Etatelu 11

Luudu l Etangelu

1Antu tshe wa la kete waki la oteketa wame ndu aui wuhu otoi. 2Lamʼakawatatshokaka utsha lene atehutoka unya, vo wakatushula usui lu kete ya Shinare, ku vo wakatudjase loko. 3Vo wakatanela vati: Nyeso, tutshi atafadi, tatshumbi ololo. Atafadi ako wakakiti dihuli dia ave lʼulimu awo. Vo waki la nombe lu dihuli dia potopoto. 4Ku vo wakati ntu vati: Tuyahikeli usumba, ndu luudu lʼetangelu layukuma ote alo pulu ndu lʼulungu. Tuyali la lukumu, tutukudiangana la kete tshe. 5Ku Latuyalaka akahulo dia ndjende usumba ako la luudu lʼetangelu lakahiki antu. 6Ndi akati ati: Mete, antu ane weko wudja otoi, ndu vo tshe nteketaka oteketa wame. Lamʼatatelawo ntsha okone, nduku dikambu diayeya mbashimba lu akambu wayuwusanguya ntsha. 7Tutshu, tuhulo, tutufutanya oteketa awo, vo watukukana lamʼateketawo. 8Osoku Latuyalaka akadianganya etali lu beke tshe dia kete, ku vo wakakimo mpika usumba ako. 9Lu dikambu diako mbakawole usumba ako vati: Babele (kitshimudi ati: Nfutanya), ne dia uma laawo mbakafutanya Latuyalaka oteketa wakawateketaka lu kete tshe. Ndu uma leko kakadianganya Latuyalaka lu kete tshe.

Tukanula ta Sheme

(1 Ek. 1:24-27)

10Tukanula ta Sheme tone: Deku pendi lʼokongo wʼelula lamʼakayala Sheme la deku lukama, ndi akuti Arapakeshade. 11Sheme akalumbi deku kama tshanu lʼokongo wʼeutwelu ka Arapakeshade. Ndi akuti ana apami la ana amantu.

12Lamʼaki Arapakeshade la deku akumi asatu la tanu, ndi akuti Shela. 13Arapakeshade akalumbi deku kama nyei la satu lʼokongo wʼeutwelu ka Shela. Ndi akuti ana apami la ana amantu.

14Lamʼaki Shela la deku akumi asatu, ndi akuti Ebere. 15Shela akalumbi deku kama nyei la satu lʼokongo wʼeutwelu ka Ebere. Ndi akuti ana apami la ana amantu. 16Lamʼaki Ebere la deku akumi asatu la nei, ndi akuti Pelenge. 17Ebere akalumbi deku kama nyei la akumi asatu lʼokongo wʼeutwelu ka Pelenge. Ndi akuti ana apami la ana amantu.

18Lamʼaki Pelenge la deku akumi asatu, ndi akuti Reu. 19Pelenge akalumbi deku kama hyendi la divwa lʼokongo wʼeutwelu ka Reu. Ndi akuti ana apami la ana amantu.

20Lamʼaki Reu la deku akumi asatu la pendi, ndi akuti Serunge. 21Reu akalumbi deku kama hyendi la esambeli lʼokongo wʼeutwelu ka Serunge. Ndi akuti ana apami la ana amantu.

22Lamʼaki Serunge la deku akumi asatu, ndi akuti Nahora. 23Serunge akalumbi deku kama hyendi lʼokongo wʼeutwelu ka Nahora. Ndi akuti ana apami la ana amantu.

24Lamʼaki Nahora la deku akumi ahendi la divwa, ndi akuti Tera. 25Nahora akalumbi deku lukama la dikumi la divwa lʼokongo wʼeutwelu ka Tera. Ndi akuti ana apami la ana amantu.

26Lamʼaki Tera la deku akumi esambeli, ndi akuti Abarama, Nahora, la Harana.

Tukanula ta Tera

27Tukanula ta Tera tone: Tera akuti Abarama, Nahora, la Harana. Harana akuti Lota. 28Harana akavu lu kete ya Ura ka la Kaladiya, lene akanduto, ku shi eki la lumu. 29Abarama la Nahora wakatshuki wadi. Lukumbu la wadi Abarama laki la Sarai; la lukumbu la wadi Nahora laki Milika, ona aki Harana. Harana akuti Milika ndu Isika. 30Sarai aki ekumba, ndi taki la ona. 31Tera akunela, ndi la onʼandi Abarama, la ukana andi Lota, onʼa Harana, ndu la Sarai wadi onʼandi Abarama. Vo wakunela kame uma la Ura ka la Kaladiya utsha lu kete ya Kanana. Vo wakatukuma la Harana, wakatukutudjase leko. 32Nshi ya lumu tshe ya Tera yaki deku kama hyendi la tanu. Ku ndi akavu leko, la Harana.

Currently Selected:

Etatelu 11: TLL

Highlight

Copy