YOANO 20

1Keteke lia tete kosimanu, kociteketeke, okuti owelema haiko u li, Maria u Magadala weya keleva, kuenje wa mola okuti ewe keleva liopiwako ale. 2Oco wa lupuka, kuenje weya ku Simono Petulu kuenda kondonge yikuavo yina Yesu a sole, yu wa popia lavo hati, Ñala veleva va vupamo, ka tu iko oko vo kapa. 3Oco Petulu wa tunda kuenda ondonge yikuavo, yu va loña keyambo. 4Kavali kavo va lupukila kumuamue, ondonge yikuavo puãi ya pitahala Petulu, kuenje ya tetekela keleva. 5Oku petama, ya lengelelamo, yu ya mola olonanga viovalatanya vi kasi posi, puãi ka ya iñililemo. 6Oco Simono Petulu wo kuama, weyavo kuenje eye wa iñila veleva. Wa mola olonanga viovalatanya vi kasi posi, 7kuenda etuaya lia kaile kutue waye ka lia kaile lolonanga viovalatanya, puãi lia likaila lika lialio, lia iñiwa. 8Oco ondonge yikuavo, yina ya tetekela keleva, ya iñilavo, ya ci limuila oyo muẽle, kuenje ya kolela. 9Momo ocisonehua cina ca popia citi, O pinduka ku vakualufa, ka ca va lombolokele handi. 10Oco olondonge via tunda, via enda kolonjo viavo.

11Maria puãi wa kala ño peleva loku lila. Oco, osimbu a lila, wa petama, wa lengelela veleva. 12Yu wa mola ovangelo vavali va wala ci yela kuenje va tumala umue kovitue, ukuavo kovolu, oko kua kaile ocivimbi caco. 13Vo pula vati, Okãi, o lilila nye? Eye wa va kumbulula, hati, Momo vopamo Ñala yange, kuenje oko vo kapa siko. 14Eci a ci popia oco wa ñualapo, kuenje wa mola Yesu wa talama puãi ka kũlĩhile okuti eye Yesu. 15Yesu wa popia laye hati, Okãi, o lilila nye? O sanda elie? Maria wa soka hati, ukuacumbo, oco wa popia laye hati, A kuku, nda wo tuala kumue, sapuile oko wo kapa, oco ndu vupeko. 16Yesu wa popia laye hati, A Maria! Maria wa ñualapo kuenje wa popia laye velimi lia Heveru, hati, A Ramboni, ca lomboloka Olongisi. 17Yesu wa popia laye hati, Ku ka ndambe momo sia londele handi ku Tate. Puãi kuende ku vamanji, ka popie lavo, huti, Ñala hati, Ndonda ku Tate kuenda ku Isiene, ndonda ku Suku yange kuenda ku Suku yene. 18Maria u Magadala wa ka sapuila olondonge, hati, Nda mola Ñala, yu wa popia lame olondaka evi.

19Koñolosi yeteke liaco, hailio eteke liatete kosimanu, osimbu apito a yikiwilua usumba wa va Yudea, oco Yesu weya vohondo omu olondonge via kala. Wa talama pokati kavo, yu wa popia lavo hati, Ombembua yi kale lene. 20Eci a ci popia wa va lekisa ovaka aye lepati liaye. Oco olondonge via yolela eci via mola Ñala. 21Yesu wa popia vali lavo hati, Ombembua yi kale lene. Ndeci Isia a numa haico ndu tumi. 22Eci a ci popia wa va fuimila, yu wa popia lavo hati, Tambuli Espiritu Sandu. 23Nda ene weceli omunu akandu aye, a wecelua, nda ene vu likala oku u wecela, ka a wecelua.

24Tomasi, umue pekui la vavali, haeye wa tukuiwa Njamba, ka kaile kumue lavo eci Yesu eya. 25Oco olondonge vikuavo vio sapuila viti, Ñala, tuo mola. Eye puãi wa popia lavo hati, Nda sia muile ovimbo violopeleko povaka aye, loku lamba omuine wange povimbo violopeleko viaco, loku kapa eka liange pepati liaye, si kolela.

26Eci pa pita oloneke ecelãla olondonge viaye via kala vali vonjo, kuenje Tomasi wa kala kumue lavo. Apito a yikiwa, puãi Yesu weya, wa talama pokati kavo, kuenje wa popia hati, Ombembua yi kale lene. 27Oco, wa popia la Tomasi hati, Kapa apa omuine wove. Ndo tale ovaka ange. Olõla eka liove, li kapa pepati liange. Ku ka linge ndu ka kolelele, puãi kolela. 28Tomasi wo kumbulula hati, A Ñala yange, a Suku yange. 29Yesu wo pula hati, Wa tavela omo wa mola? Ava ka va muile puãi haimo va tava, ovo va sumũlũha.

30Yesu wa linga ovilimbu via lua vikuavo kovaso olondonge viaye, ovio ka via sonehiwile velivulu lilo. 31Puãi ovina evi via sonehiwila okuti vu kolela okuti Yesu eye Kristu, haeye Mõla a Suku, kuenje, omo wa koleli, oco vu muila omuenyo ko pui vonduko yaye.

Currently Selected:

YOANO 20: EMB63

Highlight

Copy