Apocalípsis 4
4
Dios Yayata ciëluchö alabayanqan
1Tsaypitanam ciëluchö punku kicharaykämuqta rikarqä. Puntata wiyanqänöllam cornëta waqamuqtanöraq yapay wiyarqä: <<Kayman witsämuy. Kananmi rikätsishayki ima päsananpaq kanqanta>> nimaqta.
2Jina höram Espíritu Santu ciëluchö trönuta rikätsimarqan. Tsay trönuchömi juk jamaykarqan. 3Jamaykaqqa jaspe ruminö y cornalina ruminöraqmi chipakyarqan. Jamakunan trönu jananpam esmeralda ruminöraq chipakyaq turmanyay sutaraykarqan.#Eze. 1.26-28; 10.1.
4Tsay trönu waqtankunapam ishkay chunka chusku (24) trönukuna kayarqan. Tsay trönukunamanmi yuraq llatapashqa y qori corönan shukushqa mayor runakuna jamayarqan. 5Chawpinchö trönupitam chilapyaypa chilapyar illaqukurqan. Maqakuypis bunrururraqmi wiyakämurqan.#Éxo. 19.16; Apoc. 8.5; 11.19; 16.18. Trönupa puntanchömi qanchis candelërukuna rupaykäyarqan.#Zac. 4.2. Tsaykunam kayarqan Dios Yayapa qanchis espïritunkuna.#Apoc. 1.4. 6Trönupa puntanchömi kuyakuypaq cristal vidriunö lamar karqan.
Tsay trönupa waqtankunapam chusku kawaqkuna#Eze. 1.13, 22. kayarqan. Paykunapa entëru cuerpunchömi ñawinkuna karqan. 7Punta kaqmi leonnö karqan. Ishkay kaqnam törunö karqan. Kimsa kaqnam runanö karqan. Chusku kaqnam päriykaq pitsaknö karqan.#Eze. 1.5-10; 10.14. 8Tsay chuskun kawaqkunam soqta riprayuq kayarqan. Tsaynöllam entëru cuerpunchö ñawinkuna karqan.#Eze. 1.18; 10.12.
Tsay kawaqkunam paqasta junaqta niyarqan:
<<¡Santu, santu, santu!
¡Llapanpaq poderyuq Dios Yayam santu!#Isa. 6.2-3.
¡Payqa unaypita kawaq, kanan kaykaq y shamunanpaq kaqmi kaykan!>>
9Trönunchö jamaykaq imayyaqpis kawaq Dios Yayata tsaynö adorar agradëcikurnin alabayaptinmi 10tsay ishkay chunka chusku (24) mayor runakunapis imayyaqpis kawaq Dios Yayapa puntanman pelatakuykur adorayarqan. Corönankunata jipiskirmi Dios Yayapa trönunpa puntanman churaykur niyarqan:
11<<Señornintsik Dios Yaya, qamllam poderösu kanki.
Llapan imaykatam kamashkanki.
Kawayta qaranqaykipitam llapan kawayan.
Tsaymi llapan respitayäshurniki alabayäshunki>>.
Currently Selected:
Apocalípsis 4: qxn
Highlight
Share
Copy
![None](/_next/image?url=https%3A%2F%2Fimageproxy.youversionapi.com%2F58%2Fhttps%3A%2F%2Fweb-assets.youversion.com%2Fapp-icons%2Fen.png&w=128&q=75)
Want to have your highlights saved across all your devices? Sign up or sign in
© 2011, Wycliffe Bible Translators, Inc. All rights reserved.