MATEO 4

1Oco Yesu wa songuiwila le Espiritu kekalasoko ha setekiwa leliapu. 2Wa likandangiya okulia akui akuãla kovotanya lakui akuãla kovoteke, kuenje noke wa lambuka. 3Kuenje uyonji wo kokela, yu wa popia laye hati, Nda vumõla a Suku popia lovawe a huti, Lingi olombolo. 4Eye wa kumbululula hati, Ca sonehiwa okuti,

Omunu ka muila omuenyo kombolo lika,

te kondaka yosi yi tunda vomẽla wa Suku.

5Oco eliapu lio tuala vimbo li kola, yu lio talamisa kolusoka luonembele. 6Lia popia laye liti, Nda vumõla a Suku likupuila posi. Momo ca sonehiwa citi,

O ku kundika kovangelo vaye, kuenda vali, citi,

Va ku yelula lovaka avo,

sanga o veta omãi yove kewe.

7Yesu wa popia lalio hati, Ca sonehiwa vali, citi, Ku ka seteke Ñala Suku yove. 8Eliapu lio tuala vali komunda yisovi ca lua, kuenje lio wilikila ovosoma osi okilu lieve lulamba wao; 9yu lia popia laye liti, Huiha ovina evi viosi nda o wila posi hu fendela. 10Oco Yesu wa popia lalio hati, A Satana, tundapo, momo ca sonehiwa citi,

Fendela Yehova Suku yove,

eye lika o vumba.

11Oco eliapu lio sia kuenje ovangelo veya, vo kuatisa.

12Eci Yesu a yeva okuti Yoano wa kuatiwa, wa tiukila ko Galilea. 13Oku iluka ko Nasara wa enda, wa tunga vo Kafarinau, kohulo yokalunga, vofeka ya Sevulono la Nafitali, 14oco eci ca popia uprofeto Isaya ci lingiwe, cokuti,

15Ofeka ya Sevulono lofeka ya Nafitali,

vi kasi vonjila yokonele yokalunga,

kesinya lia Yordão,

ndokuti Galilea ya vakualofeka.

16Omanu va tumalele vowelema

va mola ocinyi ci piãla.

Ava va kaile vofeka yulembo wokufa,

ocinyi ca va tuila.

17Tunde opo Yesu wa fetika oku kunda hati, Likekembeli akandu ene, momo usoma wokilu u kasi ocipepi.

18Eci a vambala konele yokalunga ka Galilea oco wa mola vamanji vavali Simono wa lukiwa Petulu, la Andereu manjaye, va imba owanda vokalunga, momo anyanga volosi. 19Yesu wa popia lavo hati, Nda ñuami oco ndu lingisi anyanga vomanu. 20Haico va sia awanda avo kuenje vo kuama. 21Oco oku amako wa mola vamanji vavali vakuavo. Tiago omõla a Sebedeo la manjaye Yoano. Va kala vowato kumue la isiavo Sebedeo, oku pamela awanda avo, yu wa va kovonga. 22Oco va sia owato kuenda isiavo kuenje vo kuama.

23Yesu yu wa ñuala ñuala vo Galilea yosi, wa longaisa volosunangonga viavo. Wa kunda kunda ondaka yiwa yusoma. Wa sakula ovovei osi lafengi osi o pokati komanu. 24Oluhimo luaye lua yevala vo Suria yosi kuenje va nena kokuaye vosi va vela, okuti vana va vela ovoveyi aiñi aiñi, lava va liyeya olongembia, lava va kuetiwe lovilũlu, la vakuacinonya, lava va fa ovimatamata ketimba, kuenje wa va sakula. 25Kuenje owiñi wa lua womanu wo kuama. Va tunda ko Galilea lo ko Dekápoli lo ko Yerusalãi lo ko Yudea kuenda kesinya lia Yordão.

Currently Selected:

MATEO 4: EMB63

Highlight

Copy