Yoanɛ 12

Maria akĩkĩ yɔntbɔ na gɛrɛ Yezo

(Mat. 26.6-13; Mar. 14.3-9)

1Angbã ndo bi mana, ya yenga ti Lipandasi tɛ Ayuda ati, la Yezo anɔ ka Betania. Betania ni adu kɔdɔrɔ tɛ Lazaro, kai ndo la Yezo aso lo na pɛ kwá. 2Lo ĩ si kai ko, atɔ tɛ hɛ̃ lo, ko Marta ndo la akangbi tɛ ni. Lazaro nga ndo so popo tɛ azi mɛ Yezo ana la atɛ ye ndoni kɔi. 3La Maria amu yɔmbɔ mɛ na punda litrɛ, akĩkĩ na gɛrɛ Yezo. Alɛkɛ yɔmbɔ ni na beta ngu kɛkɛ mɛ ili ni la nardɛ, yɔmbɔ ni ko ndoti faranga ma wo ma. So pɛni, Maria afu kwa li lo nvɛni, ambo na gɛrɛ Yezo. Yɔmbɔ ni afũ mbɔ̃ amu ya da kwe zu. 4Mbanga va Yezo kɔi, ili lo la Yudasi Iskariɔtɛ, lo ndo la na tɛngɔ gbɛ kuni Yezo, lo pa ya: 5“Nda mɛ ta aka yɔmbɔ olo na faranga ngbangbo ta, ko amu faranga ni akangbi na awa yɛlɛ ma nɛ?” 6Ta lo tɛnɛ ndo nga so, na lo mɛ ya, bɛ lo ndosɔ so awa yɛlɛ ma. Kanda lo tɛnɛ ndo nga so, na lo mɛ ya, lo wa nzĩ. Andobata ndo faranga ka ti lo, ko lo ndonzĩ ndo ni. 7La Yezo apa hɛ̃ Yudasi ya: “Zia wali olo lo du kpɔ! Adu yɔmbɔ mɛ ale lo bata ni, wa na lá ti hɔngɔ mbi ko, lo kĩkĩ ni tɛrɛ mbi. 8Ĩ na awa yɛlɛ na dungɔ ngoi zu ndoni kɔi, kanda ta mbi na ngbãngɔ so tɔ̃nda ĩ ngoi zu ma.”

Agbia tɛ awa lungɔ Nzapa na ye agbe lingo ti hongɔ Lazaro

9Ayuda butu butu ama ndo ya, Yezo ka Betania, la ala nɔ nga kai. Ko ta ala nɔ ndo kai bo so bangɔ Yezo ma, kanda ala nɔ ndo ya, ani ba nga Lazaro mɛ ndo Yezo aso lo na pɛ kwa. 10Agbia tɛ awa lungɔ Nzapa na ye amangbi ya, ale aho nga Lazaro, 11ta sanga ma, na lo tɛ lo ndo la Ayuda ma wo ma azia lege tɛ ani, aye lo tɛ Yezo.

Yezo agwe ka Yeruzalɛmɛ

(Mat. 21.1-11; Mar. 11.1-11; Luk. 19.28-40)

12Ĩ la bu ndã ĩ de ko, azi butu butu ko ndo aga yenga ti Lipandasi ama ya, Yezo na gangɔ ka Yeruzalɛmɛ. 13La ala lɔ anzango mburu, anɔ angoro lo. Ala dɛrɛ kɔngɔ ya: “E gonda Gbia Nzapa o! Nzapa asunu bɛ zo olo tɛrɛ gangɔ na ili lo ma ke! Nzapa asunu bɛ Gbia tɛ awa Izrayɛlɛ ma ke!” 14Yezo alua nyi punda, ako ndo ni, nga ma se ko asu na ni na ya Buku tɛ Nzapa ya:

15“Ĩ awa kɔdɔrɔ ti Siona, ta mbɛtɔ agbɔ̃ ĩ ma!

Ĩ ba Gbia tɛ ĩ la ga,

Lo du ndo nyi punda.”

16Ta ava Yezo ahĩnga nda tɛnɛ ni ko na ngoi ko ma, kanda ngoi mɛ Nzapa ahɛ̃ Yezo ndima wɛ, la bɛ ava lo ada na tɛnɛ mɛ asu ka ya Buku tɛ Nzapa na lo tɛ lo, ko ali nga bo ye ni ko ya, asi na lo.

17Azi zu ko ndo so gunda Yezo, na ngoi mɛ ndo lo ili na Lazaro ka ya sende, lo so lo, la Lazaro alo kai asi ko, ala pa ndo pa ti ye mɛ ala hũ hɛ̃ azi. 18Nda mɛ ndo azi butu butu anɔ so ngorongɔ Yezo la, na lo mɛ ya, ala ma ya, lo la lo li aye ti kpɛnɛ ni ko. 19Ko Afarizeo so ndotɛnɛ ka popo tɛ la ya: “Ĩ hũ wɛ, ta ĩ lengbi ti lingɔ lo na ye kɔi ma, ĩ gbanzi azi ya, ta ala kã pɛ lo ma, ko azi zu akɛ̃ kia akã pɛ lo!”

Ambanga azi ti Grɛsɛ aye bangɔ Yezo

20Ambanga azi ti sese ti Grɛsɛ aga nga ndo so popo tɛ azi mɛ aga yenga ka Yeruzalɛmɛ so vɔrɔngɔ Nzapa. 21Ala nɔ ka tɛ Filipo mɛ wa Bɛtɛsaida, Bɛtɛsaida ni ka sese ti Galilea. Ala pa hɛ̃ lo ya: “Pakala, e ye bangɔ Yezo.” 22Filipo ĩ ma so ko, lo nɔ lo pa hɛ̃ Andre. La Andre na Filipo abombi, anɔ apa hɛ̃ Yezo. 23La Yezo agbinya hɛ̃ la ya: “Na olo ko, ngoi ti Nzapa hɛ̃ngɔ mbi Nyi lo ndima alengbi wɛ. 24Mbi pa hɛ̃ ĩ ti beta tɛnɛ ya, se le tɛ ati ka lɛ sese azɔ̃, wadila adú le mɛ ndɛ̃ gba, wa se ta le tɛ ni ati ka lɛ sese azɔ̃ ma ko, ta alengbi ti dúngɔ le mɛ ndɛ̃ ma. 25Zo ko aye batangɔ du tɛ lo na lo tɛ lo nvɛni ko, tɔrɔ tɛrɛ lo na kpingɔ. Wa zo ko akɛ̃ du tɛ lo na lo tɛ mbi so lɛ sese olo ko, lo na luangɔ du ti kaka. 26Se zo aye lingɔ kwa hɛ̃ mbi ko, ale lo ga, e na lo e ɔ ndoni kɔi, wadila ndo ko mbi du da ko, wa kwa tɛ mbi adu nga da. To mbi ndogonda zo mɛ ndoli kwa hɛ̃ mbi.”

Yezo apia apa lo kwa tɛ lo

27“Na olo ko, li mbi ahulu. Ko ye mɛ mbi na lingɔ nɛ? Ale mbi pa hɛ̃ To mbi ya, ta lo ye ya mbi hũ pɛnɔ na ngoi olo ma? Ipɔ, ta mbi pa nga so ma, ta sanga ma, mbi ga ndo ge lɛ sese ya, mbi hũ pɛnɔ ni ko.” 28La Yezo apa ya: “Baba, fa azi na ndima tɛ mɔ!” La ama legɔ̃ zo, adu ka ndozu apa ya: “Mbi fa ndo azi na ndima tɛ mbi uzu wɛ, ko mbi na fangɔ ni na la fani mɛ ndɛ̃.”

29Azi ko ndo so ndo ko butu butu ĩ ma legɔ̃ zo ni ko, ala pa ya: “Ngu la akini!” Ambanga apa ya: “Angelo la atɛnɛ tɛnɛ hɛ̃ lo!” 30La Yezo, apa hɛ̃ la ya: “Tɛnɛ ko ĩ ma ko, ta adu na lo tɛ mbi ma, kanda adu na lo tɛ ĩ. 31Na olo ko, ngoi tɛ Nzapa ti fangɔ ngbanga tɛ azi ti lɛ sese alengbi wɛ. Na olo ko, Nzapa na tomangɔ Satana ya, ta lo ti lɛ gbia so lɛ sese ma. 32Wa tɛ mbi, ngoi mɛ azi na yangɔ mbi ndozu na ndo kɛkɛ ko, mbi na zingɔ lege hɛ̃ azi zu aga ge tɛ mbi.” 33(Lo tɛnɛ ndo nga so, so fangɔ azi na se kwa mɛ lo na kpingɔ.) 34Azi ko butu butu agbinya hɛ̃ lo ya: “E di ndo ka ya buku ti ndia tɛ e ya, Mɛsia angbã gbanda kaka. Wa kɔdɛ mɛ mɔ ti pa tɛ mɔ ya, ale aya Nyi Zo ndozu na ndo kɛkɛ sia? Nyi Zo mɛ mɔ ndohá lo ko, lo na?” 35La Yezo agbinya hɛ̃ la ya: “Mbi wa vurungɔ na ndo, mbi de na popo tɛ ĩ, kanda ta mbi dɛ na ngoi gba ma. Ko ale ĩ dɔ nɔ na ngoi mɛ ndo ade yango, so mbingo aga abuta ĩ. Ta sanga ma, zo ko ndodɔ nɔ na ya mbingo ko, ta lo ndohĩnga ndo mɛ lo ndogwe da ma. 36Mbi wa vurungɔ na ndo, mbi dɛ na popo tɛ ĩ, ko ale ĩ ye lo tɛ mbi, wadila ĩ ti nga awa vurungɔ na ndo na lo tɛ azi.”

Ayuda akɛ yengɔ lo tɛ Yezo

Yezo ĩ tɛnɛ tɛnɛ ko wɛ ko, lo hã nɔ lo gwe, lo bere ka ndo mɛ yɔngɔrɔni na la. 37Lo li ndo aye ti kpɛnɛ ma wo ma ala hũ, abɛ nga so ko, ta ala ndoye lo tɛ lo ma. 38Adu ndo nga so, ya tɛnɛ ko ndo Ezai wa pangɔ nyɔ Nzapa atɛnɛ ati na seni. Tɛnɛ ni lo mɛ

“Gbia, ta zo kɔi aye lo tɛ mɔ mɛ e pa ma!

Ta zo kɔi ahĩnga nda nguru tɛ mɔ ma.”

39Ezai apa nga ndo nda mɛ ndo ta ala lengbi ti yengɔ lo tɛ lo ma. Lo pa ndo ya:

40“Nzapa asa ndo ziba lɛ la ya,

Ta ala hũ ndo ma,

Lo hã ndo kɔdɛ tɛ la lo zi ya,

Ta ala hĩnga ndo na kɔdɛ tɛ la ma,

Ta ala gbinya bɛ la ma, so ni so la.”

41Ezai apa ndo lo ni ko, na lo mɛ ya, lo pia ndo lo hũ ndima tɛ Yezo, lo tɛnɛ nga ndo tɛnɛ na lo tɛ lo.

42Be nga so popo tɛ agbia tɛ Ayuda ko, ambanga ma wo ma aye ndo lo tɛ Yezo. Kanda ta ala pa ndo yango ma, so Afarizeo agbanzi la na lingɔ ya da sambela. 43Ala ndoye tɛ la gondangɔ mɛ azi ndogonda na la, aɔ gondangɔ mɛ Nzapa ndogonda na azi.

Tɛnɛ tɛ Yezo la na fangɔ ngbanga bingɔ li azi

44Yezo atɛnɛ tɛnɛ na kɔngɔ ya: “Se zo aye lo tɛ mbi ko, afa ya, ta lo ye bo lo tɛ mbi kɔi ma, kanda lo ye nga lo tɛ wa tongɔ mbi. 45Zo ko la ahũ mbi ko, lo hũ nga wa tongɔ mbi wɛ la. 46Mbi ga ge lɛ sese so vurungɔ na ndo ya, zo zu ko la aye lo tɛ mbi ko, ta lo ngba na ya mbingo ma. 47Se zo ama tɛnɛ tɛ mbi, ko ta lo tɔndɔ ni ma ko, ta mbi la na fangɔ ngbanga bingɔ li lo ma, ta sanga ma, ta mbi ga ge lɛ sese so fangɔ ngbanga bingɔ li azi ma, kanda mbi ga so songɔ azi. 48Ko zo ko la akɛ̃ mbi, akɛ nga tɛnɛ tɛ mbi ko, ye kɔi afa gbanda ngbanga abi li lo! Ye mɛ gbanda afa ngbanga abi li lo na lá ti fangɔ ngbanga la tɛnɛ mɛ mbi ndoha na azi. 49Ta sanga ma, atɛnɛ mɛ mbi ndotɛnɛ ko, ta mbi ndotenɛ na nguru tɛ mbi nvɛni ma. Kanda atɛnɛ mɛ mbi lengbi ti tɛnɛngɔ, na aye mɛ mbi lengbi ti hangɔ ko, mbi ndoli ni na se nyɔ To mbi nvɛni mɛ wa tongɔ mbi. 50Ko mbi hĩnga ya, se azi atɔndɔ nyɔ ko la lo ndohɛ̃ ko, ala lua du ti kaka. Atɛnɛ mɛ mbi ndotɛnɛ ko, mbi ndotɛnɛ ni na se nyɔ To mbi.”

Currently Selected:

Yoanɛ 12: NGB87

Highlight

Copy