YOANO 14

1Ovitima viene ka vi ka tokotelue, koleli Suku, ñolelivo ame. 2Vimbo lia Tate muli olonjo via lua. Nda hacoko, nda ndo ci sapuilili, momo ngenda oku vu angiliyila ocitumalo. 3Kuenje eci ngenda oku vu angiliyila ocitumalo, njiya vali, ndu wupilili okuti oku ñasi, haiko vu kalavo. 4Oku ngenda wiko, lonjila yaco vu yi. 5Tomasi wo pula hati, A Ñala, oku wenda ka tu iko, oco onjila yaco tu yi kũlĩha ndati? 6Yesu wa popia laye hati, Ame ndinjila, haime ndicili, haime ndimuenyo. Lomue iya ku Isia, te lame. 7Ame, nda wa ñulĩhili, nda wa kũlĩhivo Tate. Tunde opo wo kũlĩhi kuenda wo moli.

8Filipu wa popia laye hati, A Ñala, tu lekise Isia, kuenje ci tu tẽla. 9Yesu wo pula hati, A Filipu, osimbu yosi eyi nda kala lene haimo ku nji? U wa mola ame haeye wa mola Isia, oco o popia ndati, huti, Tu lekise Isia? 10Kua kolelele hẽ okuti ame ñasi mu Isia, kuenje Isia o kasi vokuange? Olondaka evi mopia lene si vi popi locipango cange, puai Isia o kasi vokuange eye o lingainga upange waye. 11Ñoleli okuti ñasi mu Isia, kuenje Isia o kasi vokuange, nda hacoko, ñoleleli ovilinga ndingainga.

12Mopia lene siti, Ocili, ocili, u o ñolela, ovilinga ndingainga o vi lingavo, kuenda o linga ovilinga via velapo vali okuti evi vi sule, momo ame ngenda ku Isia. 13Kuenje cosi vu pingila vonduko yange ndi ci linga, okuti Isia o muisua ulamba ku Mõla. 14Nda vu pingila cimue vonduko yange ndi ci linga.

15Nda vu sole ame, pokoli kovihandeleko viange. 16Kuenje ndi pinga ku Isia okuti o wihi Oñuatisi yikuavo yi kala ño-o hũ lene. 17Eye Espiritu liocili, oluali ka lu tẽla oku u tambula momo ka lu lete, ka lu wi. Ene puãi vu wi, momo wa tunga lene, kuenda o kala vokati kene.

18Siu si olosiwe, njiya vali kokuene. 19Handi, okasimbu kaño oluali ka lu moli vali. Ene puãi vu mola. Omo ame ñasi lomuenyo, oco ene vu kalavo lomuenyo. 20Keteke liaco vu kũlĩha okuti ñasi mu Tate, lene vu kasi vokuange, kuenje ame ñasi vokuene. 21U o kuete ovihandeleko viange kuenje o vi lava eye o sole, lu o sole ame eye o soliwe la Tate, kuenje ndu solavo, loku limolehisa kokuaye. 22Yuda, puãi ha Yuda Isikariote ko, wo pula hati, A Ñala, ci kasi ndati okuti o limolehisa kokuetu, puãi koluali hakoko? 23Yesu wo kumbulula hati, Umue, nda o sole ame, o pokola kondaka yange, Tate u solavo, oco etu tuiya kokuaye kuenje tu tunga laye. 24U ka sole ame, ka pokola kondaka yange. Ondaka vu yevite hayangeko, puãi ya Isia wa numa.

25Ovina evi nda vi vanguila lene osimbu ñasi handi lene. 26Puãi Ñuatisi, haeye Espiritu Sandu, una Isia a tumila vonduko yange, eye u longisa ovina viosi, kuenda o wivaluisi ovina viosi nda popia lene. 27Ndu sili ombembua, ndu wihi ombembua yange, ndeci ci ihaiha oluali hacoko ndu wihi. Ovitima viene ka vi ka tokotelue, ka vi ka kale lusumba. 28Wa yevi eci nda popia lene siti, Ngenda kuenje njiya vali kokuene. Nda wa soleli, nda wa sanjukili omo ngenda ku Isia, momo Isia wa mbelapo, ame ndi sule. 29Cilo, ndo ci sapuili osimbu ka ca lingiwile, okuti, eci ci lingiwa, vu kolela. 30Si popi vali lene ca lua, momo ombiali yoluali lulo yi kasi loku iya. Eye ka kuete omoko lame. 31Puãi ame ndinga ndeci Isia a ñundika oco oluali lu limbuke okuti ame sole Isia. Votoki. Tu tundi mulo.

Currently Selected:

YOANO 14: EMB63

Highlight

Copy