Etumbelu 2

Eutweiu ka Mose

1Pami kemotshi ka lu khumbu ka Lewi akatshuki ona Lewi wadi. 2Ku umuntu ako akatshu diemi, akuti ona pami. Lamʼakandenyi ati: Onʼone dimena, ndi akawushe ngondo shatu.#2:2 Etsh. 7:20; Heb. 11:23. 3Lamʼaki nyangu kumbeya mbushe ntu, ndi akutshela kisaka ka kombe, akakikiti elungu la tsho. Ndi akawudji loko, akatukikitsha lʼatei wʼongombe, lʼumamu a ndjali. 4Kadiyendi akemala tshalula dia menda dikambu diayuyala le ndi. 5Ona Farayo a umuntu akahulo dia ntoka lu ndjali. Ku ekambi andi wʼamantu wakatasimbulaka ekulu lʼumamu a ndjali. Ona Farayo akenyi kisaka lʼatei wʼongombe, ku ndi akatumi ukambi andi omotshi la ntukiosa. 6Lamʼakandafula kisaka, ndi akenyi ona; ku ona ambulela. Ku ndi akawuki ketshi, akati ati: Ona asi Heberu omotshi one. 7Ku kadiyendi akambula ona Farayo ati: Ntshu keli ntuketeli umuntu omotshi lʼatei wʼasi Heberu, dia ndjukolomiyaka ona? 8Ku ona Farayo akawutela ati: Tshoka. Osoku ona umuntu akateta nyangu ona. 9Ku ona Farayo akawutela ati: Utshu la onʼone, utonomiyakendi, keli kankufutaki. Ku umuntu akose ona, akolomiaka. 10Ona akuli, ku nyangu akotole le ona Farayo a umuntu, ku ndi akatuyala onʼandi.#2:10 Etsh. 7:21. Ona Farayo akawole lukumbu ati: Mose (kitshimudi ati: Mbosa uma lʼashi); ne dia ndi akati ati: Uma lʼashi mbakamawose.

Mose Ambulawo uma lʼEdjibitu

11Lamʼakuli Mose, ndi akatshu lushi lomotshi le anangu, akatenda elimu a wulu wakawatshaka.#2:11 Heb. 11:24. Ndi akenyi usi Edjibitu akomola usi Heberu omotshi, usikandi. 12Mose akewewa, keli ndi komena nduku untu. Ku ndi akadiaki usi Edjibitu, akawushe lu ditshu. 13Lamʼakandatumbi la wedi a pindju, enyi ku asi Heberu ahendi ane walo ta. Ku ndi akambula one laki la munga ati: Ukundi akomolaye unyaye na? 14Ku pami kako akûkaluya diui ati: Akakete uwandji la usambudi asu na? We nangaka ndjakami uku akayadiaki usi Edjibitu?#2:14 Etsh. 7:23-28. Ku Mose akuki woma; akakani ati: Mete mete, dikambu ne diambeyama. 15Lamʼakuki Farayo dikambu diako, ndi akayangi Mose dia mbudiaka.

16Keli Mose akalawo Farayo, akatudjase lu kete ya Midiyana;#2:16 Etsh. 7:29; Heb. 11:27. ndi akatumuya lasuki lʼeteko kemotshi. Olombedi wa la Midiyana aki la ana amantu esambeli. Vo wakayi la ndjuduwula ashi, wakaludia ashi too lu teti dia nosha dungalunga dia shewo. 17Elami wʼekoko wakayi, wakayuwatshanya. Keli Mose akunela, akakimanyia, akanosha dungalunga diawo. 18Lamʼakawakalula le shewo Ruele, ndi akambula ati: Ukundi ambunyukalula esadi elo okone na? 19Vo wakûkaluya diui vati: Usi Edjibitu omotshi kakatushimbedi uma lʼanya wʼalami wʼekoko. Dikambu dikina, ndi akatuduwedi ashi, akanoshisha dungalunga diasu. 20Ku ndi akambula anʼandi ati: Lendʼendi na? Ukundi akanyatshiki pami keso? Nyutuweti, keli ayuli ma. 21Ku Mose akangenangena dia mbidjase laka Ruele. Ku ndi akasha Mose Zipora, onʼandi, wadi. 22Ndi akuti la ndi ona pami; akawole lukumbu ati: Ngereshoma (kitshimudi ati: Ongendangenda); ne dia ndi akati ati: Dimi lakayala ongendangenda lu kete ya kana.

23Lamʼaketi nshi efula, khumʼekanga kʼEdjibitu akavu. Asi Isariyele wakakhumaka la tshina dia lohombo lawo, wakalelaka dia ntana ekimanyelu. Ku alelu awo wa la tshina dia lohombo wakakumi pulu le Unyashungu. 24Lamʼakuki Unyashungu akhumu awo, Unyashungu akuho daka#2:24 Etat. 15:13-14. diakandalaki Abarahama, Isaka, la Jakoba. 25Unyashungu akenyi asi Isariyele, Unyashungu akeyi uhumba awo.

Currently Selected:

Etumbelu 2: TLL

Highlight

Copy