Etatelu 39

Josefu la Wadi a Potifara

1Asi Ishamele wakakumi la Josefu lʼEdjibitu. Ku Potifara usi Edjibitu, olombodi wʼalimbi wa Farayo, akusumbi uma le wo. 2Latuyalaka aki la Josefu,#39:2 Etsh. 7:9. ku diese diakatuyelaka. Ndi akakambaka ulimu lu luudu la khumendi, usi Edjibitu. 3Khumendi akenyi ati: Latuyalaka eko la ndi, ndu atongonyaka akambu tshe watundutshaka. 4Ku Josefu akahumo lukulu lʼolo le khumendi lakandakambelaka ulimu. Ku khumendi akukitsha ulami a luudu landi ndu wa diango tshe diaki la ndi. 5Uma lʼetena kakandukitsha ulami a luudu ndu wa diango diandi tshe, Latuyalaka akatshokola luudu la usi Edjibitu dikambu dia Josefu. Mete, otshoko wa Latuyalaka wakayala lu diango tshe diaki la ndi, lu luudu ndu lu dikambo. 6Usi Edjibitu ako akakitsha diango diandi tshe lʼanya wa Josefu. Ndi ndame akanya tukanyi tandi lu diango diandi tshe, tshikima ma diakandalekaka. Josefu aki la diema diʼololo la dimba dia dimena.

7Lʼokongo diku wadi a khumi a Josefu akakomiya Josefu; akaweti ati: Yaka, yetami la mi. 8Keli ndi akaseke; akatela wadi a khumendi ati: We henyi, khumemi heyi efula ka diango diandi dieli lu luudu. Ndi akakimo diango tshe lu anya ami. 9Aha ndame kundeki wuki lu luudu lone? Ndi hanshimbi nduku engo, tshikima we, ne dia we eko wadendi. Ukundi ukukimi ntsha munga kene ka wuki, la ntshela Unyashungu kolo? 10Kuyanga mbakandasengasengaka Josefu la lushi la lushi, ndi kumbetawo mbeyana la ndi, kana ndjala kame la ndi. 11Ku lushi lomotshi ndi akoto lu luudu dia ntsha ulimu andi. Lʼetena keso nduku pami kekina kaki loko. 12Ku wadi a khumendi akukimela lu dihondo, ata ati: Yaka tetami! Keli Josefu akatshiki dihondo lu anya andi, akalawo lʼandja. 13Ku lamʼakenyi umuntu ati: Ndi ambutatshiki dihondo diandi lu anya ami, ambundawo, 14ndi aketi ekambi wʼapami wa lu luudu; akawatela ati: Nyu hanyenyi, umemi akatela usi Heberu one, dia ndjutonyola. Ndi akayi le mi, dia ndjetama la mi, keli dimi lakahangwehangwe la diui dia wulu. 15Lamʼakandambuki dimi lambuhangohango, ndi akatatshiki dihondo diandi ne lasuki la mi, akalawi lʼandja. 16Ndi akakitsha dihondo dia Josefu lasuki la ndi edja ndu lamʼakakalula khumemi lu luudu. 17Ndi akawutela aui ane ati: Fumbi kaye kʼusi Heberu, lakayatela, akayi dia ndjokenya la mi. 18Keli lamʼakamahangwehangwe, ndi akatshiki dihondo diandi lasuki la mi, ku ndi akalawi lʼandja.

19Lamʼakuki Potifara aui waki wadendi lu mbutela ati: We henyi wuhu wakantshedi fumbi kaye! Ndi akadunganela la kele. 20Khumi a Josefu akawundi, akawundji lu lukanu, lene akawadihaka asi lukanu wa khumʼekanga. Ndi akatshikala loko. 21Keli Latuyalaka aki la Josefu,#39:21 Etsh. 7:9. akawukaka ketshi, akuhumuya lukulu lʼolo le ulami a lukanu. 22Ulami a lukanu akadji Josefu kapita kʼasi lukanu tshe. Nduku dikambu diakatshamaka tshikima uma le ndi. 23Ulami a lukanu kundjala la ukandukandu lu diango diakalamaka Josefu, ne dia Latuyalaka aki la ndi, ndu akaluwanyaka akambu tshe wakandatshaka.

Currently Selected:

Etatelu 39: TLL

Highlight

Copy