Sanghano 4

Watumigwa habehi ya Nhaguso Nghulu

1Vuwakalile wolonga na wanhu, watambika na mkulu wa asikali, mwimiliza dihekalu, na Masadukeo wawalawila, wengilwa na lusango nghani. 2Kilumbo cha kulanguliza wanhu, kuno wobwililisa kivugulo cha kuzuka kamba vija, Yesu viyazusigwe kulawa kwa wafile. 3Avo wawagoga, wawagala mkifungo, wabete imitondo, kilumbo ikala ichungulo. 4Komu waja wahulike dija Longa, bwando watogola, na ubwando wa wambigalo uvika elfu nhano. 5Vivikile imitondo, wakulu na wavyele na Wananzuma wailundiza Yerusalemu. 6Kwa Mtambika Mkulu Anasi na Kayafa na Yohana na Iskanda, wose waja wa lukolo lwa Mtambika Mkulu. 7Vuwawemize hagatigati wawauza, “Msanghana gano kwa mhiko ilihi, na kwa twaga ja yulihi?”

8Baho Petro yamemile Loho Yangʼalile, kawalongela, “Mweye wakulu wa wanhu na wavyele wa Israeli! 9Kilumbo mwene kulemala katendelwa dinogile, kileka tweye motuuzauza lelo, ino kahona kwa mhiko ya yalihi? 10Vimanyeni mweye mose na wanhu wose wa Israeli, kamba ino yemile hano yummona mgima, kahonyigwa mtwaga da Yesu Kristo wa Nazareti, yuja yumumuwambile mweye mbiki, Mulungu kamzusa kulawa kwa wafile, 11Heyo yuyo dibwe dija dimulemile mweye mzengaga, digalamka dibwe da kingolobweda. 12Avo kuduhu ugombozi kwa munhu iyagwe yoyose, kwa mzoko kuduhu twaga diyagwe dili hasi ya ulanga diwagwelelwe walumwengu, dilingile tweye kukomboligwa najo!”

13Vuwawawene Petro na Yohana vowokala wolonga wali bule na kidumbo, na vija vuwatangile kamba wanhu hawalangulizwe Jandiko hebu nzewele, wakanganya; kabili wawatanga kamba wakala hamonga na Yesu. 14Komu vuwamuwene yuja munhu yahonyigwe yemile hamonga na hewo, wakala bule mbuli ya kwidika. 15Wawalagiza walawe haluhengo lwa nhaguso, wachole kunze, na hewo watenda msagu wao kwa wao. 16Walonga, “Tuwatendeze wanhu wano? kilumbo wasanghana kilolomboto kimwagaiya, kitangike na wanhu wose wokala Yerusalemu, na tweye hatudaha kuhela. 17Komu mbuli ino sikwibwililike kwa wanhu wose, na tuwadumbize, sikuwampetele kabili munhu yoyose mbuli igambile twaga dino.”

18Wawakema na kuwazuma, sikuwalonge kabili hebu kulangukiza kwa twaga da Yesu. 19Komu Petro na Yohana wawedika walonga, “Lamuleni wenyego mbuli ino, kamba igoloke hakihanga cha Mulungu kuwategeleza mweye kubanza Mulungu! 20Kwa mzoko hatudaha kuleka kugapeta magweka gatonile na kugahulika.”

21Komu hewo wawadumbiza nghani; ilawa baho wawadohola, kilumbo hawawene mbuli ya kuwagadusa kwa mzoko wa wanhu, kilumbo wose wakala womtunila Mulungu kwa gaja gawawene. 22Na munhu yuja yatendelwe kilolomboto hicho, cha kuhonyezwa, miyaka yake ibita milongo mine.

Didale dawanahina vuwampulile Mulungu

23Vuwamalile kufungulilwa, wachola kwa wanhu wao, wawapetela gose gawalongelwe na wakulu wa nhambiko na wavyele. 24Na hewo vuwahulike, walava dizwi kulu, wampula Mulungu hamonga, walonga, “Mulungu Magana, gwegwe usanghane ulanga na isi na bahali na vinhu vyose vili mumo! 25Kulonga na Loho Ingʼalile mmulomo wa mwanago Daudi,

‘Vilihi wanhu hawamtangile Mulungu woguta mizangi?

Vilihi ngholo za wanhu wogesa mbuli zili bule mzoko?

26Wandewa wa muisi welundiza,

na wakulu wasagula msagu hamonga,

wamuleme mndewa na Kristo wake.ʼ

27Ino iyo kweli, kilumbo mdiwambo dino wailundize, wamgoge mwanago yangʼalile Yesu yumbakile mavuta; yuyo Herode na Pontio Pilato hamonga na wamizimu na ngholo za Israeli. 28Wagasanghane gose gaulondile umwaka, galawilile mumkono wako na manogelwa gako. 29Avo Mndewa, galolese madumbizo gao, ukawamotele watumigwa wako, walonge mbuli yako na moyo nhula! 30Ugolose mkono wako ukahonye wanhu, vituko na vinzonza na vyoneke mditwaga da mwanago Yesu yangʼalile!”

31Vuwamalile kumpula Mulungu, hanhu haja hawelundize, hagudemezwa; wose wamema Loho Yangʼalile, walonga mbuli ya Mulungu na kulavanya, wali bule kidumbo.

Loho ya unogelo itenda mhiko muna ididale

32Na mpuli wa wanhu watogole wakala na moyo umwe na loho imwe, wala haduhu imonga yalongile kamba kinhu chochose kiyali nacho icho chake mwenyecho, bali vinhu vyose vikala msangilo. 33Na watumigwa walava usindi wa kuzuswa Mndewa Yesu kwa mhiko bwando; na unozi wa Mulungu uwakalila wose. 34Kukala kuduhu na yumwe kumwao yaswelile kinhu, kilumbo wose wakalile na migunda hebu ngʼanda, waziguliza, wagala mhiya ziwapatile, 35wazika hamigulu ya watumigwa, na kila munhu kagolelwa kija chayaswelile.

36Kukala na Mlawi yalawile Kupro, tagwa jake Yosefu, yakemigwe na Watumigwa Barnaba, kihindukizo chake “Mwana-Nyamala.” 37Heyo kakala na mgunda, kauguliza, kazigala zimhiya, kazika hamigulu ya Watumigwa.

Currently Selected:

Sanghano 4: ZAM75

Highlight

Copy