MARCOS 13
13
Jesuse' cu ya'alic bíin pu'ucuc le kulnajo'
(Mt 24.1-2; Lc 21.5-6)
1Le ca jóok Jesús te j kulnajo', j a'ala'ab ti' tumen jun túul ti' u aj canbalo'ob: Aj ca'anbesaj, ¡Il le nucuch tuunicho'oba' yéetel le nucuch najo'oba'! 2Ba'ale' Jesuse' tu núucaj ti': ¿Ca wilic le nucuch najo'oba'? Waye' ma' bíin p'átac mix jun p'éel tuunich yóokol u láaki'. Tuláacal yaan u láaj je'enel.
Chíiculalo'ob cu bin ilbil ma'ili' xu'uluc yóokolcaab
3J bino'ob túun tu múulil le Olivo'obo', le yaan actáan ti' le kulnajo'. Le ca j culaj Jesús te'elo', Pedro, Jacobo, Juan yéetel Andrese' tu x mucul a'alajo'ob ti': 4A'al to'on ba'ax kiin quéen úuchuc le ba'alo'oba'. ¿Ba'ax chíiculal bíin ila'ac bin u ca'aj úuchul tuláacal le ba'alo'oba'?
5Jesuse' tu núucaj ti'ob: Canantaba'ex, ma' a tu'usle'ex tumen mix máac. 6Tumen ya'ab máax bíin taalac tin kaaba' táan u ya'alic: Teen le Cristoo', ya'ab máax cu bin u tuuso'ob. 7Ba'ale' le quéen a wu'uye'ex u tzicbalil ba'atelo'ob yéetel p'ec óolal ba'atelo'obe', ma' a sajactale'ex, tumen bey unaj u yúuchul. Ba'ale' ma' leti' u xuuli'. 8Tumen jun p'éel caaje' yaan u ba'atel yéetel u láak caaj, bey xan jun p'éel ajawile' yaan u ba'atel yéetel u láak ajawil. Ya'ab tu'ux yaan u quíilbal lu'um, yaan xan u yantal wi'ijilo'ob. yéetel x wo'oquino'ob. Le ba'alo'oba' jach chéen u cáajbal ti' le ba'alo'ob cu bin j mukyajtbilo'.
9Ba'ale' canantaba'ex, tumen yaan a ku'ubule'ex ti' le jalacho'obo', yaan xan a ja'adzale'ex te j sinagogaobo'. Te'exe' yaan a bine'ex tu táan méektáano'ob yéetel tu táan ajawo'ob tin wo'olal. Beyo' cu páajtal a t'aane'ex tin wo'olal tu táano'ob. 10Tumen táanil kabéet ca tze'ecta'ac le ma'alob péectzila' ti' tuláacal caajo'ob. 11Le quéen bisa'aque'ex kubbil ti' le jalacho'obo', ma' a sen tuclique'ex ba'ax bíin a wa'ale'ex. A'ale'ex le ba'ax cu dzáic te'ex Ku a wa'alique'ex ti' le jun súutuco'. Tumen ma' te'ex can t'aane'exi', ba'ale' Quili'ich Pixan cu bin t'aan. 12Máaco'obe' bíin u kub u sucu'uno'ob u ti'al quíimsbil, yéetel le taatatzilo'obo' bíin u kub u paalalo'ob. Le paalalo'obo' bíin u kéex óolt u taatao' yéetel bíin u beeto'ob u quíimsa'alo'ob. 13Tuláacal yóokolcaab yaan u p'ectique'ex tin wo'olal, ba'ale' le máax ma' tu xu'ulul u yóol tac tu xuule' bíin to'ococ.
14Aj bóobat Daniele' tu dzíibtaj tu yo'olal le p'ecbe'en ba'alo'ob le kascunajo'. Le quéen a wile'ex dza'an lela' tu'ux ma' unaj u yantale', le máax cu xooque', u na'ate, le máaxo'ob yano'ob Judeae' unaj u púudzulo'ob te j pu'uco'obo'. 15Le máax yaan tu yóokol u yotoch ti' le kiino', ma' u yéemel u ti'al u yocol u jóokes wa ba'ax. 16Le máax yaan j káaxe', ma' u suut mix u ti'al u ch'a'ic u nook. 17Óotzil le co'olelo'ob koja'ano'ob ti' chaan pal ti' le kiino'obo' wa le yaan u chaan palo'ob táan chu'uchil. 18Káat óolte'ex ti' Yuum Ku ma' u yantal a púudzule'ex ti' u kiinil que'el. 19Tumen le kiino'obo' u kiinilo'ob yaayaj óolal je'el bix mix jun téen yanac cáajic ca tu beetaj Ku yóokolcaab, mix bíin yanac u láak cu dzo'ocol lelo'. 20Wa Yuumtzil ma' tu cóomquintic le kiino'obo', mix máac je'el u to'ocole', ba'ale' u cóomquintmaj tu yo'olal u yaabilaj ti' le máaxo'ob u ti'alo', le máaxo'ob u yéeymajo'.
21Wa máax cu ya'alic ti' te'ex túun: Ile'ex, way yaan le Cristoo', wa: Ile'ex ti' yaan te'elo', ma' a wocsaj óoltique'ex. 22Tumen yaan u taal j tuus wíinico'ob yaan u beticuba'ob beyo'ob Cristoe' yéetel tuus wíinico'ob cu t'aano'ob tu yo'olal Ku. Yaan xan u beetico'ob chíiculalo'ob yéetel jakbe'en ba'alo'ob u ti'al u tuusico'ob, wa ca páataque', tac le yéeya'ano'ob tumen Ku. 23Ba'ale' p'il a wiche'ex, tene' dzo'oc in wa'alic ti' te'ex tuláacal ma'ili' úuchuque'.
Bix cu bin taal u Paal Máac
(Mt 24.29-35,42,44; Lc 21.25-36)
24Ba'ale' ti' le kiino'obo', cu dzo'ocol u máan u kiinilo'ob mukyaje', le kiino' yaan u éekjoch'e'ental, le lunao' ma' túun u dzáa u sáasilil; 25le eeko'obo' yaan u lúubulo'ob ti' le ca'ano', yéetel tac le páajtalilo'ob yaan te ca'analo' yaan u quiquilanquilo'ob. 26Yaan u yila'al túun u Paal Máac cu taal ti' le múuyalo'obo' yéetel nojoch páajtalil yéetel qui'ichquelemil. 27Cu dzo'ocole' cu túuxtic u ángelo'ob u ti'al u much'quint le máaxo'ob u yéeymajo' ti' u can tzéelil yóokolcaab, cu cáajbal ti' u náachil le lu'umo' tac ti' u náachil le ca'ano'.
28Cane'ex le queet t'aana' ti' u cúulul higo: wa muuntac u kabo'ob yéetel táan u tóop'ol u le', te'exe' a wojele'ex táan u taal u kiinil kíilcab. 29Je'el bix lela', le quéen a wile'ex u yúuchul le ba'alo'oba', ojéelte'ex u xuule' dzo'oc u náadzal, ti' yaan tu jool naje'. 30Tu jaajil quin wa'alic ti' te'ex, tuláacal le ba'alo'oba' yaan u yúuchul ma'ili' quíimic u cajnáalilo'ob le kiino'oba'. 31Ca'an yéetel lu'ume' bíin máanaco'ob, ba'ale' in t'aano'obe' ma' bíin máanaqui'.
32Ba'ale' u kiinil wa u yoraile' mix máac u yojel, mix u ángelilo'ob ca'an, mix u Paal Ku. Chéen le Taata u yojelo'. 33Le o'olale', p'il ichnene'ex, paacatnene'ex yéetel payalchi'inene'ex, tumen ma' wojele'ex ba'ax kiin quéen kuchuc u yoraili'. 34Bey jun túul máac cu bin xíimbal náachile', ma'ili' jóokoc u binbale', cu kubentic u yotoch ti' u palitzilo'ob yéetel cu t'oxic u meyajo'ob jujun túulil. Cu ya'alic xan ti' le j canan jool najo' ma' náayal u yóol. 35Te'exe' ma' a wenele'ex, tumen ma' a wojele'ex ba'ax kiin quéen kuchuc u yuumil naji', wa quéen áakabchajac, wa chúumuc áakab, wa u ti'al u kaaybal j t'eel, wa u ti'al u sáastal. 36Ma' xan ca séeb talaqui' ca u yil táan a wenele'ex. 37Le ba'ax quin wa'alic ti' te'exa', ti' tuláacal quin wa'alic: Ma' a wenele'ex.
Currently Selected:
MARCOS 13: MAYADC
Highlight
Share
Copy
Want to have your highlights saved across all your devices? Sign up or sign in
Biblia Maya de Yucatán © Sociedades Bíblicas Unidas, 1992.
