OVILINGA 4

1Osimbu Petulu la Yoano va kala loku popia lomanu, ovitunda la kesongo lionembele, kuenda va Sandukeo, veya kokuavo. 2Ca va tatama omo va longisa omanu, kuenda va kunda vati, Kuli epinduko lia vakualufa omo Yesu wa pinduka. 3Oco, va va kuata kuenje va va kapa vokayike toke hẽla momo oñolosi ale. 4Puãi, va lua va yeva ondaka va tava, kuenje owiñi walume wa soka ndolohũlũkãi vitãlo.

5Hẽla yaco akulu, lolombuale, la vakuavisonehua, va liongoluila vo Yerusalãi, 6kumue locitunda cinene Anasi, kuenda Kayafa, la Yoano, la Alesandro, kuenda vosi va tiama kepata liocitunda cinene. 7Va talamisa Petulu la Yoano vokati kuenje va va pula vati, Eci hẽ, wa ci lingi lunene we, pamue vonduko yelie? 8Petulu we yuka Espiritu Sandu kuenje wa popia lavo hati, Ene akulu vomanu, lene alombuale, 9etaili, nda tu kasi loku sombisilua ocilinga cohenda tua linga ombei okuti ya sakuiwa, 10ci limbukiwe lene vosi, lomanu vosi va Isareli, okuti ulume u o tãi kovaso ene, o ñuai, momo wa sakuiwa vonduko ya Yesu Kristu u Nasara. Eye una ene wa valeli kekulusu, kuenje Suku wo pindula ku vakualufa. 11Eye, eye ewe lia takumuiwa lene, ene vulonungonjo, kuenje hailio lia linga utue wevindi. 12Omo vemi lilu ka muli onduko yikuavo ya eciwa komanu okuti tu popeliwa layo, oco epopelo kumue wiñi ka kuli.

13Eci va mola utõi wa Petulu la Yoano, leci va va limbuka okuti omanu vaño, haivo ka va longisiwile, oco va komoha, kuenje va limbuka okuti va kala la Yesu. 14Puãi eci va mola omunu wa sakuiwa o tãi kumue lavo, ka va tẽlele oku ci sapula. 15Haimo lumue, eci va va sapuila, vati, Tundi vonjango, oco va lipulapula pokati, vati, 16Tu linga nye lomanu ava? Momo ca moleha komanu vosi va tunga vo Yerusalãi okuti ocilimbu cinene ca lingiwa lavo, kuenje etu oku ci patãla, ka tu ci tẽla. 17Puãi, oku yuvula okuti ondaka eyi ka yi sandoka vali pokati komanu, oco tu va handeleka longusu tuti, Ka ci tava oku vangula vali lomunu vonduko yaco. 18Oco va va kovonga kuenje va va handeleka, vati, Ko ka kundi vali, ndaño oku longisa, vonduko ya Yesu. 19Petulu la Yoano puãi va va kumbulula vati, Nda esunga kovaso a Suku oku tava kokuene, okuti ku Suku hakoko, ci popi, ene muẽle. 20Momo etu, lacimue vali tu tẽla oku linga, te oku popia eci tua mola leci tua yeva. 21Eci va va longa vali va va eca, momo va kala lohele yomanu, lomo ka va sangele cimue cokuti va va ci yambuila. Momo omanu vosi va kala loku sivayaila Suku eci ca lingiwa. 22Momo ocilimbu coku sakula ca lingiwa komunu wa supisa akui akuãla kanyamo.

23Eci va eciwa va tiukila ku vakuavo, yu va va sapuila cosi ovitunda vinene lakulu va popia lavo. 24Ovo, eci va ci yeva, vosi va likutilila ku Suku lutima umuamue, vati, A Suku, a Cime cetu, ove wa lukila ilu, losi, lokalunga, lovina viosi vi kasimo, 25haive wa popia l'Espiritu Sandu lomẽla wukuenje wove Daviti, kukululu yetu, huti,

Olofeka hẽ, via yuelela nye?

Omanu vaco nye va sokoluila evi viesanda?

26Olosoma viokilu lieve via lipongiya.

Olombiali via tumbika ongombo

Ñala lombuavekua yaye,—

27momo ocili vimbo lilo, Herode, la Pondiu Pilato, kuenda vakualofeka, lomanu va Isareli, vongolokela Ukuenje wove o kola, okuti Yesu una ove wa waveka. 28Vongolokela oku tẽlisa cosi ca panga ale eka liove locipango cove. 29Kaliye a Ñala, limbuka ndomo va kasi loku seteka oku tu lingisa usumba, kuenje eca kakuenje vove utõi woku popia ondaka yove, 30osimbu ove o kasi loku oluĩla eka liove koku sakula loku linga ovilimbu lovikomo vonduko y'Ukuenje wove o kola, Yesu. 31Eci va likutilila, oco onjo, omu va likongela, ya lisenga. Vosi ve yukisua Espiritu Sandu, kuenje va popia ondaka ya Suku lutõi.

32Vosi va tava va kala lutima umuamue lomuenyo umuamue. Lomue wa tukula cimue covikuata viaye hati, Cange, puãi ovina viosi vati, Vietu. 33Ovapostolo va imbaimba uvangi wepinduko lia Ñala Yesu lunene wa lua. Ocali ca lua ca va wila vosi. 34Pokati kavo lomue wa kamba cimue, momo ava va kala lovapia pamue olonjo va vi landisa, veya londando yovina via landisiwa, 35kuenje va vi kapa polomãi viovapostolo, kuenje va liamowaila pokati, omunu omunu, ndeci a kamba. 36Oco Yosefe, ovapostolo vo tukula Barnaba, ya lomboloka Omõla elembeleko, eye u Lewi, haeye u Kupro, 37wa kala lepia, yu wa li landisa kuenje wa nena olombongo viaco, wa vi kapa polomãi viovapostolo.

Currently Selected:

OVILINGA 4: EMB63

Highlight

Copy