Etumbelu 24

Mose la Dihangamendi lʼUkungu a Sinai

1Unyashungu akatela Mose ati: Umbeli, we la Arona, Nadaba, la Abihu ndu dihangamendi akumi esambeli dia Isariyele; nyotemolaki tshalula. 2Mose ndame kasukani le Latuyalaka, keli akina tawusukanaki; ndu wudja tawumbelaki kame la ndi.

3Mose akayi, akayusanyia antu aui tshe wa Latuyalaka, ndu adjangu andi. Ku antu tshe wakûkaluya diui kame vati: Tayutsha aui tshe wakati Latuyalaka. 4Ku Mose akafundi aui wa Latuyalaka tshe. Ndi akunela kʼolomo la pindju, akatshi ediakelu la tshina diʼukungu, ndu dikoho dikumi la pendi, uku wedja dikumi la ehendi wa Isariyele. 5Ndi akatumi elongo wʼapami wʼasi Isariyele, dia ntulambula elambu wa lutshumba, la ndjakela Latuyalaka ngombe, elambu wa ki. 6Mose akose etenyi ka hendi ka dikila, akangula lu alonga. Ku ndi akamonge etenyi ka hendi ka dikila lʼediakelu. 7Ku ndi akose buku dia daka dia Unyashungu, akadialela antu. Ku vo wakati vati: Tayutshaka tshe kakati Latuyalaka, ndu tayukitanyiaka. 8Ku Mose akose dikila, akamonge antu, ata ati: Nyendi dikila dia daka,#24:8 Mat. 26:28; Mak. 14:24; Luk. 22:20; 1 Kor. 11:25; Heb. 10:29. diakalakana Latuyalaka la nyu uku aui aso tshe.#24:8 Heb. 9:19-20.

9Ku Mose akambela lʼukungu, ndi la Arona, Nadaba, la Abihu, kame la dihangamendi akumi esambeli dia Isariyele. 10Ku vo wakenyi Unyashungu wa Isariyele. La tshina diʼakaka andi kaki ave wa ngaingai wa lokolonga, wufanyi la ulungu vame lu pudipudi kawo. 11Ndi kunsimbula lunya landi dia ntshela dihangamendi dia Isariyele kolo. Vo wakenyi Unyashungu, keli wakali, wakano.

12Latuyalaka akatela Mose ati: Umbeli uya le mi lʼukungu, ukungi laawo. Dimi layukusha pasi diʼave, kame lʼelembe la adjangu, wakamafundi dikambu diawo, dia we nteya mbaetsha. 13Osoku Mose akunela, ndi la Jashua lakatukimanyiaka. Ku Mose akambela lʼukungu a Unyashungu. 14Ku ndi akatela dihangamendi ati: Nyutukungi lane edja ndu lamʼayutukalula le nyu. Nyendi, Arona la Hura wambutshikala la nyu. Naka untu eko la dikambu, ndi kayi le wo.

15Mose akambela lʼukungu, ku dingi diakakumbi ukungu. 16Lutumbu la Latuyalaka lakayala ladiku diʼUkungu a Sinai, ku dingi diakukumbi nshi shamalu. Ku lushi lʼesambeli, Latuyalaka aketi Mose uma lʼatei a dingi. 17Enelo ka lutumbu la Latuyalaka kaki uku dja yaheta lʼote wʼukungu, lu ashu wʼasi Isariyele. 18Ku Mose akoto lu dingi, akambela lʼukungu. Mose akatshikala lʼukungu tanyi akumi anei la etshu akumi anei.#24:18 Euh. 9:9.

Currently Selected:

Etumbelu 24: TLL

Highlight

Copy