Apocalípsis 3
3
Sardis markachö creyikuqkunaman cartakunqan
1<<Sardis markachö iglesiapa angelninpaq kay ninqaqta qellqay: Noqam Dios Yayapa qanchis espïritunkunata katsï. Noqam makïchö qanchis qoyllurkunata tsararaykä.#Apoc. 1.20.
<<Noqam llapan rurayanqaykikunata rikaykä. Dios Yaya munanqannö kawayanqaykita yarpäyaptinpis wañushqanömi kaykäyanki.
2<<Shonquykikuna manaraq chukruyanqanyaq Dios Yaya munanqannö kawakuyänaykipaq shumaq yarpachakuyay. Allita rurayanqaykita yarpäyaptikipis Dios Yayapaqqa manam allitsu. 3Yachakuyanqaykita y wiyayanqaykita mana qonqar cäsukuyay. Jutsaykikunapita arrepentikur munanqänöna kawakuyay. Tsaynö mana kawayaptikiqa illaqpita suwa shamuqnömi illaqpita castigayänaqpaq shamushaq.#Mat. 24.43-44; Luc. 12.39-40; Apoc. 16.15.
4<<Wallkaqllam Dios Yaya munanqannö kawaykäyanki. Tsaynö kawayanqaykipitam yuraq llatapaykikuna shukushqa puntächö kayanki. 5Imaykata ñakarpis mana ajayaypa creyikamuqkunam yuraq llatapan shukushqa kayanqa. Paykunapa shutinkunataqa Libru de la Vïdapita#Éxo. 32.32-33; Sal. 69.28; Apoc. 20.12. manam börrashaqtsu. Taytäpa y angelkunapa puntanchömi favorninkuna parlashaq.#Mat. 10.32; Luc. 12.8.
6<<Espíritu Santum iglesiakunata tsaynö nin. Rinriyuq kaqkunaqa ninqäkunata wiyakuyätsun.
Filadelfia markachö creyikuqkunaman cartakunqan
7<<Filadelfia markachö iglesiapa angelninpaq kay ninqaqta qellqay: Noqam santu kä. Ninqäkunatam cumplï. Davidpa llävintam katsï. Tsaymi punkuta kichaptï ni pipis wichqanqatsu. Wichqaptï ni pipis kichanqatsu.#Isa. 22.22.
8<<Noqam llapan rurayanqaykikunata rikaykä. Poderninnaq karpis mana nëgayämarmi ninqäkunata cumpliyashkanki. Tsaymi gloria punkuta kichapuyashkaq. Tsay punkupa yaykuyaptiki manam pipis amatsayäshunkitsu.
9<<Markaykikunachö wakin runakunam <Dios Yaya kuyanqan Israel runam kayä> nikarpis llullakuyan. Paykunaqa Satanáspa munaynintam rurayan. Dios Yaya kuyanqan runakuna kayanqanta niyaptinpis qamkunatam noqa kuyayaq. Tsayta musyayänanpaqmi#Isa. 43.4. puntaykiman qonqurikuyänanpaq mandashaq.#Isa. 49.23; 60.14.
10<<Ninqäta cumplirmi imaykata sufrirpis mana ajayaypa creyikayämunki. Tsaynö kayanqaykipitam maytsaychö täkuq runakuna alläpa ñakayänanpaq kaq tiempu#Dan. 12.1; Mat. 24.21-22. chämuptinpis qamkunawan kaykäshaq.
11<<Shamunäpaqnam kaykä. Tsaymi yachatsiyanqaqta mana qonqar cäsukuyay. Tsaynöpam corönaykita pipis qechuyäshunkitsu. 12Imaykata ñakarpis mana ajayaypa creyikamuqkunatam Dios Yayapa templunchö columna kayänanpaq churashaq. Tsaymi mana yarquypa tsaychö imayyaqpis kayanqa. Paykunamanmi Diosnïpa shutinta y markanpa shutinta qellqashaq. Tsay markam ciëlupita shamuq mushuq Jerusalén.#Apoc. 21.2. Tsaynöllam kikïpa mushuq shutïtapis paykunaman qellqashaq.#Isa. 62.2; 65.15.
13<<Espíritu Santum iglesiakunata tsaynö nin. Rinriyuq kaqkunaqa ninqäkunata wiyakuyätsun.
Laodicea markachö creyikuqkunaman cartakunqan
14<<Laodicea markachö iglesiapa angelninpaq kay ninqaqta qellqay: Noqam Dios Yaya äninqankunata cumplï. Imaypis rasun kaqllatam nï. Noqawanmi Dios Yaya llapan imaykatapis kamarqan.#Prov. 8.22-31; Juan 1.3.
15<<Noqam llapan rurayanqaykikunata rikaykä. Musyämi ni alaq ni achaq mana kayanqaykita.#3.15 Alaq karmi Jesucristuta cäsuyantsu. Peru achaq karmi sïqa Jesucristuta llapan shonqunkunawan kushishqa cäsuyan. Tsaypa rantinqa alaq karpis o achaq karpis kayankiman. 16Peru alaq o achaq kayanqaykipa rantin tibiu kayanqaykipitam shimïpita aqtuskiyäshayki.
17<<Rïcu kayman confiakurmi <imapis manam faltäyämantsu> niyanki. Peru tsaynö nirpis manam tantiyayankitsu llakipaypaq waktsa, qapra y qarashtu kayanqaykita. 18Rasunpa rïcu kayta munarqa ninawan tsullutsishqa qori püruta noqapita rantiyay. Qarashtu kayta mana munarqa yuraq llatapata noqapita rantiyay. Qapra kayta mana munarqa noqapita jampita rantiyay. Tsaynöpam rïcu, alli llatapashqa y alli rikaq kayanki.
19<<Kuyanqä kaqtam mana allikunata rurayaptin corrigï.#Prov. 3.12; Heb. 12.6. Tsaynö kaykaptinqa jutsaykikunapita arrepentikur llapan shonquykikunawan serviyämay. 20¡Wiyayämay! Punkupitam qayakaykämü. Mayqaykipis qayakamunqäta wiyar kichamuptikiqa yaykamuptïmi paqta mikushun. 21Imaykata ñakarpis mana ajayaypa creyikamuqkunatam paqtä mandakuq kayänanpaq churashaq.#2Tim. 2.12; Apoc. 20.4, 6; 22.5. Tsaynöllam Satanásta vencinqäpita#Juan 16.33; Apoc. 5.5. noqatapis Taytä churamashqa paywan imayyaqpis mandakuq kanäpaq.
22<<Espíritu Santum iglesiakunata tsaynö nin. Rinriyuq kaqkunaqa ninqäkunata wiyakuyätsun>>.
Currently Selected:
Apocalípsis 3: qxn
Highlight
Share
Copy
Want to have your highlights saved across all your devices? Sign up or sign in
© 2011, Wycliffe Bible Translators, Inc. All rights reserved.