Etatelu 47

1Josefu akatshu, akatutela Farayo ati: Papa la analingu wambuya uma lu kete ya Kanana la dungalunga diawo ndu la diango diawo tshe. Kakiane vo wambukuma lu kete ya Ngoshena. 2Ndi akatshu la anangu atanu la ntuwaenya Farayo. 3Farayo akawambula ati: Ulimu akona watunyutshaka? Ku vo wakûkaluya diui vati: Shu ekambi aye, anungi wa dungalunga mbesu uku aki watshesu. 4Wakatela Farayo ntu vati: Tambuya dia ndjudjase lu kete yaye. Ndjala ka kasha kambotekoya mpangiya lu kete ya Kanana ku nduku adiyu wa ekambi aye ndesha dungalunga. Okone shu tambukolomba shati: Etawo dia shu, ekambi aye, mbidjase lu kete ya Ngoshena. 5Ku Farayo akatela Josefu ati: Sho la ananyo wambuya le ye. 6Kete yʼEdjibitu yeko la ntundu kaye. Osonwele sho la ananyo dihuli diuleki ololo dia vo mbidjase Kawo, wadjase lu kete ya Ngoshena. Ntu naka we mbeyaka amotshi uma lʼatei awo weya ulimu oso ololo, akitsha tupita tʼanungi wa dungalunga diami. 7Lʼokongo diku Josefu akayi la Jakoba, shi, akayuwenya Farayo. Ku Jakoba akatshokola Farayo. 8Farayo akambula Jakoba ati: We aya la deku dingana? 9Jakoba akûkaluya diui ati: Nshi ya lokendo lami yaya deku lukama la akumi asatu. Nshi yami yeki tshitshe ndu yo yaki too la akambu wa toshoko. Yo yatakuki lu yediko yaki kendo ya wapapa. 10Jakoba akatshokola Farayo ntu, ku ndi akamo uma la le ndi. 11Josefu akasha shi la anangu dihuli diuleki ololo lu kete yʼEdjibitu. Ku vo wakadjase lu wudja wa Ramese uku akati Farayo. 12Josefu akashaka shi la anangu la wa lu khumbu ka shi tshe mbu ya nde uku aki efula kʼana.

13Mbu ya nde nkutanema lu kete, ne dia ndjala ka kasha kaki wulu. Kete yʼEdjibitu la kete ya Kanana yakadienyi la ndjala ka kasha. 14Josefu akalungulaka falanga yaki lu kete yʼEdjibitu ndu lu kete ya Kanana yakawasumbaka mbu ya nde. Josefu akakitsha falanga sho lu luudu la Farayo. 15Lamʼakashili falanga lu kete yʼEdjibitu la lu kete ya Kanana, asi Edjibitu tshe wakatshu le Josefu; wakolombe vati: Utusha dia nde. Ukundi avosu la ndjala la ntundu kaye? Falanga yasu yambushila tshe. 16Ku Josefu akawatela ati: Naka falanga yambushila, nyukimo dungalunga dianyu. Ku dimi layengonya la nyu mbu ya nde la dungalunga dianyu. 17Vo wakelaka Josefu dungalunga diawo, ku ndi akengonyaka la wo mbu ya nde la falanga, la ekoko, ngombe ndu punda. Ndi akengonyaka la wo mbu ya nde la dungalunga diawo tshe eleku keso. 18Lamʼakashili eleku kako, vo wakatshu le Josefu lʼeleku kʼuyuyu; wakatuwutela vati: Shu hatushe dikambu ne le khumesu. Falanga yakashili, ndu dungalunga diasu diambukimwama tshe le khumesu. Nduku engo kambutshikala la ntundu ka khumesu, tshikima etundu asu la kete yasu. 19Ukundi avosu la ndjala la ntundu kaye ndu shu ndu kete yasu? Utusundja mbu ya nde la etundu asu la kete yasu. Ku shu tayuyala fumbi ya Farayo, la kete yasu yayuyala kete yandi pundju. Utusha wehu wa mune mbayututshikala la lumu, mbahatuvo, ndu mbahutshikala kete yasu aha la antu. 20Josefu akasumbela Farayo kete yʼEdjibitu tshe. Asi Edjibitu, untu lʼuntu akasundja ekambo kandi, ne dia ndjala ka kasha kakawaenya paa. Kete tshe yakayala kete ya Farayo hita. 21Ndi akasekola antu uma lu tusamba tʼEdjibitu tshe utsha lʼesumba wa lu beke diawo. 22Tshikima kete yʼelombedi tshu mbakindi kunsumba; ne dia elombedi wakayalaka la luhina la mbu ya nde uma le Farayo, okone vo wakalekaka luhina lawo lakawashaka Farayo. Diako mbakiwo kunsundja kete yawo. 23Ku Josefu akatela antu ati: Dimi lambushila nyusumbela Farayo elo, nyu la kete yanyu. Nyose wuhu, kanyune lu kete. 24Okone lu nshi ya dinela kanyushaki Farayo etenyi otoi ka tanu ka dinela dianyu. Keli tenyi nei dia tanu kadiuyalaki dianyu: wehu wa nyu mune, mbu ya nde yanyu, ya wa lu mvudu yanyu, ndu ya anʼanyu wa tshitshe. 25Vo wakawutela vati: We kambutuhandja, we khumesu, utuki ketshi, katuyali fumbi ya Farayo. 26Uma lu dikambu so mbakatshikala olembe wa Josefu dia nambulaka Farayo etenyi ka tanu ka dinela lu kete yʼEdjibitu edja ndu elo. Tshikima kete yʼelombedi tshu mbaki kundjala kete ya Farayo.

27Isariyele akadjase lu Edjibitu lu kete ya Ngoshena. Vo wakayala la diwutshi la ekundji efula, wakafulanela utamanya. 28Jakoba akadjase lu kete yʼEdjibitu deku dikumi la esambeli. Okone nshi ya lumu tshe ya Jakoba yaki deku lukama akumi anei la esambeli. 29Lamʼakasukana nshi ya Isariyele mvo, ndi aketi onʼandi Josefu, akosengasenga ati: Naka we mbukakami ngandji, udji lunya laye la tshina diʼehelohelo kami. Kuntsheli akambu wa ketshi la wa mete. Tunkhundeki lu kete yʼEdjibitu.#47:29 Etat. 49:29 32; 50:6. 30Keli lamʼayumutsho le wapapa, kutundja udu ami uma lʼEdjibitu, kutunkhunde lʼatei a waumbu a wapapa. Ku Josefu akulaki ati: Dimi layukutshela uku diui diaye. 31Ku Isariyele akawutela ati: Untshibeli; ku Josefu akutshibela. Lʼokongo diku, Isariyele akekama lu weko la tangi kandi.

Currently Selected:

Etatelu 47: TLL

Highlight

Copy