Apocalípsis 6

Rölluchö sëllukuna lashtaraqta Jesucristo jipinqan

1Tsaychömi röllupa punta kaq laqaraykaq sëlluta Cordëru jipinqanta rikarqä. Jipiskiptinmi puntanchö chusku kawaqkunapita juknin jinchi qayakur nimurqan: <<¡Shamuy!>> 2Tsaynö niptin rikachakunqächömi yuraq bestiata rikarqä. Montaqninnam flëchan aptashqa karqan.#Zac. 1.8; 6.3, 6. Paymi corönata chaskiskir Dios Yayapa contrankunata vencir ushakätsinanpaq aywarqan.

3Rölluchö ishkay kaq laqaraykaq sëlluta Cordëru jipiskiptinmi puntanchö chusku kawaqkunapita juknin qayakur nirqan: <<¡Shamuy!>> 4Tsaynö niptinmi puka bestia#Zac. 1.8; 6.2. yarqamurqan. Montaqninnam jatun espädata chaskiskir runakuna chikinakur kikinkunapura wañutsinakuyänanpaq aywarqan.

5Rölluchö kimsa kaq laqaraykaq sëlluta Cordëru jipiskiptinmi puntanchö chusku kawaqkunapita juknin qayakur nirqan: <<¡Shamuy!>>

Tsaynö niptin rikachakunqächömi yana bestia yarqaykämuqta rikarqä. Montaqninnam balanzan aptashqa karqan.#Zac. 6.2, 6. 6Tsaymi tsay chusku kawaqkunapa chawpinpita parlamuqta wiyarqä: <<¡Muchuymi kanqa! Tsaymi juk junaq arur gänayanqanpis juk kïlu trïguta o kimsa kïlu cebädata rantiyänanllapaq paqtanqa. Peru aceititawan vïnutaqa ama ushakätsiytsu>>.

7Rölluchö chusku kaq laqaraykaq sëlluta Cordëru jipiskiptinmi puntanchö chusku kawaqkunapita jukninna qayakur nirqan: <<¡Shamuy!>>

8Tsaynö niptin rikachakunqächömi bäyu bestiata rikarqä. Montaqninpanam shutin karqan Wañuy.

Paypa qepantanam Hades shamurqan. Ishkanmi yarqayämurqan runakunata espädawan, muchuywan, qeshyaywan y chucaru wätakunawan wañutsiyänanpaq. Tsaymi poderyuq kayarqan cuarta parti runakunata wañutsiyänanpaq.#Eze. 14.21.

9Rölluchö pitsqa kaq laqaraykaq sëlluta Cordëru jipiskiptinmi almakuna altar chakinchö kaykaqta rikarqä. Tsay almakunam kayarqan Diospa willakuyninta cäsuyanqanpita y Jesucristuman creyikuyanqanpita wañutsishqa runakunapa almankuna. 10Paykunam jinchi niyarqan: <<Ninqaykikunata cumpliq santu Dios Yaya, ¿imaytan wañutsiyämaq runakunata juzganki?>>

11Tsaymi Dios Yaya nirqan: <<Shuyaykuyay. Qamkuna wañuyanqaykinöllam wakin creyikamuqkunapis wañuyanqa>>. Tsaynö nirmi tsay almakunata yuraq llatapata shukutsirqan.

12Rölluchö soqta kaq laqaraykaq sëlluta Cordëru jipiskiptinmi patsa alläpa kuyurqan.#Apoc. 11.13; 16.18. Tsay höram rupay yanayar lütu tëlanö tikraqta#Isa. 13.10; Joel 2.10, 31; 3.15; Mat. 24.29; Mar. 13.24-25; Luc. 21.25. y killapis yawarnö kaykaqta rikarqä. 13Alläpa wayraptin hïgus shikwamuqnöraqmi qoyllurkunapis ciëlupita shikwayämurqan. 14Ciëlupis röllunö lluyllukarmi ushakarqan.#Isa. 34.4. Jirkakunawan lamarchö islakunapis juklämanmi witiyarqan.#Apoc. 16.20.

15Kay patsachö reykuna, rïcukuna, mandakuq soldädukuna, servikuqkuna y wakin runakunapis qaqakunaman y machaykunamanmi tsinkakuyarqan.#Isa. 2.19, 21. 16Tsaychömi jirkakunata y qaqakunata niyarqan: <<¡Juklla janäkunaman juchumuy!#Ose. 10.8; Luc. 23.30. ¡Trönuchö jamaqwan Cordërum alläpa rabyashqa kaykäyan! ¡Paykunapita pakaykayällämay! 17¡Llapan runakunata castigananpaq tiempu chämushqanam! ¡Dios Yayapa castïguntaqa manam ni pipis awantanqatsu!>>#Isa. 13.6; Eze. 30.2-3; Joel 1.15; 2.11; Amós 5.18-20; 8.9-14; Sof. 1.14-18; Mal. 3.2.

Currently Selected:

Apocalípsis 6: qxn

Highlight

Copy