Etumbelu 25

Ambutela Isariyele dia Mbela Ulambu

(Etum. 35:4-9)

1Latuyalaka akatela Mose ati: 2Uteli asi Isariyele dia vo mbelami ulambu. Nyosaki ulambu uma le untu tshe layukimo lʼutema otoi. 3Wuhu one wʼelambu mbayuyulungulaka uma le wo: paunyi, fesa, udjulu, 4ahondo wʼedima, wʼengingi, wa tilili, wa linene, wa diosa dia mbudi, 5dikuhu dia waumi wʼekoko diakawanya lu dangi dia tilili, ndu dikuhu dia mbudi la utamba wʼulungu, 6iso ka tala, diango diʼupumu ne dia iso ka lukita ndu dia malashi wʼupumu, 7mboko yʼave wa pesopeso, ndu towoko ta ngaingai ta nenga lʼukutu wa nemo la lʼopema. 8Kawumpikeli etemwelo ka dimi mbidjase lʼatei awo. 9Kanyutshi etemwelo ka dipema la diango diato tshe uku tediko tayumukenya.

Oshete wa Sheki wʼOmenyi

(Etum. 37:1-9)

10Kawutshi oshete wa sheki lʼabaya wʼutamba wʼulungu. Utali awo kawuyali kubita hyendi la etenyi, wekeki awo kubita otoi la etenyi, wemema awo kubita otoi la etenyi. 11Kukumbi paunyi ndu lʼandja ndu lʼetei, kumami ukaba wa paunyi lʼutshimba tshe. 12Kutshi ashingu anei wa paunyi, kuwadji lʼekulu awo enei: ashingu ahendi wedi awo omotshi, la ashingu ahendi wedi awo ukina. 13Kutshi esimbi wʼutamba wʼulungu, kuwekumbi la paunyi. 14Kosome esimbi lu ashingu wedi ako ehendi wʼoshete, dia membaka oshete. 15Esimbi kawutshikalaki lu ashingu wa lʼoshete; tawesomolaki uma loko. 16Kudji omenyi wayumukusha lʼoshete wa sheki. 17Kutshi ufudi wʼoshete#25:17 Rom. 3:25. la paunyi ka lutshula. Utali awo kawuyali kubita hyendi la etenyi, wekeki awo kubita otoi la etenyi. 18Kutshi akeruba ahendi wa paunyi, kuwatshi la paunyi ka lutshula lu kuma hyendi yʼufudi. 19Kutshi okeruba omotshi la kuma kemotshi la okeruba ukina la kuma kekina. Kutshi akeruba ahendi wusamanyi kame lʼufudi lu kuma yawo hyendi uma lu etshi otoi. 20Akeruba kawelaneli, ku ahafu awo kawusamani ladiku, dia nkumba ufudi; dundji diawo kadiokolami utsha lʼufudi. 21Kudji ufudi ladiku diʼoshete wa sheki. Kudji omenyi wayumukusha lʼatei wʼoshete ako. 22Laawo kayumuhumana la ye. Uma ladiku dia akeruba ahendi weli ladiku diʼoshete wa sheki wʼomenyi, kayumusawulaka la ye diʼakambu tshe wayumukutelaka lu dikambu diʼasi Isariyele.

Mesa wa Ma dia Lenya

(Etum. 37:10-16)

23Kutshi mesa lʼabaya wʼulungu. Utali awo kawuyali kubita hyendi, wekeki awo kubita otoi, la wemema awo kubita otoi la etenyi. 24Kukumbi paunyi, ndu kudji ukaba wa paunyi lʼutshimba tshe. 25Kutadji etshi ka paunyi lʼutshimba a mesa tshe, keli kuyahe ukaba ako ladiku diato. 26Kutshi ashingu anei wa paunyi, kuwadji lu atshuku anei lu ekulu wa mesa. 27Ashingu ako kawuyali lasuki lʼukaba dia nsome esimbi wa memba mesa. 28Kutshi esimbi wʼabaya wʼulungu, kuwekumbi la paunyi, dia membaka mesa. 29Kutshi diango diawo ne la paunyi ketu: alonga wʼekalikali, wʼafuku, ne dia malashi; ndu tolondo la eteka, ne dia elambu wʼashashi. 30Kunkitshiyaki ma dia lenya lu mesa tena tshe.#25:30 Lew. 24:5-8.

Ekitshelu ka Tala dia Paunyi

(Etum. 37:17-24)

31Kutshi ekitshelu ka tala la paunyi ketu. Kukitshi la paunyi ka lutshula. Etshina kato, usika ato, akoho wa mbidja atala, ehundu ato la alembo ato kawutshami lʼukama otoi wa paunyi. 32Kutshi tahi shamalu yusamanyi lʼusika: tahi shatu wedi omotshi wʼekitshelu ka tala, la tahi shatu lu wedi ukina wʼekitshelu ka tala. 33Akoho asatu wufanyi la ehundu la alembo wʼutamba wa amande wayuyala lu lutahi lomotshi; akoho asatu wufanyi lʼehundu la alembo wʼutamba wa amande wayuyala lu lutahi lukina. Wuhu ako mbayuyala lu tahi shamalu yusamanyi lu ekitshelu ka tala. 34Akoho anei wufanyi la ehundu la alembo wʼutamba wa amande wayuyala lu usika wʼekitshelu ka tala. 35Uhundu omotshi ayuyala la tshina dia tahi hyendi yusamanyi la usika wʼekitshelu ka tala, uhundu ukina la tshina dia tahi hyendi kina, la uhundu ukina la tshina dia tahi hyendi kina. Osoku mbayuyala lu tahi shamalu yusamanyi lʼekitshelu ka tala. 36Kutshi ehundu awo la tahi yawo lʼukama otoi wa paunyi ketu ka lutshula. 37Kutshi atala ato esambeli; kuwakitsha lu ahuli awo ladiku dia ekitshelu ka tala, dia vo mpetaka. 38Kutshi tosholo ta nyimaka atala, ndu alonga wʼutuku la paunyi ketu. 39Kutshi ekitshelu ka tala la diango diato tshe uma lʼukama wa paunyi ketu wa talata otoi. 40Kendi dia we ditsha tshe uku tediko takamakenya lʼukungu.#25:40 Etsh. 7:44; Heb. 8:5.

Currently Selected:

Etumbelu 25: TLL

Highlight

Copy