Ovun Apostol 8

1Im ra nempugon mori yempĭsesat tamas iranda semsimak ra Yerūsalem; dūmaseviokonda sū ra nūrū su Yūdia ĭm Sameria, ōvun apostol dūmūte. 2Mōveteme aremī dūmūriuki Stifan mūmūtugi tamas. 3Im Sol yimmokini semsimak mori memtorĭmpe ra ōvun nimo yemyevora ōveteme movasiven memsumpat ūnisog nimo nugkugko.

4Mirora mori dūtin naseviokonda dūmavan ra nūrū sū mū mfitorenūwi sah nam navosavos, 5Im Fĭlĭp yemyep ra sī sĭti Sameria memtorenūwi sah punora memokū ugi Krĭstō. 6Mov numpūn lō (gi tarū siteven) dūmūvendugugi nam mori Fĭlĭp yemenūwi pol sugkū dūmūrĭgi mūmokesi ōvnumpūrak horog mori iyi yemumpi.

7Popōwo ĭt ōvun naviatindi dūmūvelum ilat marokonda sikat mori dūpmūve iranda, mūmūvrugi gi navian sah, ĭm sikat mori dūmūte ituromoro mōvnomti yemumkor-horigeves. 8Yeti navosavos tamas ra nimote, mori.

9Kō sī neteme nin eni Simon, iyi itetūwī ra sĭti mori yemumpi ōvnumpūrak navlugi, ĭm lō Sameria dūmavlugi, iyi yemenūwi memokū sī horog wokon: 10mirora ōvatemonok mōveteme dūmūvendugugi iyi mūmūnūwi mūmokū Iyi horog eni Nōbū mori ra nūsian. 11Mirora omwisū dūmūvendugi iyi, popōwo nempugon tantop iyi yemumpi irora worovkoritwi ugi numpūrak navlugi isen. 12Kō pol sugkū irora dūmūtavnirĭgi Filĭp yemtorenūwi sah memokū ugi lō eni Nōbū, ĭm nin eni Iesū Krĭstō, ōveteme movasiven dūmūvī baptisma iranda. 13Im Sīmon sugkū yemtavnirĭgi mempi baptisma iran yemsari iran Fĭlĭp; ĭm pol sukū yemokesi ōv numpūrak horog mōvun safi mori yemumpi iyi yemovkoritwi.

14Im pol sugkū ōvun apostol ra Yerūsalem dūmūrigi nam ma Sameria dūmūvī nam eni Nōbū irora dūtamūli Piter ĭm Yōane punora: 15mori dūmūvelum mūmūfwaki memokū ugi irora ma irora wampī Naviat Tumpora: 16It iyi ra nempugon mori yetūmol iranda: kō irora dūpmūvī baptisma iranda ra nin eni Iesū. 17Miroran dūmūtipe nokovenda iranda mirora dūmūvī Naviat Tumpora. 18Im pol sugkū Sīmon yemokesi yemovunora Naviat Tumpora pol sugkū ōvun apostol dūmūtipe nokovenda iranda, iyi yemetipe muni ūnĭminda memenūwi memokū. 19Ovoyaū sugkū imo horog ma iyi sī kū sī ya kantipe nokovūg iran ampi Naviat Tumpora. 20Im Piter yemtamsi pugi memokū, Okinok ĭm muni sorum, popōwo kĭmokū worevasi itemas eni Nōbū ugi muni. Tawi sī sie sī sorum ugi imo numpūrak; 21popōwo nōwam tawi nugko ūnipmi eni Nōbū. 22Yīeves nōwam popōwo ugi imo satindi, esenĭgi Nōbū nagkū iyi afielentugkĭk tarū ūnōwam. 23It yakum nelavenuri satindi wokon ūnōwam, umīetok ugi worit ra narekindi. 24Im Sīmon yemtamsi memenūwi memokū. Ufwaki pugi Novsūromon nisekūg mokū tawi sī ra imo sū kūmanūwi ugi ampelum irag.

25Im pol sugkū dūmumpūvsok ugi mūmūtorenūwi sah nam eni Novsūromon, dūmūtorĭleki ra Yerūsalem mūmūtorenūwi sah nam navosavos ra ov nimote ūntemne sikat isenda ōveteme Sameria. 26Nagelo eni Novsūromon, yemenūwi pugi Fĭlĭp memokū, Etūok mavan empak ra selat mori umeyep mamne ra Yerūsalem Resa mori nūrū wokon. 27Miyi yemtūok mempe: im pah sī neteme Etiopia sī yūnok nivūo ra nusian isen Kandasi nasimnalam ōveteme Etiopia memefinte noete eni omwisū, yempe ra Yerūsalem woretivita; 28memtorileki memetesep ra kar isen memesepi netiyi eni Isea profet. 29Naviat Tumpora yemenūwi pugi Fĭlĭp memokū, Eve ĭm wosintorugi kar mori. 30Miyi Fĭlĭp yemalo pugi memorigi iyi yemesepi netiyi eni Isea profet, memtagkeli memokū, kĭk umagkili fan nam mori kĭk emasepi? 31Miyi yemenūwi memokū, ya agkili nokowo, nagku sī otūontavsokoyaū? Miyi yemenūwi pugi Fĭlĭp memokū osuki mantesep ra kar eni ūndū. 32Miyi yemesepi ra mumpon netiyi imo nam,

Sugkū sī pugipugi dūmūtori iyi ra nūrū talugi;

Im sugkū lam ūnipmi neteme umnovi noviliran umeteteven iyi yetūnūwi sī nam.

33Pol sugkū dūmūvĭindi iran dūmūsiugi tanepo marugi;

Im mē anūwi magkū ugi palsi isen!

Dūmūvi nomūrep eni marugi nemap.

34Neteme yūnok yemtamsi memenūwi pugi Fĭlĭp memokū, Yakum mentagkolok memagkū, profet mori yemenūwi imo nam memokū ugi mē? ugi iyi pe iyi, kū ugi sī mōmū neteme? 35Im Filĭp yemati potni ra imō nam ra mumpon netiyi memtorenūwi nam navosavos pugi memokū ugi Iesū. 36Im polekū irora dūmūve ra selat dūmūvelum ra sī nū; 37yūnok yemenūwi memokū, Okesi, nū; yakampī baptisma irag kū? Im Fĭlĭp yemenūwi memokū, Nagkū kĭk umintavnirĭgi ūnōwam omwisū; miyi yemtamsi, memenūwi memokū, ya kum mentavnirĭgi ma Iesū Kristo Netni eni Iehōva. 38Miyi yemenūwi memokū kar antūrū, mirora dūmūyep, Fĭlĭp miyi yūnok, miroran dūrū dūmūve worewavyokū ra nū; 39miyi yumbaptiso iran. Im pol sugkū dūmūvesah marugi nū Naviat eni Novsūromon yemuriuki pelah Fĭlĭp; miyi yūnok yetokesi mōmū miyi yemavan ra selat eni memavosūwi. 40Dūmokesi Fĭlĭp ra Asotus: miyi yemavan ra sĭti sū, memtorenūwi sah ra omwisū mafeli nempugon iyi yempelum ra Sesaria.

Currently Selected:

Ovun Apostol 8: ERGNT79

Highlight

Copy