Apocalípsis 2

Éfeso markachö creyikuqkunaman cartakunqan

1<<Éfeso markachö iglesiapa angelninpaq kay ninqaqta qellqay: Noqam derëcha kaq makïchö qanchis qoyllurkunata katsï. Qoripita rurashqa qanchis candelërukunapa chawpinchömi purï.#Apoc. 1.20.

2<<Noqam rikaykä imaypis creyikamur llapan rurayanqaykikunata. Mana alli yachatsikuqkunata manam chaskiyashkankitsu. Apóstol tukuqkuna llullakur llutanta yachatsikuyanqantam taripuyashkanki. 3Noqaman creyikuyanqaykipita sufritsiyäshuptikipis mana ajayaypam munanqänö kawaykäyanki.

4<<Peru manam gustamantsu ñawpata kuyakuq kayanqaykita dëjayanqayki. 5Puntata kuyakuq kayanqaykinö kananpis kuyakuq kayay. Tsaynö mana kayaptikiqa [illaqpita] shamurmi puntächö kaykaq candelëruykikunata jipiskishaq.

6<<Peru nicolaíta runakunapa mana alli rurayninkunata#Apoc. 2.14-15. mana chaskirmi allita ruraykäyanki. Paykuna yachatsikuyanqanta manam wiyaytapis munätsu.

7<<Espíritu Santum iglesiakunata tsaynö nin. Rinriyuq kaqkunaqa ninqäkunata wiyakuyätsun. Imaykata ñakarpis mana ajayaypa creyikamuqkunatam Dios Yayapa puntanchö imayyaqpis kawatsikuq jachapa wayuyninta qarashaq>>.#Gén. 2.9; Apoc. 22.2.

Esmirna markachö creyikuqkunaman cartakunqan

8<<Esmirna markachö iglesiapa angelninpaq kay ninqaqta qellqay: Noqam qallanan y ushanan kä. Wañunqäpitam kawamushkä.

9<<Noqam rikaykä [llapan rurayanqaykikunata,] ñakayanqaykita y waktsa kayanqaykita. Waktsa karpis imayka rïcunömi kawaykäyanki. Tsaynöllam wiyaykä washayki rimayäshunqaykita. Tsay runakunaqa <Dios Yaya kuyanqan Israel runam kayä> nikarpis Satanáspa munaynintam rurayan.

10<<Qamkunaman ñakaykuna chaykämunnam. Peru ama mantsakäyaytsu. Diablu ishkitsiyäshuynikita munarmi wakikita carcelman qaykatsiyäshunki. Tsaychömi chunka junaq sufriyanki. Tsaynö kaptinpis wañuyanqaykiyaq mana ajayaypa noqaman creyikayämuy. Tsaynö kayanqaykipitam corönata qarayäshayki. Tsay corönaqa mana ushakaq kawaymi kanqa.

11<<Espíritu Santum iglesiakunata tsaynö nin. Rinriyuq kaqkunaqa ninqäkunata wiyakuyätsun. Imaykata ñakarpis mana ajayaypa creyikamuqkunaqa manam nina qochaman jitarpushqatsu kayanqa>>.#Apoc. 20.14; 21.8.

Pérgamo markachö creyikuqkunaman cartakunqan

12<<Pérgamo markachö iglesiapa angelninpaq kay ninqaqta qellqay: Noqam ishkan lädupa afilashqa espädä aptashqa kaykä.

13<<Noqam rikaykä [llapan rurayanqaykikunata y] markaykichö Satanáspa trönun kanqanta. Tsaynö kaptinpis mana ajayaypam noqaman creyikayämunki. Willakuynïta willakuq Antipasta tsay markachö wañutsiyashqa kaptinpis mana desanimakurmi confiakayämushkanki.

14<<Peru wakin ruraykäyanqaykikuna manam gustamantsu. Wakikim Balaam yachatsikunqannö mana allikunata yachatsikuykäyanki. Pay yachatsiptinmi Balac shutiyuq runa Israel runakunata#Núm. 22.5, 7; 31.16; Deut. 23.4. fiestankunaman qayatsirqan ïdulukunapa shutinchö pishtayanqan aytsata mikuyänanpaq. Tsaynöllam runakunata yachatsirqan fornicación jutsata rurayänanpaq.#Núm. 25.1-3.

15<<Tsaynöllam wakikiqa nicolaíta runakunapa yachatsikuyninta chaskiyashkanki. [Tsay yachatsikuytaqa manam wiyaytapis munätsu.] 16Tsaynö kaykaptinqa arrepentikur tsay yachatsikuykunata dëjayay. Mana dëjayaptikiqa qamkuna kaqman illaqpita shamurmi shimïpita yarquq espädawan ushakätsiyäshayki.

17<<Espíritu Santum iglesiakunata tsaynö nin. Rinriyuq kaqkunaqa ninqäkunata wiyakuyätsun. Imaykata ñakarpis mana ajayaypa creyikamuqkunatam ciëluchö churaraq maná mikuyta#Éxo. 16.14-15, 33-34; Juan 6.48-50. qarashaq. Tsaynöllam yuraq rumichö mushuq shutin#Isa. 62.2; 65.15. qellqashqata entregashaq. Tsay mushuq shutitaqa yuraq rumita chaskiqkunallam musyayanqa>>.

Tiatira markachö creyikuqkunaman cartakunqan

18<<Tiatira markachö iglesiapa angelninpaq kay ninqaqta qellqay: Noqam Dios Yayapa Tsurin kä. Ñawïpis ninanöraqmi atsikyan. Chakïpis chipakyaq broncipita rurashqanömi kaykan.

19<<Noqam rikaykä llapan rurayanqaykikunata y pïmaywanpis kuyanakuyanqaykita. Tsaynöllam musyaykä noqaman creyikayämunqaykita, yanapakuq kayanqaykita y munanqänö imaypis kawaykäyanqaykita. Unay serviyämanqaykipita masmi kananqa serviykäyämanki.

20<<Peru manam gustamantsu Jezabel#1Rey. 16.31; 2Rey. 9.22, 30. mana allita yachatsikuptin mana amatsayanqayki. Tsay warmim profetïsa tukur noqaman creyikamuqkunata creyitsirnin yachatsin fornicación jutsata rurayänanpaq y ïdulukunapa shutinchö pishtayanqan aytsata mikuyänanpaq. 21Kananyaqnam shuyarashkä tsay warmi jutsankunata dëjananpaq. Peru jutsa rurayta manam dëjantsu.

22<<Tsaymi payta qeshyaywan castigashaq. Tsay warmi yachatsinqanta chaskiqkunatapis jutsa rurayta mana dëjayaptinqa mana llakipaypam castigashaq. 23Paykunapa wamrankunatam wañutsishaq. Tsaymi noqaman creyikamuqkuna tantiyayanqa runakuna imata yarpäyanqantapis musyanqäta.#Sal. 7.9; Jer. 17.10. Noqaqa imatapis rurayanqanmanmi pïmaytapis juzgashaq.#Sal. 62.11-12; Prov. 24.12; Eze. 18.30; 33.20; Mat. 16.27.

24<<Wakikikunaqa tsay warmipa mana alli yachatsikuyninkunata manam chaskiyashkankitsu. <Mas allin kaq yachatsikuyta yachakushun> niptinpis tsay yachatsikunqankunaqa Satanáspitam. Tsaymi niyaq: 25Noqa yachatsiyanqaqkunata shamunqäyaq mana qonqar cäsukuyay. 26Imaykata ñakarpis mana ajayaypa creyikamuqkunatam nacionkunata mandädunchö katsiyänanpaq churashaq. 27Mandakunäpaq Taytä churamanqannömi paykunatapis mandakuq kayänanpaq churashaq. Tsaynö poderyuq karmi nacionkunata fiërru väranwan mandayanqa. Mitu mankata ñututsiqnömi paykunata ushakätsiyanqa.#Sal. 2.8-9. 28Tsay mandakuqkunatam waraq lucëruta#Núm. 24.17; 2Ped. 1.19. entregashaq.#2.28 Waraq lucëruta entregashaq ninanqa noqawanmi imayyaqpis kawanqa ninanmi.

29<<Espíritu Santum iglesiakunata tsaynö nin. Rinriyuq kaqkunaqa ninqäkunata wiyakuyätsun.

Currently Selected:

Apocalípsis 2: qxn

Highlight

Copy