Imbombo sya batumigwa 4
4
Peteri na Yohani nkyeni ndukomano
1Lelo bo bali pakuyoba nabandu, popapo balinkwisa
2kumyabo abaputi, nundindilila-Tempeli nabaSadukai; bo bakalele papo bamanyisyaga abandu nukufumusya mungamu
3ya Yesu isya kusyuka mbafwe. Popapo balinkubakola, balinkubigalila nnyumba ya bannyololo ukufika nulubunju,
4namanga gali mayolo. Loli bingi muli aba bapilike ilisyu balinkwitika; abanyambala baliti bali baelifu bahano (5,000) ubwingi.
5Popapo nulubunju balinkubungana mu-Yerusalemu abala-
6gili, abakulumba nabamanyakalata, na Hanasi umputi unkulumba, na Kayafa na Yohani na Aliksandara, bosa nabakamu
7ba mputi unkulumba. Lelo bo bababikile pakati, popapo balinkubalalusya balinkuti: Isi mukubomba, mukubombela
8mmaka maki, na mungamu ngi? Popapo Peteri bo iswile Mbepo Mwikemo, alinkubabula alinkuti: Mwe balagili ba
9bandu, na mwe bakulumba, linga tukulongigwa umusyugu panongwa ya mbombo inunu iyi tumbombile umundu umbine
10uyu, ukuti abumbulwike bulebule, syo mumanyege mwesa nabandu bosa abanyʼIsraeli ukuti, mungamu ya Yesu Kristi ugwa mu-Nazareti, uyu mwalinkomile pakikohekano, uyu Kyala alinsyusisye mbafwe, muli yuyuyu, mo mumo umundu
11uyu imile nkyeni mmyinu unkafu itolo. Yesu yuyuyu, yo ibwe ili lyasyokeligwe nanumwe mwe bayengi, lyo lipelile
12ukuya ibwe ikulumba lya panguto. Bukayamo nabumo ubupoki mmundu uyungi; namanga yikayako nayimo ingamu iyingi kusi kumpalanga, iyi bapegigwe abandu, muli iyi fikuti mo tubwagilege ubupokigwa.
13Lelo bo babubwene ubukifu bwa Peteri na Yohani, bo basyagenie ukuti bakamanya kalata, kangi bakaya bamaganyi, balinkuswiganika, balinkusyagania ukuti bo aba bali nagwe
14Yesu. Loli bo bambwene umundu uyu abumbulusigwe imile pamopene nabo, balinkusita nukuya nalyo nalimo ilya kwa-
15mula. Lelo bo babalagile ukuti basokemo ndukomano,
16balinkulalusania babo batupu, balinkuti: Tubombe fiki nabo abandu aba? Buno sili pabwelu kuli bosa aba bali mu-Yerusalemu isya kuti, abandu aba babombile ikika ikikulumba,
17kangi tukabagila nukukana. Loli ukuti sisisi singakindililaga ukubalanila mbandu, isaga tubogofye, ukuti bangandisyaga
18ukuyoba numundu yumo mungamu yiyiyi. Lelo bo bababilikile, balinkubakanisya fiyo nkufumusya nukumanyikisya
19mungamu ya Yesu. Loli Peteri na Yohani balinkubamula balinkuti: Linga kununu nkyeni mwa Kyala ukubapilika umwe, ukukinda ukumpilika Kyala, syo mulongege yuyumwe;
20buno uswe tukabagila ukuleka ukusiyoba isi tusibwene nisi
21tusipilike. Abene bo bongilepo ukubogofya, po balinkubabula, papo bakayagile injila ya kubafundilamo, panogwa ya bandu; namanga abandu bosa bamwimikaga Kyala pali isi
22syabonike. Namanga umundu uyu kyapeligwemo ikiswigu kikiki, ifyinja fyake fyakindile pamalongo mana (40).
Peteri na Yohani bikugomokela kubinabo
23Lelo bo bababwile, popapo balinkubuka kubinabo, balinkubapangila syosa isi abaputi abakulumba, nabakulumba baba-
24bulile. Abene bo bapilike, balinkwinula ilisyu lyabo pali kimokyene kwa Kyala balinkuti: Gwe Ntwa gwe Mwenefyosa, gwe gwapelile ikya kumwanya nikya pasi, ninyanja na fyosa ifi
25filimo, gwe gwayobile mwa Mbepo Mwikemo nkanwa mwa tata Davidi, umbombi gwako gwatile:
Abapanja baywegaga fiki,
Nifikolo fya bandu finogonaga syaki isya itolo?
26Abatwa ba nkisu bitendekisye,
Nabalagili bakomene pamopene,
Bansambukile uNtwa na yu Mpakigwa gwake.
27Buno naloli nkaya aka, ba-Herodi, ba-Ponti Pilati, abapanja nabanyʼIsraeli bambunganile umbombi gwako umwikemo
28Yesu, uyu gwalimpakile, ukubomba isi ikiboko kyako nulutu-
29mulilo lwako fyalinogonile ngani ukuti sisege. Lilino lelo gwe Ntwa ukukete ukogofya kwabo, ubapege abatumwa bako
30ukuliyoba ilisyu lyako nubukifu bosa, bo kugolosya ikiboko kyako nkubumbulusya, nukubomba ifika mfiswigu mungamu
31ya Yesu, umbombi gwako umwikemo. Lelo bo biputile, popapo pabuyo apa babungene palinkusenyendeka; bosa balinkwisula Mbepo Mwikemo, balinkuliyoba ilisyu lya Kyala nubukifu.
Ukulilanila ikyuma
32Popapo ikilundilo kya aba balitike lulinkuya nindumbula yimoyene, numoyo gumogwene, akalipo nayumo ugwa kuti ifi
33ali nafyo fyake mwene, loli balinkulilanila fyosa itolo. Popapo abatumigwa balinkusisimikisya namaka amakulumba isya kusyuka kwa Ntwa Yesu; lyope ilipyana li lingi lilinkuya
34nabo bosa. Namanga akalipo nayumo undondo mmyabo, papo bosa aba bali nifisu naba bali ninyumba balinkulisya,
35balinkutwala indalama sya ifi bulisyaga, balinkusibona mmalundi ga batumigwa, balinkubayabila yumo yumo bo mumo
36umundu gwesa agililwaga. Bunobuno Yosefu uyu abatumigwa balimpele iya Barnaba, (ko kuti nnya lusubisyo), unnya
37Levi pakikota, ugwa mu-Saiprasi, yo alinkulisya ungunda gwake; bo ulisye, alinkutwala indalama, alinkusibika mmalundi ga batumigwa.
Currently Selected:
Imbombo sya batumigwa 4: NYY
Highlight
Share
Copy
Want to have your highlights saved across all your devices? Sign up or sign in
Nyakyusa Ngonde New Testament (Ulwitikano Ulupya) © United Bible Societies, 1966.
