YOANO 5

1Kovaso yovina evi kua kala ofesta ya va Yudea, kuenje Yesu wa lamanela ko Yerusalãi.

2Vo Yerusalãi, ocipepi lombundi yolomeme, muli ociva ca tukuiwa vu Heveru Betesaita. Ci kuete ovindumba vitãlo. 3Vovindumba viaco mua pekaila owiñi wolombei kuenda olomeke, kuenda ovilema, lava va fa ovolu. Va talamela okutumuha kuovava. 4Momo, olonjanja vimue, ungelo wa Ñala, oku wila vociva, o tumuhisa ovava aco, kuenje u o teteka oku wilamo eci a tumuha, o kaya kuvei u kuete. 5Kua kala ulume umue wa vela uvei waye akui atatu kanyamo kanyamoe celãla. 6Oco, eci Yesu o mola wa pekela, kuenje wa kũlĩha okuti wa kalako osimbu, oco wa popia laye hati, O yongola oku kaya? 7Ombei yo kumbulula, yiti, A Ñala, si kuete u o ñapa lonjanga vociva eci ovava a tumuha, kuenje osimbu seteka ame muẽle oku enda, umue wiñi o ndiangelamo. 8Yesu wa popia laye hati, Votoka, tikula ula wove, kuende. 9Haico ulume waco a kaya, kuenje wa tikula ula waye, yu wa enda.

Eteke liaco puãi ca kala esambata. 10Oco va Yudea va popia lu wa sakuiwa, vati, Etaili esambata. Ka ci tava oku ambata ula wove. 11Puãi eye wa va kumbulula, hati, U wa sakula, eye wa sapuila, hati, Tikula ula wove, kuende. 12Vo pula vati Omunu wa ku sapuila hati, Tikula ula wove, kuende, helie? 13Puãi u wa sakuiwa ko kũlĩhile momo Yesu wa punduluka, omo kua kala owiñi. 14Noke Yesu wo sanga vonembele, kuenje wa popia laye hati, Tala, wa kanguka. Ku ka linge vali ekandu, sanga cimue cĩvi vali enene ci ku kuata. 15Omunu waco wa enda, wa sapuila va Yudea hati, u wa sakula, Yesu. 16Omo Yesu a linga ovina evi kesambata oco va Yudea vo silañanyaila 17Puãi Yesu wa va kumbulula, hati, Toke cilo Tate o linga upange, lamevo ndinga upange. 18Oco va Yudea va sandela ca lua oku wipa, haku samako lika esambata, puãi omo a lisokisa la Suku eci a tukula Suku hati, Tate.

19Yesu wa popia lavo hati, Mopia lene siti, Ocili, ocili, Mõla ka tẽla oku linga cimue eye muẽle, te eci a lete ku Isia oco lika a linga, Cosi Isia a linga haico Mõla a lingavo. 20Momo Isia o sole Mõla, kuenje u lekisa ovina viosi a kasi loku linga, eye muẽle, kuenje u lekisa ovilinga via velapo, okuti evi vi sule, oco vu komohe. 21Momo ndeci Isia a pindula vakualufa kuenda o va iha omuenyo, haico Mõla a eca omuenyo ku a panga. 22Momo Isia ka tetuluila umue, puãi omoko yosi yoku tetulula wa yi eca ku Mõla, 23oco vosi va sumbile Mõla ndeci va sumbila Isia. U ka sumbila Mõla ka sumbilavo Isia wo tuma. 24Mopia lene siti, Ocili, ocili, u o yeva ondaka yange, kuenje o kolela u wa numa, o kuete omuenyo ko pui. Keya koku tetuluiwa, puãi wa iluka ale vokufa, wa iñila vomuenyo.

25Mopia lene siti, Ocili, ocili, ola yiya kuenda yeya ale, okuti vakualufa va yeva ondaka ya Mõla a Suku, kuenje ava va yi yeva va mola omuenyo. 26Momo, ndeci Isia a likuetele omuenyo, haico a eca ku Mõla omoko yoku likuatela omuenyo. 27Wa wihavo omoko yoku tetulula omo eye Mõlomanu. 28Ko ka ci komohi, momo ola yiya eci vosi va kasi vayambo va yeva ondaka yaye, 29yu va tundamo. Ava va linga ciwa, va tundila epinduko liomuenyo, ava va linga cĩvi, va tundila epinduko liekanga.

30Si tẽla oku linga cimue lika liange. Ndeci ndi yeva, haico netulula, kuenje onimbu yange yesunga, momo si sandi oku linga ocipango cange, te ocipango cu wa numa. 31Nda ndi limbila uvangi ame muẽle uvangi wange hawociliko. 32Umue wiñi o njimbila uvangi kuenje ndi ci okuti uvangi waye wocili. 33Wa tumili ku Yoano, kuenje Yoano wa imbila ocili uvangi. 34Puãi uvangi nda tava hawomanuko, haimo lumue, mopia ovina evi okuti oco vu popeliwe. 35Eye wa kala ondiyelo ya taima ya tua, kuenje wa tavi oku yolela vocinyi cayo okasimbu kaño. 36Puãi ñuete uvangi wa velapo, okuti wa Yoano u sule. Momo ovilinga Tate a nyiha oku vi malusula, haivio ndingainga, ovio vi njimbila uvangi wokuti Isia wa numa. 37Kuenje Isia wa numa eye wa njimbila uvangi. Ka wa la yevi ondaka yaye, ndaño eye muẽle ka wa lo moli. 38Ondaka yaye ka vu yi kuete okuti yi kala ño-o vovitima viene, momo u o tuma ka wo koleleli. 39Vu konomuisa ovisonehua, momo wa soki hoti, Omo tu muila omuenyo ko pui, kuenje evi ovio vi njimbila uvangi; 40haimo ko tavi oku iya kokuange ho kuati omuenyo. 41Si tambula ulamba komanu. 42Puãi ndo kũlĩhi okuti ko kuete ocisola ca Suku vovitima viene. 43Ame ndeyilila vonduko ya Tate, kuenje ka wa nambuili. Nda kuiya umue wiñi iyilila vonduko yaye muẽle eye vu tambula. 44Vu kala ndati lekolelo, ene vu liaveli pokati ulamba ene muẽle, kuenje ko sandi ulamba u tunda lika ku Suku? 45Ko ka soki okuti ndu pindiki ku Isia. U u pindiki Mose, una wa imbi ondunge. 46Momo, nda wa koleleli Mose, nda wa ñolelivo, momo eye wa soneha oku ndombolola. 47Puãi, nda ka vu kolela ovisonehua viaye, vu kolela ndati olondaka viange?

Currently Selected:

YOANO 5: EMB63

Highlight

Copy