Etatelu 40

Josefu Ambulimbitshiya Asi Lukanu Alo Awo

1Lʼokongo a nshi motshi kapita kʼamangudi a wanu wa khumʼekanga kʼEdjibitu la kapita kʼekatshi andi wa ma wakanyangia khumewo, khumʼekanga kʼEdjibitu. 2Ku Farayo akuki tupita tandi tuhendi tako kele, kapita kʼamangudi a wanu la kapita kʼekatshi wa ma. 3Ndi akawadji lu lukanu, lu luudu lʼulami, lu dihuli diakadjaseka Josefu. 4Ku ulami a lukanu akakimo le Josefu dia ndi mbalama, ku Josefu akakimanyiaka ololo. Vo wakatshikala nshi motshi lu lukanu. 5Umangudi a wanu la ukatshi wa ma wa khumʼekanga kʼEdjibitu wakenyi alo lʼutshu wame lamʼakiwo lu lukanu. Untu lʼuntu akenyi do diaki la kitshimudi yadio. 6Lamʼakoto Josefu le wo la pindju, ndi akatani la ulingulingu. 7Ndi akambula tupita ta Farayo taki la ndi lu lukanu la khumʼekanga ati: Kambunyutshutshumala elo na? 8Ku vo wakawutela vati: Shu takenyi alo, keli hatenyi untu latulimbitshiya kitshimudi yawo. Josefu akawambula ati: Aha elimbitshiyelu le Unyashungu keto? Dimi lambunyosengasenga nti: Nyunsakweli alo anyu.

9Ku kapita kʼamangudi a wanu akasakwela Josefu do diandi ati: Lu do diami, dimi lakenyi okodi wʼelua la ntundu kami. 10Okodi ako aki la tahi shatu yakato ehundu. Ehundu ako wakayombola esudumba waki la elua wʼetshundju; ku elua ako akele. 11Dikoho dia Farayo diaki lu lunya lami. Dimi lakakudi elua emotshi, lakamudi ashi awo lu dikoho dia Farayo, ku lakasha Farayo dikoho diako. 12Ku Josefu akawutela ati: Kitshimudi ya do diaye nye: tahi shatu yeli nshi shatu. 13Lamʼayeta nshi shatu, Farayo ayukutundja uma lu lukanu, ayukukaluya lʼulimu aye. Okone we ayushaka Farayo dikoho diandi uku akayawushaka nshi kina. 14Keli dimi lambukosengasenga nti: Kumbuho lamʼayuyuyala la ongenongeno, kumbuki ketshi. Konteketele le Farayo, keli kantundja uma lu luudu la lukanu lone. 15Dimi lakandama uma lu kete yʼasi Heberu, la dimi kuntsha nduku dikambu dia mboto lu lukanu lindu.

16Lamʼakenyi kapita kʼekatshi ati: Kitshimudi ya do dia unyami yaki ololo, ndu ndi akasakwela Josefu do diandi ati: Lu do diami, dimi lakenaki lemba asaka asatu wa ma dia wema lʼote ami. 17Lu saka diakahemi ladiku kaki wehu tshe a wama wa lufumba wa Farayo. Ku fudu yaki lu dile ladiku diʼote ami. 18Josefu akawutela ati: Kitshimudi ya do diaye nye. Asaka asatu ako weli nshi shatu. 19Lamʼayeta nshi shatu, Farayo ayukutundja uma lu lukanu, ayukuhane lʼutamba. Ku fudu yayuhatula emunyi aye. 20Lushi la satu, laki lushi lʼeutwelu ka Farayo. Okone ndi akakatela ekambi andi tshe dambu. Ndi akatundja kapita kʼamangudi a wanu la kapita kʼekatshi wa ma uma lu lukanu, akawaeme la ntundu kʼekambi andi. 21Ku ndi akakaluya kapita kʼamangudi lʼulimu andi. Okone ndi akasha Farayo dikoho diandi uku akandawushaka. 22Keli ndi akahane kapita kʼekatshi lʼutamba. Akambu aso wakatshama pupu le wo uku akalimbitshiya Josefu alo awo. 23Keli kapita kʼamangudi a wanu kunkana dia Josefu ntu, akatuwuhela.

Currently Selected:

Etatelu 40: TLL

Highlight

Copy