2 MACABEOS 5
5
Cu quíimil Jasón
1Ti' le kiino'obo', Antíocoe' táan ca'ach u nu'ucbesicubáa u ti'al u ca'a bin u puljubáa u ba'atelt Egipto. 2Bey túuno' bul cuarenta kiino'obe' j ila'ab aj nat' tzíimino'ob u ch'a'amajo'ob u nu'ucul u ba'atelo'ob oro u ca'ajo'ob, u nu'ubesmajuba'ob táan u máano'ob tu yóol iik u machmajo'ob u máascabo'ob; 3u múuch'ul aj nat' tzíimino'ob u nu'ucbesmajuba'ob u ti'al j ba'atel, yéetel cáajsaj ba'atel bey xan pulbáil ba'atel ti' tu ca'a jaatzilo'ob, cu yúuntico'ob u chimalo'ob yéetel u ya'abcach lóomte'ob, cu ch'inico'ob julubo'ob yéetel cu léembal u nu'ucul u ba'atelo'ob oro u ca'ajo'ob bey xan u jejeláasil u corasaob. 4Tuláacalo'obe' cu káatico'ob ti' Yuum Ku ca u taas ba'al ma'alob le ba'ax cu yilico'obo'.
5Bey juumnaj u tzicbalil dzo'oc u quíimil Antíoco', Jasone' tu ch'a'aj bey mil máaco'obe', ca tu téec pulajubáa tu yóokol le caajo'. Tu dzooque', le ca tu pa'aj u muuk le máaxo'ob canantic le tuulumo'obo', Jasone' tu ch'a'aj le caajo', Menelaoe' tu caxtaj tu'ux u ta'aquicubáa ichil le caajo'. 6Jasone' tu kupaj u caal ya'ab ti' u yéet caajalo'ob x ma' cha'a óotzilil, ma' tu tucultaj wa le pa'a muuk tu beetaj ti' u yéet caajalo'obo' jun p'éel t'ona'anil u ti'al leti'; ba'ale' leti'e' tu tucultaj táan u kiinbesic jun p'éel pa'a muuk tu yóokol u aj p'eeco'ob, ma' tu tucultaj wa u yéet caajalo'obi'. 7Ba'ale' ma' páatchaj u toquic le méektáanilo', chéen tu caxtaj u mix ba'alchajal yéetel le cúulpachquinaj tu beetajo', yanchaj u ca'a púudzul u ti'al u binbal tu lu'umil Amón. 8Jach yaj ba'ax tu taasaj u kasa'anil: cu dzo'ocol u lúubul tu kab Areta u j noojoch le arabeob, j púudz caajal caajil; ch'a'a pachta'an tumen tuláacal, p'ecta'an tumen cu ya'ala'al u cúulpachcuntmaj a'almaj t'aano'ob, bey xan tumen tu quíimsaj u yéet caajalo'ob, bey túuno' ti' j bin wa'atal Egiptoe'. 9Beyo' le máax tu tojolch'intaj ya'ab ti' u yéet caajalo'obe', quíim táanxel lu'umil, cu dzo'ocol u na'acal ti' cheem u ti'al u bin Lacedemonia tumen tu tucultaj je'el u caxtic tu'ux u kubenticubae', tumen cu bisicubáa le judíob yéetel le lacedemoniobo'; 10beyo' le máax tu p'ataj ya'abcach máaco'ob x ma' mucnale', mix máac okolnaj tu yo'olal; ma' kiinbesa'ab u mu'uculi', mix yanchaj u mucnal tu tzéel u máanja'an ch'i'ibalo'obi'.
Cu manba'alcunta'al kulnaj
(1 Mac 1.16-28)
11Le ca tu yojéeltaj ajaw le ba'alo'oba', tu tucultaj u káat lik óolchajal Judea. J kuuxchaj túun bey u kuuxchajal jun túul dzíidzic ba'alche'e', ca tu tojtáantaj likbal Egiptoe', ca j ooc yéetel u aj ba'atelo'ob Jerusalene' ca tu ch'a'aj, 12ca tu ya'alaj ti' u aj ba'atelo'ob ca ko'oloc x ma' ch'a'a óotzilil le máaxo'ob cu nactáanta'alo'obe' bey xan ca ku'upuc u caal le máaxo'ob cu caxtico'ob tu'ux u ta'aquicuba'ob ti' najo'obe'. 13J beeta'ab jun p'éel nojoch quíimsaj ti' táanquelemo'ob yéetel nuxibo'ob, ti' co'olelo'ob yéetel mejen paalal, jun p'éel kup caalil ti' x ch'úupalal yéetel chaanpalo'ob cu chu'ucho'ob. 14Chéen ichil óox p'éel bul kine', tu chucaj ochenta mil le máaxo'ob beeta'ab loob ti'obo': cuarenta mil quimeno'ob, yéetel u láako'obe' j co'ono'ob u ti'al palitzil.
15Ma' qui'imac yóol ajaw yéetel le je'elo', j táak ocol ichil kulnaj u asab quili'ichil tuláacal u yóokolcaab; Menelao le máax tu manba'alcuntaj u ya'almaj t'aanilo'ob u caajale', leti' tu beetajubáa u aj bej. 16Yéetel u ma' ocsaj óol kabo'obe', ajawe' tu ch'a'aj le quili'ich nu'ucul ukulo'obo', tu yoclaj xan le ba'axo'ob siibla'aja'an tumen u láak ajawo'ob u ti'al u nojochquinta'al, u nojbe'enil yéetel u tziiquil le kulnajo'.
17Antíocoe' j ca'analchaj u yich tumen ma' tu na'atic, chéen tumen kebanchaj u cajnáalilo'ob Jerusalene', Yuumtzile' j kuuxchaj jun p'íit kiin tu beetaj bey tuba'an u kulnaje'. 18Wa ma' u kebantal le judíob ca'acho', Kue' dzo'oc u jadzic Antíoco' ti' le súutuco', dzo'oc ca'ach u beetic u lukul u xiibil máaquil je'el bix Eliodoro, le máax túuxta'ab tumen Seleuco u yila'a u ayikalil kulnaje'. 19Ba'ale' Kue' ma' tu yéeyaj le caaj tu yo'olal u yaabilaj ti' le kulnajo', ba'ale' tu yéeyaj le kulnajo' tu yo'olal u yaabilaj ti' le caajo'. 20Le o'olale', le kulnajo', cu dzo'ocol u meyaj u ti'al u yaj óol le caajo', meyajnaj u ti'al u yutzil; xúunp'atta'abe', tumen j kuuxchaj Junab Ku u yuumil tuláacal páajtalil, ba'ale' ca'a líiksa'ab yéetel tuláacal u qui'ichquelemil; le ca tu sutaj yich tu tojil le nojoch Yuumtzil.
Cu yúuchul quíimsaj wíinic tu caajil Jerusalén
21Antíocoe', cu dzo'ocol u ch'a'ic nadza'an sesenta mil kilos plata te j kulnajo', séeba'an suunajic Antioquía, tumen tu tucultaj tu ca'anal ichile' je'el u beetic u báab le cheemo'ob ti' lu'umo' bey xan u xíimbal máaco'ob tu yóokol ja'. 22Ba'ale' tu p'ataj máaxo'ob beetic kaas ti' le judíobo'. Jerusalene', tu p'ataj Filipo j frigiail, leti'e' asab kasa'an u tuucul ti' máax p'at te j cúuchilo'; 23tu pu'uquil Gerizime' tu p'ataj Andrónico; cu dzo'ocole' ichil lelo'oba' tu p'ataj Menelao, u asab kasa'anil ti' tuláacal u ti'al u ch'a'apacht u yéet caajalo'ob. Ajawe' ya'ab u p'ecmajil le judíobo', 24le beetic tu túuxtaj Apolonio, u náacom u aj ba'atelilo'ob Misia, tu táan veintidós mil aj ba'atelo'ob, leti'e' a'ala'ab ti' je'el u páajtal u kupic u caal j xiibo'ob bey xan je'el u páajtal u conic j xiibo'ob yéetel mejen paalal. 25Le ca j kuch Jerusalene', Apolonioe', tu beetaj bey táan u kuchul yéetel jéedzele', ca tu pa'ataj tac u kuchul u kiinil je'elel; le ca tu yilaj táan u je'elel le judíobo' tu ya'alaj ti' u aj ba'atelo'ob ca xíimbalnaco'ob ich caaj; 26tuláacal le máaxo'ob jóoko'ob u cha'anto'obe' tu quíimsajo'ob ti' le c úuchilo', bey tumen tu xíimbaltaj yéetel u aj ba'atelo'ob le caajo', tu quíimsaj ya'abcach wíinic.
27Ba'ale' Judas Macabeoe', tu much'jubáa yéetel u láak diez j xiibo'obe' ca j bino'ob x tocoy lu'um; te j pu'uco'obo', cuxlaj yéetel u láakinajo'obe' je'el bix le ba'alche'obo', u ti'al ma' u kascuntic u yanilo'obe' cu jaantico'ob chéen xíiw.
Currently Selected:
2 MACABEOS 5: MAYADC
Highlight
Share
Copy
Want to have your highlights saved across all your devices? Sign up or sign in
Biblia Maya de Yucatán © Sociedades Bíblicas Unidas, 1992.