YOANO 4

1Eci Ñala a kũlĩha okuti va Fariseo va yeva okuti Yesu wa tavisa kuenda wa papatisa olondonge via lua, okuti via Yoano vi sule, 2ndaño Yesu ka papatisile eye muele, te olondonge viaye, 3oco wa tunda vo yudea, loku enda vali ko Galilea. 4Kuenje co pitisa vo Samária. 5Oco weya ko Sukare, imbo limue lio ko Samária lia kala ocipepi lusenge Yakoba a ecele komõlaye Yosefe. 6Ocisimo ca Yakoba haiko ca kala. Oco yesu, omo a kava lungende waye, wa tumala pocisimo. Ca soka ndola yepandu.

7Kuenje ukãi umue u Samária weya oku tapa ovava. Yesu wa popia laye hati, Nyiheko ovava oku nyua. 8Momo olondonge viaye via ka landa okulia vimbo. 9Ukãi u Samária wa popia laye hati, Ove u Yudea o minga ndati ovava oku nyua, ame ndukãi u Samária? Momo va Yudea ka va likile la va Samária. 10Yesu wo kumbulula hati, Nda wa kũlĩhile ocali ca Suku kuenda u o popia love hati, Nyiheko ovava oku nyua, nda wo pingile, kuenje eye nda wa ku iha ovava omuenyo. 11Ukãi wa popia laye hati, A Ñala, ku kuete ociyenjo, kuenda ocisimo ca tonga. Upa pi ovava aco omuenyo? 12Anga, ove wa velapo, okuti kukululu yetu Yakoba o sule? Eye wa tu iha ocisimo, kuenje wa nyuako eye muẽle lomãla vaye lovinyama viaye. 13Yesu wo kumbulula hati, Wosi o nyua kovava a, o yeva vali enyona, 14puãi u wosi o nyua kovava ndu wiha ka yevi vali enyona oloneke ka vi pui. Puãi ovava ndu wiha o lingila vokati kaye ono yovava yi tombokaila omuenyo ko pui. 15Ukãi wa Popia laye hati, A Ñala, nyiheko ovava aco, oco si ka yeve vali enyona pamue oku iyaiya vali kulo oku tapa.

16Yesu wa popia laye hati, Kuende, ka pãninye veyove, oco wiye vali kulo. 17Ukãi wo kumbulula hati, Si kuete veyange. Yesu wa popia laye hati, Wa popia ciwa huti, Si kuete veyange. 18Momo wa kaile lalume vatãlo, kuenje u o kasi laye cilo haveyoveko. Eci wa popia, ocili. 19Ukãi wa popia laye hati, A Ñala, nda limbuka okuti vuprofeto. 20Vakukululu vetu va fendaila Suku vomunda eyi. Ene puãi vu linga hoti, Vo Yerusalãi omo mua sesamela omanu oku fendelelamo Suku. 21Yesu wa popia laye hati, Okãi, ñolele, ola yiya yokuti ka vu fendaila Isia, ndaño vomunda yilo, ndaño vo Yerusalãi. 22Ene vu fendela eci ka wa kũlĩhili, etu tu fendela eci tua kũlĩha, momo okupopelua ku tunda ku va Yudea. 23Puãi ola yiya, kuenda yeya ale okuti, vakuakufendela vocili va fendaila Isia vespiritu locili, momo omanu ndovo ovo Isia a sanda oku u fendela. 24Suku Espiritu kuenje ca sesamela ava vo fendaila oku u fendela lespiritu locili. 25Ukãi wa popia laye hati, Ndi ci okuti Mesiya, una wa tukuiwa Kristu, iya. Eci eya o tu sapuila ovina viosi. 26Yesu wa popia laye hati, Ame muẽle ñasi loku popia ndeti love.

27Haico olondonge viaye vieya. Va komoha ndomo a kala loku vangula lukãi, puai lomue wo pula hati, O yongola nye? pamue, Nye o vanguila laye? 28Oco ukãi wa sia ombia yu wa enda vimbo, kuenje wa popia lomanu hati, 29Ota, enjui. Ndo tali ulume wa sapuila ovina viosi nda linga. Mbi pamue eye Kristu? 30Oco va tunda vimbo oku iya kokuaye.

31Osimbu yaco olondonge vio peya, viti, A Rambei, lia. 32Puãi eye wa popia lavo hati, Ñuete ale okulia kumue, ene puãi, okulia kuaco ka vu kui. 33Oco olondonge via livangula pokati, viti, Umue mbi wo nenela okulia, ale? 34Yesu wa popia lavo hati, Okulia kuange oku linga ocipango cu wa numa kuenda oku suisapo upange waye. 35Ene, ka vu popia popia hẽ, hoti, Kua kamba olosãi vikuãla oco kuiya oku ungula? Ame ndu sapuili siti, Petuli ovaso ene. Vanji kovapia okuti a yelela ale oku ungula. 36U ungula o tambula ofeto, kuenje ungula epako liokomuenyo ko pui. Oco u imba ombuto, lu ungula, va yolelela kumuamue. 37Oco olusapo luokuti, Umue imba ombuto, ukuavo ungula, lua linga luocili. 38Ndo tumi oku ungula eci ka wa kaveleli. Vakuavo va linga upange, kuenje ene wa iñilili vupange wavo.

39Va Samária va lua vakuimbo liaco vo tavela ondaka yukãi wa imba uvangi, hati, Wa sapuila ovina viosi nda linga. 40Oco, eci va Samária veya kokuaye, vo peya oku kala lavo handi. Yu wa kalako oloneke vivali. 41Kuenje va lua vakuavo va tava omo va yeva ondaka yaye. 42Oco va popia lukãi vati, Cilo ka tua tavelelele ño olondaka viove, momo tua liyevela etu muẽle, kuenje tua limbuka okuti ocili eye Upopeli woluali.

43Oco, eci pa pita oloneke viaco vivali, Yesu wa enda ko Galilea. 44Momo Yesu eye muẽle wa imba uvangi hati, Uprofeto ka sangi esumbilo vofeka yavo muẽle. 45Oco, eci eya ko Galilea, va Galilea vo hindikisa omo va mola ovina viosi a linga vo Yerusalãi kotembo yofesta, momo lavovo va ilevo.

46Yesu weya vali ko Kana ko vo Galilea, kuna a pongoluisile ovava yu a linga ovinyu. Kuenje ko Kafarinau kua kala umue ukulu wovelombe, omõlaye ulume o vela. 47Eci a yeva okuti Yesu wa tunda ko Yudea kuenje wa iñila vo Galilea, oco wa enda kokuaye, wa pinga okuti iya o sakula omõlaye, momo o yongola oku fa. 48Oco Yesu wa popia laye, hati, Ene ka vu tava te nda vu mola ovilimbu lovikomo. 49Ukulu wovelombe wa popia laye hati, A Ñala, enju osimbu omõlange ka file. 50Yesu wa popia laye, hati, Kuende, omõlove o kasi lomuenyo. Omunu waco wa kolela ondaka Yesu a popia laye, oco wa enda. 51Eci a kala loku enda akuenje vaye va ñualehela laye vati, Omõlove o kasi lomuenyo. 52Oco a va pula ola a fetika oku kaya. Vo sapuila vati, Hẽla, kola yepanduvali, oco owuya wo weca. 53Oco isiaco wa ci limbuka okuti ola yaco haiyo Yesu a popia laye hati, Omõlove o kasi lomuenyo. Oco eye muẽle wa tava lonjo yaye yosi. 54Eci oco ocilimbu cavali Yesu a linga eci a tunda vo Yudea kuenje weya vo Galilea.

Currently Selected:

YOANO 4: EMB63

Highlight

Copy