Etatelu 49
49
Jakoba Ambutela Anʼandi Akambu Wayuyala le Wo
1Jakoba aketi anʼandi wʼapami tshe: akati ati: Nyusukani, nyuteli akambu wayuyala le nyu lu nshi yayayi.
2Nyusukani nyu ana apami wa Jakoba.
Nyulungi, nyuki aui wa shenyu Isariyele.
3Rubena, we keli onʼami lʼenundu.
We keli etatelu ka wulu ami.
We kakaminya ekumba;
we keli lu dihuli dia ladiku lu akambu wa
nemo ndu lu akambu a wulu.
4We ndjalaka numbululo; laso we
huyala lu dihuli dia ntundu,
Ne dia we aketama lu dihuli diatetamaka sho.
We akadilanya lamʼakayetama la wademi,
dimi sho.
5Simeyona la Lewi, weli ana wʼutema otoi.
Dihumo dia diesa dieko lu mvudu yawo.
6Utema ami totoki lu sheki yawo.
Nyuma kami tayalaki lʼului awo.
Uma lu kele kawo mbakawadiaki antu.
Ndu uma lu usihi awo,
mbakawahimbulaka waumi wa ngombe eshisha.
7Kele kawo kadjami mananu, ne dia
to kakayala wulu otekoya;
Ndu ududu awo, ne dia vo kema la ketshi.
Dimi layamamitula uma lu Jakoba.
Layadianganya lu Isariyele.
8Juda, ananyo wayukolemiaka.
Lunya laye layusukuya kotshi yʼatunyi aye.
Ana wa sho wayukukhusamelaka.
9Juda eli osongo a tambwe.
Onʼami, we ambukalula uma lu
nyama yakayadiaki.
Ndi atukhuseka adui, atuhulamaka uku tambwe,
uku tambwe ka wadi.
Ayuwemadia na?#49:9 Wal. 24:9; Eny. 5:5.
10Danga dia diulelu hadiumoki uma le Juda.
Kuyanga ukalimba a khumʼekanga
uma lʼatei ekulu andi,
Edja ndu lamʼayuya Shilo.
Wedja tshe wayukitanyiaka aui andi.
11Ndi ayukeleka punda kandi lʼokodi
wa vinyo,
Ndu ona punda kandi ka wadi lʼokodi
wuleki dimena.
Ndi nsulaka ahondo andi la wanu,
La koti diandi la ashi wʼelua wa tilili.
12Ashu andi wayeloka la wanu,
Ndu anyu andi wayuyalaka wema
lʼenwelo kʼawele.
13Zebuluna, ayudjaseka lʼumamu wʼashi
a waki.
Ndi ayudjaseka lʼumamu atetetaka mashua.
Ulelu andi ayukuma lu leke la Sidona.
14Isakara, eli punda ka wulu,
Katetamaka lʼatei wʼekutu.
15Ndi menaka ati: Dihuli diatumetamaka
ololo mbedio;
Ndu wudja ati: Dimena efula mbewo.
Ndu ndi atukututeka diheka diandi
dia memba wutshu.
Atukitanyiaka nfuta wudja.
16Dane, ayusambulaka akambu wʼasikandi,
Uku diuhu dimotshi lʼatei wa Isariyele.
17Dane ayuyala ului lu mbuka,
Tshula lu vuka ya tshitshe,
Diayulumataka sanga ya falasa,
Dia umbahemi ato nko ekalikali.
18We Latuyalaka, dimi lambulungamela
panda kaye.
19Ngada, atomboki wayukhunguswela.
Keli ndi ayakhunguswela ndu vo,
ayuyelana la wo.
20Ashere, ayuyalaka la mbu ya nde yʼololo.
Ndi ayuyalaka la mbu ya nde yuleki
ololo yatolekaka khumi ya dikanga.
21Nafetali, eli lufumbo lambutshungo.
Ndi nteketaka aui wʼamena efula.
22Josefu, eli lukuno lʼutamba a lumu
wuleki nto elua,
Lukuno lʼutamba wa nto elua lasuki lʼeteko.
Tahi yawo yatulaka etali,
ndekanaka lukumbu la ngelu.
23Ambuki wʼeta wakohenyahenyaka;
Vo wakawukaka pitu,
Watuyelaka, ne dia vo mbuhetshaka.
24Keli uta andi akatshikala wulu,
Ndu anya andi wakakikitala,
Uma lu lunya la Kanga Wulu la Jakoba
(uma lu lukumbu lʼulami, Dive dia
wuki dia Isariyele).
25Unyashungu a sho, ayukukimanyia,
Kanga-Wulu-Tshe, ayukotshokola
La etshoko wa la tshina diʼashi,
La etshoko wʼawele wa wali,
Ndu wa diwutshi.
26Etshoko ami, dime sho, wambediama
Ladiku diʼetshoko a wapapa,
Edja ndu ladiku dia ete wa akuna wa pundju.
Etshoko ene wayali lʼote wa Josefu,
Ladiku dia lufule la one leli uwandji wa anangu.
27Bendjamina, eli laundu latatshatshaka nyama,
La pindju ku ndi nde nyama kakandandji,
La dikolo ku ndi ndjukikaha.
Nyoi la Utanda wa Jakoba
28Aso tshe weli wauhu dikumi la ahendi wa Isariyele. Aui aso tshe mbakateketa shewo lamʼakandatshokolaka. Ndi akatshokola untu lʼuntu uku otshoko andi. 29Ndi akakokomiya ati: Dimi luyanga ntsho le wapapa, kanyutunkhunde lasuki la wumbu a wapapa, lu wuku weli lʼekambo ka Eferona, usi Hiti, 30lu wuku weli lʼekambo ka la Makipela kelanedi la Mamare, lu kete ya Kanana. To keli ekambo kakasumbi Abarahama uma le Eferona, usi Hiti, dia ndjala dihuli diʼekhundelu kʼasi khumbu kandi.#49:30 Etat. 23:3 20. 31Leko kakawakhunde Abarahama#49:31 Etat. 25:9 10. la wadendi Sara. Ndu leko kakawakhunde Isaka#49:31 Etat. 35:29. la wadendi Rebeka. Leko kakamakhunde ndu Lea. 32Ekambo la wuku weli loko wakasumbama uma le ana wa Hiti. 33Lamʼakashidiya Jakoba ndakana la anʼandi, ndi akakutula ekulu andi uya lu tangi, akakitshiya,#49:33 Etsh. 7:15. akatshu utsha le washi.
Currently Selected:
Etatelu 49: TLL
Highlight
Share
Copy
Want to have your highlights saved across all your devices? Sign up or sign in
La Bible en Otetela © Allianee Biblique de la Republique Democratique du Congo, 1991
