Etumbelu 26

Etemwelo ka Dipema

(Etum. 36:8-38)

1Dikambu dikina, kutshi peli dia etemwelo ka dipema lʼapema dikumi. Kutshi apema ako la eshinga wa linene wʼololo wʼedima, wʼengingi, la wa tilili. Kutshi akeruba la lononga loko. 2Utali wa dipema la dipema kawuyali kubita akumi ahendi la enanei, la wuki wa dipema la dipema kubita nyei. Apema tshe kawuyali yediko otoi. 3Kusamanya apema atanu kame, la apema atanu akina kame. 4Kutshi ehanga wʼedima lʼumamu wa dipema diayukumela lu esamanyelu ka ntundu. Kutshi pupu ndu lu dipema diayukumela lu esamanyelu ka hendi. 5Kudji ehanga akumi atanu lu dipema diayukumela lu esamanyelu ka ntundu, la ehanga akumi atanu lʼumamu wa dipema diayukumela lu esamanyelu ka hendi. Ehanga wʼapema kawelaneli pupu. 6Kutshi ashingu akumi atanu wa paunyi. Kusamanya apema ako ahendi lʼashingu, ku etemwelo ka dipema tshe kayuyala dipema otoi.

7Kutshi ndu apema wa diosa dia mbudi dia nkumba etemwelo ka dipema. Apema dikumi lʼotoi mbayuyutsha. 8Utali wa dipema la dipema kawuyali kubita akumi asatu, la wuki wa dipema la dipema kawuyali kubita nyei. Apema ako dikumi la otoi kawuyali yediko otoi. 9Kusamanya apema atanu laandi, la apema akina asamalu laandi. Kahanya etshi ka samalu ka dipema la ntundu ka luudu. 10Kudji ehanga akumi atanu lʼumamu wa dipema diayukume lu esamanyelu ka ntundu, ndu ehanga akumi atanu lʼumamu wa dipema diayukume lu esamanyelu ka hendi.

11Kutshi ashingu akumi atanu wʼehotela. Kuwaotshiya lʼehanga, kusamanya dipema, dia dio tshe ndjala otoi. 12Etenyi otoi ka hendi ka etshi ka dipema kutshikadi, kayolendalendaka lʼokongo a etemwelo ka dipema. 13Okone etshi ka kubita otoi lu wuki, ndu keli la utali uku apema kayuyala leke lomotshi, la kekina leke lukina. Dio diayahema wedi ako ehendi wa etemwelo ka dipema dia nkikumba. 14Kutshi ufelu wa dikuhu dia waumi wʼekoko diakawanya lu dangi dia tilili, la dikuhu dia mbudi ladiku dia luudu la dipema.

15Kutshi abaya wʼutamba wʼulungu ne dia etemwelo ka dipema. Kuwahiki wemema. 16Utali wa dibaya la dibaya kawuyali kubita dikumi, ku wuki wa dibaya la dibaya kubita otoi la etenyi. 17Kotshonge la tshina dia dibaya la dibaya sodi hyendi yukimanedi kame. Kutshi osoku lu abaya tshe wa etemwelo ka dipema. 18Kutshi abaya wa etemwelo ka dipema okone: Abaya akumi ahendi lu leke la diku dia kushi. 19Kutshi dikitshelu dia fesa dieli la afuku akumi anei wa nkitsha abaya ako akumi ahendi. Okone afuku ahendi wa dikitshelu dia fesa kawuyali la tshina dia dibaya la dibaya dia nsome sodi yadio hyendi. 20Kutshi abaya akumi ahendi lu leke la hendi la etemwelo ka dipema, la lu leke la ngelʼa kushi, 21ndu dikitshelu diawo dia fesa dieli la afuku akumi anei: afuku ahendi la tshina dia dibaya la dibaya. 22Kutshi abaya asamalu wa lu leke la la dihambi, lu leke lʼedjelu. 23Kutshi abaya ahendi wa mbidja lu atshuku wa la dihambi. 24Kawukakitwami uma lʼesi, keli kawukelekami la sodi yawo la shingu. Osoku mbayuyala lu abaya ako ahendi. Vo wayutunga atshuku ako ahendi. 25Okone ayuyala abaya enanei kame la dikitshelu dia fesa dieli la afuku dikumi la asamalu. Afuku ahendi la tshina dia dibaya dimotshi, la afuku ahendi la tshina dia dibaya dikina.

26Kutshi shimbala yʼabaya wʼulungu, 27tshanu dia mamanya abaya wa lu wedi omotshi wa etemwelo ka dipema, la shimbala tshanu lu wedi ukina wa etemwelo ka dipema ndu shimbala tshanu lu wedi wa la dihambi, lu leke lʼutsha lʼedjelu. 28Lushimbala la lʼatei wʼabaya kalutenyanya abaya uma lu kuma kemotshi pulu lu kuma kekina. 29Kukumbi abaya la paunyi; kutshi ashingu wa paunyi wa nsome shimbala. Kukumbi ndu shimbala yawo la paunyi. 30Keme etemwelo ka dipema uku yediko yakamakenya lʼukungu.

31Kutshi dihondo la eshinga wa linene wʼololo, wʼedima, wʼengingi, la wa tilili. Kusangi akeruba la lononga loko. 32Kudihane lu dikoho diʼulungu diukumbami la paunyi. Dikoho diako kadiuyali la tokoho ta paunyi, ndu kadiukitshami lu afuku anei wa dikitshelu dia fesa. 33Kuhane dihondo diako lu tokoho lʼashinga wukelekami ladiku adio. Kosekole oshete wa sheki wʼomenyi lʼedia dihondo diako. Okone dihondo diako diayunyukimanyia dia mbatanya dihuli diʼekila la dihuli diuleki ekila.#26:33 Heb. 6:19; 9:3-5. 34Kufule ufudi ladiku diʼoshete wa sheki wʼomenyi lu dihuli diuleki ekila. 35Kukitsha mesa lʼandja a dihondo. Kukitsha mesa ako lu leke la ngelʼa kushi la etemwelo ka dipema, ku ekitshelu ka tala lu leke la diku dia kushi la etemwelo ka dipema, kelanedi la mesa.

36Kutshi dihondo dia la suku dia luudu la dipema la eshinga wa linene wʼololo, wʼedima, wʼengingi, la wa tilili. Dihondo diako kadiuyali la asangu wa lotela. 37Kutshi dikoho tanu diʼelungu, kudikumbi la paunyi. Tokoho tadio katuyali ta paunyi. Kolelole ehotela dia ntsha dikitshelu dieli la afuku atanu wa mbidja dikoho.

Currently Selected:

Etumbelu 26: TLL

Highlight

Copy