OVILINGA 3

1Petulu la Yoano va kala loku lamanela konembele kola yoku likutilila, ola yaco yatatu kekumbi. 2Oco, va sanga vamue vambata ulume umue wa kala ocilema tunde vimo lia inaye. Vo kapa kapa oloneke viosi pombundi yonembele, yina ya tukuiwa Mbundiyeposo, oku pinga osimola kuava va iñila vonembele. 3Kuenje eye, eci a mola Petulu la Yoano va iñila vonembele, wa va pinga osimola. 4Petulu, oku u vanja sui, kumue la Yoano, wa linga hati, Tu vanje. 5Oco, wa va imba ovaso, momo wa lavoka oku tambula cimue kokuavo. 6Puãi Petulu wa linga hati, Opalata lulu si kuete, puãi eci ñuete oco hu iha. Vonduko ya Yesu Kristu u Nasara, enda. 7Wo kuata peka liondio, wo votola, kuenje haico olomãi viaye lolongolongolo via kolisua. 8Oco wa katuka lonjanga, kuenje wa fetika oku enda. Wa iñila lavo vonembele. Wa enda loku teha teha loku somboaka kuenda oku sivaya Suku. 9Omanu vosi vo mola ndomo a kala loku enda lomo a sivaya Suku, 10kuenje vo limbuka okuti eye una wa tumalalaile oviali po Mbundiyeposo yonembele. Oco va lisalukako, kuenje va komoha ovina vio lingiwa.

11Osimbu ocilema ca kuatelela Petulu la Yoano, omanu vosi va va ongolokela vocindumba ca Salomone loku komoha ca lua. 12Eci Petulu a ci mola oco wa popia lomanu hati, Alume va Isareli, eci hẽ, wa ci komoheli nye? Nye vu tu vanjela etu, huti ño etu muẽle tua endisa omunu u lunene wetu pamue lokukola kuetu? 13Suku ya Avirahama la Isake kuenda Yakoba, haeye Suku yolosekulu vietu, eye wa ci lingila oku muisa Omõlaye Yesu ulamba. Omõlaco ene wo pakuli kuenje wo likaleli kovaso a Pilato, eci a pangele oku weca. 14Puãi ene wa likali U o kola, haeye Ukuesunga, kuenje wo pingi okuti ulume omondi eye u kutuluilui. 15Oco, ene wa ipayi usovoli womuenyo, Suku puãi wo pindula ku vakuavilangu. Eci, etu muẽle tua cimbila uvangi. 16Onduko yaye, kuenda oku kolela onduko yaco, oco ca pamisa undeti vu lete haeye wa kũlĩhi. Ekolelo lia eciwa la Yesu olio lia muisa ulume u uhayele wocili kovaso ene vosi.

17Kaliye akuetu, nda ci kũlĩha okuti wa ci lingi lapungunjumba ndeci ca linga vo akulu vene. 18Puãi, eci Suku a cimbila ale owanji limẽla viovaprofeto vaye vosi, cokuti Kristu waye o tala ohali, oco wa ci tẽlisa. 19Oco, likekembeli akandu ene. Pongoloki okuti akandu ene a ecelua, kuenda okuti kuiya oloneke viekavuluko vi tunda ku Suku. 20Pongoloki okuti o tuma Kristu una wo sokiyiwili okuti Yesu. 21Eye, ocili, o kala kilu toke koloneke vioku tumbulula ovina viosi via tukuiwila Suku lovimẽla viovaprofeto vaye va kola, tunde kosiahũlu. 22Mose wa linga hati, Ñala Suku, pokati ka vakuẽle, u katuilipo uprofeto ndame. Eye vu yevelela ovina viosi a popia lene. 23Kuenje ci kala okuti wosi ka yevelela uprofeto waco o nyolehela pe pokati komanu. 24Kuenje ovaprofeto vosi va popia, tunde ku Samuele, lava va kuamamo, va imbavo owanji woloneke vilo. 25Ene vumãla vovaprofeto, haene wakapiñala kohuminyo Suku a likuminya lolosekulu vietu eci a popia la Avirahama hati, Apata osi o kilu lieve a sumũlũhila kombuto yove. 26Suku wa katula Omõlaye kuenje wo tuma tete kokuene okuti, koku vu tinduisa kolohõle viene oko u sumuluisili vosi, omunu, omunu.

Currently Selected:

OVILINGA 3: EMB63

Highlight

Copy