Etatelu 21

Eutwelu ka Isaka

1Latuyalaka akuho diui diakandatela Sara. Okone ndi akashidiya daka diakandulaki. 2Sara akatshu diemi,#21:2 Heb. 11:11. akutela Abarahama ona pami lu nshi yandi yʼusumbi, lʼetena kakulaki Unyashungu lamʼakandasawulaka la ndi. 3Abarahama akole ona pami lakanduti la Sara ati: Isaka. 4Lamʼakayala Isaka nshi enanei, Abarahama akawahemia uhekeli#21:4 Etat. 17:12; Etsh. 7:8. uku akawudjangela Unyashungu. 5Abarahama aki la deku lukama lamʼakanduti Isaka. 6Sara akati ntu ati: Unyashungu ambombodia. Okone untu tshe layuka dikambu ne ayola kame la mi. 7Na untu uteya mvutela Abarahama ati: Sara ukolomia ona? Ku kakiane lambuwutela ona pami lu nshi yandi yʼusumbi.

Wambutshanya Hangara la Ishamele

8Onʼawo Isaka akuli, akakili awele. Ku lushi lakandakili awele, Abarahama akakati dambu dia wuki. 9Sara akenyi ona lakuti Hangara, usi Edjibitu, la Abarahama awola. 10Ku ndi akatela Abarahama ati: Utshanya ukambi aye a umuntu one kame la onʼandi. Ona one atukuyala ukito kame la onʼami Isaka.#21:10 Ngal. 4:29-30. 11Diui so dia Abarahama nkimo onʼandi Ishamele diakawusha lunyangu la wulu lʼutema andi. 12Keli Unyashungu akatela Abarahama ati: Tunyangaki dikambu dia onʼayc Ishamele, kana dia ukambi aya a umuntu. Etawo tshe kakakutedi Sara, ne dia uma le Isaka kayutumba tukanula taye ta mete, mete.#21:12 Rom. 9:7; Heb. 11:18. 13Dimi layete ndu ona ukambi aye a umuntu wudja a wuki, ne dia ndu ndi keli onʼaye. 14Okone Abarahama aketo la kesekese, akela Hangara ma la uhundi wʼashi, akawahewo lu diheka. Ndi akawusha ndu ona, akawunyiya. Hangara akunela, akatekekoka lʼusui wa shenga wa la Bere-Sheba. 15Ashi waki lʼuhundi wakashili. Ku ndi akatshiki ona lu dedi dia tshambatamba motshi. 16Ndi akatudjase elanedi la ndi tshalula yukuki untu mbuka luhitu; ne dia ndi akati ati: Dimi halangi mena lamʼavo ona. Ku kamʼakandadjashi elanedi la ona, ona akatundo la delu, akaleli. 17Unyashungu akuki diui dia ona. Ku ondjelo a Unyashungu aketi Hangara uma lʼulungu, akawumbula ati: Hangara, kanyangaye na? Tukaki woma, ne dia Unyashungu akuki diui dia ona lu dihuli diendi. 18Emala, unyiya ona, ukimeli lu lunya, ne dia dimi layuwete wudja a wuki. 19Unyashungu akudihula ashu, ku ndi akenyi eteko kʼashi, akaludia uhundi too, akanosha ona ashi. 20Lamʼakatulaka ona, Unyashungu aki kame la ndi. Ndi akatudjase lʼusui wa shenga, akatuyala minginga kʼuta. 21Ndi akatudjase lʼusui wa shenga wa Parana. Ku nyangu akatuwosela wadi uma lu kete ya Edjibitu.

Elakanelu ka Abarahama la Abimeleke

22Lu etena kakatengolaka Abimeleke#21:22 Etat. 26:26. la Fikole, olombodi a limba landi lʼalimbi, ndi akayutela Abarahama ati: Unyashungu eli la ye lu akambu tshe watuyutshaka. 23Untshibeli lu lukumbu la Unyashungu wati: Dimi hankukesaki, we, ndu anʼaye ndu ekana aye. Uku akamakutshelaka la memakana, okone mbayuyuntshelaka dimi la kete yudjashiye. 24Abarahama akati ati: Osoku mbayangami nkutshibela. 25Ku Abarahama akenya Abimeleke munga kʼekambi andi kakawohotola eteko kʼashi la wulu. 26Abimeleke akûkaluya diui ati: Dimi haleyi untu lakatshi dikambu diako. Ndu we kumvuielami, tshikima elo kambumudiuka. 27Okone Abarahama akandi ekoko la ngombe, akasha Abimeleke, ku vo ahendi wakakotsha lusalu. 28Abarahama akose esongo wʼekoko esambeli, akekitsha amʼakina. 29Ku Abimeleke akawumbula ati: Ukundi ambuyukitsha esongo wʼekoko esambeli amʼakina na? 30Abarahama akûkaluya diui ati: Etawo nungula esongo wʼekoko esambeli ene uma lu anya ami. Dikambu ne diayali omenyi ami ati: Dimi lakatshimi eteko kako. 31Uma lu dikambu so mbakandole dihuli diako ati: Bere-Sheba, ne dia laawo kakawatshibanela. 32Osoku mbakawalakana la Bere-Sheba. Abimeleke akunela, ndi la Fikole, olombodi a limba landi lʼalimbi, ku vo wakakalula utsha lu kete ya Filistiya. 33Abarahama akune uvungu la Bere-Sheba. Laawo kandatemolaka lukumbu la Latuyalaka, Unyashungu a pundju. 34Ku Abarahama akadjase nshi kambi lu kete yʼasi Filistiya.

Currently Selected:

Etatelu 21: TLL

Highlight

Copy