyo Maria yuja yambakaze Yesu gamavuta ganogile na kumuhangusa migulu na mvili zake; na Lazaro lumbu jake kakala mtamu. 3Waja iwalumbu walagiza usenga kumwake walonga, “Mnde-wa, yuja yunogele mtamu.” 4Na heyo Yesu viyahulike kalonga, “Utamu uno si wa kudanganika, komu wa nhunizo za Mulungu, giladi Mwana wa Mulungu yatunilwe.”

5Na heyo Yesu kamnogela Marta na mdodo wake na Lazaro. 6Basi viyahulike Lazaro mtamu, kazaganya tanhu siku mbili bahaja hayakalile. 7Imala baho kawalongela wanahina wake, “Tubwelele Uyuda!”

8Wanahina wake wamulongela, “Rabi, majuzijuzi Wayuda wakala wolonda kukutowa na mabwe, na gweye kochola kuko kabili?” 9Yesu kalonga, “Che, saa za imisi si longo dimwe na mbili? munhu yahachola imisi, hekwala, kilumbo kowona mulangaza wa ulumwengu uno. Komu yahachola ikilo, kokikwala, kilumbo mulangaza wamduhu mgati mmwake.

11Yomala kawalongela, “Mbwiga wetu Lazaro kawasa, bali nochola hamulamse.” 12Waja iwanahina wamulongela, “Bwana, ihawa kawasa, kwiza kohona.” 13Bali Yesu kakala yalongile kifo chake, na hewo wagiza, kalonga kamba kawasa utulo. 14Baho Yesu kawalongela bunubunu,” Lazaro kadanganika. 15Na niye vinilekile kuchola kuko, nokimozamoza kilumbo chenu, giladi kwiza mtogole; avo tucholeni kumwake!” 16Tomaso yokemigwa Ubasa kawalongela wanahina wayage, “Tucholeni na tweye, giladi tukafe hamonga na heyo!”

Yesu yuyo uzusi wa wafile, na ugima wa idigunge

17Yesu viyavikile, kamvika yazikigwe mkabuli dopata siku jaikane. 18Na Betania ikala behi na Yerusalemu, halinga uchozi wa maili mbili hivo. 19Na Wayuda bwando wakala wezile kwa Marta na Maria, giladi wawahani hamonga kwa mzoko wa ndugu yao.

20Baho Marta viyahulike kamba Yesu kokwiza, kachola kumuhingila, bali Maria kakala hakaye. 21Marta kamulongela Yesu, “Mndewa, kamba ukalile baha, hisambiyafe lumbu jangu! 22Hata vino nivitanga, jojose jonda umpule Mulungu, na Mulungu kokwingha.” 23Yesu kamulongela, “Ndugu yako kozuka.” 24Marta kamulongela, “Nivitanga kwiza kozuka ako kuna ukuzuka siku ya ikimambukizo.” 25Yesu kamulongela, “Niye nene uja uzusi na ugima; yonhogola niye, hata nayadanganike, kokuwa mgima. 26Na yoyose yu mgima yonhamanila, honda yafe fofofo milongo kwa milongo; che, hivo kugatogola gano?” 27Kamulongela, “Ona go Bwana, niye nigatogola, kumbe gweye Kristo, Mwanage Mulungu, yuja yokwiza muisi.”

Yesu kadudumka miyanza mibili mloho yake

28Yomala kachola kamkema mdodo wake Maria hakifiso, kamulongela, “Mlangulizi kabaha, kokukema.” 29Na heyo viyahulike, kalawa mbwisa, kamgendela. 30Na Yesu kakala hanavika mgati mkiwambo, komu kakala yahali bahaja hayamuhingile Marta. 31Basi waja Wayuda wakalile baho na Maria mngʼanda, na kumnyamaza, vuwamonile vija viyasegele mbwisa na kuchola, wamkoleleza; womgamba kwali kochola kuna ikabuli yalilile kuko.

32Maria viyavikile haja hayakalile Yesu na kumona, kagwa hamagulu gake, kamulongela, “Mndewa, kamba ukalile baha, hisambiyafe lumbu jangu!” 33Yesu viyamonile yolila, na waja Wayuda welongoze nayo wolila, kadudumka mmoyo, kengilwa chuhila mloho yake. 34Kalonga, “Mmwika kulihi?” Wamulongela, “Mndewa, izo ulole!” 35Yesu kalila mahozi. 36Baho Wayuda walonga, “Loleni amba viyamnogele!” 37Bali wayagwe walonga, “Che, yuno yakalile yamnanazule gameso yuja mbugumbugu, vimpota kumtenda na yuno yaleke kufa?”

Yesu viyampulile Tata hamagwiti ga iwanhu; Lazaro viyabwelile mgima

38Yesu kagugumka viyagwe mmoyo, kavika kuna dikabuli, najo dikala hango, na mlango ugubikwa na dibwe. 39Yesu kalonga, “Disegezeni didibwe!” Marta, lumbu jake yuja yafile, kamulongela, “Mndewa, konungha vino, kilumbo vikimpatile kifo, lelo siku jekane.” 40Yesu kamulongela, “Niye sikulongele, kamba uhatogola, koyona iyenzi ya Mulungu?” 41Baho wadisegeza dija dibwe; Yesu kenula meso gake uchana kalonga, “Tata hongelaga, kilumbo kumhulika. 42Na niye nivimanya kamba gweye kumhulikaga mazuwa gose; bali kilumbo cha umtinghano uno wizile, leka nongile higo, giladi watogole Gweye Gwegwe Unhumile.” 43Yomala kalila na dizwi kulu, “Lazaro izo kuno kunze!” 44Kalawa hanze yuja yafile, kafungigwa sanda mmigulu na mmikono, na kihanga chake kifungigwa kitambala. Yesu kawalongela, “Mdoholeni, mmuleke yachole na zake!”

Zundo da watambika wamkome Yesu

45Imala baho Wayuda bwando muna iwaja wezile kwa Maria na kulola gaja gayatendile, wamtogola Yesu. 46Bali wayagwe wachola kwa Mafariseo, wawapetela gayatendile. 47Mabaho Watambika Wakulu na Mafariseo welundiza, weka zundo walonga, “Totenda choni vino; munhu yuno kotenda vya nhunguka bwando. 48Tuhamuleka vivo, na wanhu wose womtogola, na Waroma wokwiza, wobananga dihekalu jetu na lukolo lwetu.” 49Munhu imonga mmwanza wao, Kayafa yakalile mtambika mkulu mwaka uja, kawalongela, “Mweye hamtanga mbuli; 50Wala hamgelegeza kamba vilumba munhu imonga yafe kwa kilumbo cha wanhu, lukolo lugima sukulwangamile!” 51Na longa dino hadilongile kwa fiyuko zake, komu vija viyali mtambika mkulu umwaka uja, kalagula kamba Yesu kofa kilumbo cha ulukolo. 52Wala si lukolo hilo luyeka mbe, bali na yawalundize iwana wa Mulungu wapwililike, wawe hamwe. 53Lulawile siku hiyo watenda msagu wa kumkoma.

54Na Yesu hatembele chusa muisi ya Uyuda; kakulawa hiko, kachola behi na luwala hakiwambo kikemigwa Efraimu; kakala hiko hamonga na wanahina zake.

55Na Pasaka ya Wayuda ikala behi, na wanhu bwando wanenuka kugenda Yerusalemu kulawa mviwambo vyao, kwa luto lwa kwingʼaza, hainavika sikunghulu. 56Baho wamzahila Yesu, wema mdihekalu, kuno welongela, “Mokonaze, avo mmanye heza isikunghulu ino?” 57Na Watambika Wakulu na Mafariseo wakala walavile lwamu, munhu yahamtanga hayali, na yagale kivugulo, giladi wamgoge.

Currently Selected:

Yohana 11: ZAM75

Highlight

Copy