Génesis 42

Josépa wawqinkuna Egiptuman aywayanqan

1Egiptuchö rantipaq trïgu kanqanta musyaskirmi tsurinkunata Jacob nirqan: <<Kaychö ¿imatatan ruraykäyanki kikikikunapura rikaränakur? 2Trïguta Egiptuchö rantikuyanqantam willayämashqa. Aywar qamkunapis rantiyämuy mikunapaq. Mana rantiyämuptikiqa ¿imata mikurtan kawashun?>>#Hech. 7.12.

3Tsaynö niptinmi Josépa chunka wawqinkuna Egiptuman trïgu rantiq aywayarqan. 4Peru Josépa wawqin Benjamín aywananta taytan mana munarmi nirqan: <<Tsurïta imapis päsaykunman>>.

5Tsaynöpam Israelpa#42.5 Israelqa Jacobpa jukaq shutinmi karqan. tsurinkuna wakin kaq trïgu rantiqkunawan compañanakur Egiptuman chäyarqan. Entëru Canaánchömi alläpa muchuy karqan.

6José Egipto nacionpa gobernadornin karmi maytsay nacionpita trïgu rantiq aywaqkunata rantikuq. Tsaymi Josépa wawqinkunapis trïgu rantiq chaykur urkunkunapis patsaman töpanqanyaq puntanman qonqurikuyarqan. 7Wawqinkunata rikaykurmi José reqiskirqan. Tsaynö reqiykarpis mana reqiq tukurmi piñapaypa nirqan: <<¿Maypitatan kayanki?>>

Tsaynö tapuptinmi niyarqan: <<Taytay, noqalläkunaqa Canaánpitam trïgu rantiq shayämushkä>>.

8José reqiptinpis wawqinkunaqa manam reqiyarqantsu. 9Tsay höram José yarpaskirqan paykunapaq imata sueñunqanta.#Gén. 37.5-10. Tsaymi nirqan: <<Qamkunaqa kay nacionman maypa mas fácil yaykayämunaykipaq kaqta musyapakuqmi shayämushkanki>>.

10Tsaynam niyarqan: <<¡Manam, taytay! Noqalläkunaqa trïgu rantiqllam shayällämushkä. 11Noqakunaqa llapäpis juk taytalla karmi honrädu kaynïkunawan ni imaypis runapa markankunata musyapakuyämantsu>>.

12Peru Josénam nirqan: <<Llullakuyankim. Rasunpam qamkunaqa kay nacionman maypapis mas fácil yaykayämunaykipaq musyapakuq shayämushkanki>>.

13Tsaynam niyarqan: <<Noqakunaqa chunka ishkay wawqi juk taytallapita karmi Canaán nacionllachö llapä täkuyä. Qepa kaq wawqikunam taytäkunawan quëdamushqa y jukaq wawqïkunam oqrakashqa>>.

14Tsaynam José nirqan: <<Niyanqaqnöpis qamkunaqa markä imanö kanqanta musyapakuqmi shayämushkanki. 15Kananmi musyashaq rasunpa parlayanqaykita o llullakuyanqaykitapis. Faraónpa shutinchö jurarmi niyaq: <Kaypita manam ni mayqaykipis yarquyankitsu shullka wawqikikunata mana pushamurqa. 16Mayqaykipis aywar shullka wawqikikunata pushayämunqaykiyaqmi wakikiqa kaychö qaykuraykar quëdayanki. Shullka kaq wawqikikunata mana chätsiyämuptikim musyashaq markäman musyapakuq shayämunqaykita>. Faraónpa shutinchö jurarmi niyaq>>.

17Tsaynöpam carcelchö kimsa junaq José qaykarätsirqan.

18Tsaypita kimsa junaqtanam José nirqan: <<Noqaqa Dios Yayapitam mantsakü. Tsaymi mandayanqaqta rurayaptikiqa wañutsiyäshaykitsu. 19Rasunpa honrädu karqa jukaq wawqikikunata prësu dëjaykur aylluykikuna mikuyänanpaq trïguta aparkur kutiyay. 20Tsaypita tapshi kaq wawqikikunata pusharkur kutiyämunki. Tsaynöpam musyashaq niyanqayki rasunpa kanqanta. Peru mana chätsimurqa llapaykim wañuyanki>>.

José tsaynö niptinmi paykuna äniyarqan.

21Tsaynam kikinkunapura ninakuyarqan: <<Rasun kaqtaqa wawqintsikta mana llakipanqantsikpitam kayläya ñakaykantsik. Dëjaykunapaq rugamashqapis manam llakiparqantsiktsu>>.

22Tsaynam Rubén nirqan: <<Niyarqaqmi tsay wawqintsikta mana imatapis rurayänaykipaq.#Gén. 37.21-22. Peru manam cäsuyämarqaykitsu. Tsaymi kananqa paypa maldicionninwan sufriykantsik>>.

23Egipto runakunapa idiömanchö José parlapaptinmi juk runaraq wawqinkunata tantiyatsirqan. Tsaynöpam musyayarqantsu paykuna parlayanqanta José tantiyaykanqanta. 24José alläpa llakinarmi wawqinkunapita jukläman aywaykur waqarqan. Waqanqanpita kutiskamurmi yapay parlaparqan. Simeónta akraskirmi puntankunachö watätsirqan.

25Tsaypitanam serviqninkunata mandarqan costalninkunaman trïguta wiñäpäyänanpaq. Tsaynöllam mandarqan trïgupa chanin qellaytapis costalninkunaman wiñäpäyänanpaq y millkapankunapis qepipäyänanpaq. Tsaymi José ninqannölla llapanta rurayarqan. 26Tsaymi ashnunkunaman trïguta chaqnakurkur kutikuyarqan.

27Kutikuykar tutapäpukuskirmi patsakuyanqanchö ashnunkunata trïguta qarayänanpaq jukaq costalta paskarkur pitushqa qellayta tariskirqan. 28Tsaymi wawqinkunata nirqan: <<¡Kaychi kayllaräqa! ¿Imatatan rurashaq? ¡Päganqä qellaytam costalnïman wiñäyämushqa!>>

Tsaynö niptinmi llapan mantsakarnin karkaryarraq kikinkunapura ninakuyarqan: <<¿Imaykamannatan Dios Yaya jitarpamantsik?>>

29Canaánman kutirmi Egiptuchö ima päsanqankunata taytanta willar niyarqan: 30<<Egipto nacionpa mandakuqninmi ollqutupäyämashqa tsay nación imanö kanqanta musyapakuq aywayanqäta yarpar. 31Peru noqakunam niyashkä honrädu alli runa kayanqäta y imaypis mana musyapakuq kayanqäta. 32Tsaynöllam willayashkä chunka ishkay wawqi juk taytallapita kayanqäta y jukaq wawqïkuna oqrakanqanta y tapshi kaq qamwan quëdanqantapis.

33<<Tsaymi niyämashqa: <Rasunpa parlayanqaykita musyanäpaq juknin wawqikikunata prësu jaqiykur trïguta aparkur aylluykikuna mikuyänanpaq wakiki kutiyay. 34Tapshi kaq wawqikikunata chätsiyämuptikiraqmi musyashaq mana musyapakuq kayanqaykita. Tsayraqmi wawqikikunata qaykatsinqäpita dëjapuyäshayki. Tsaynöpam kay nacionman kutiyämuptikipis ni pï ima niyäshunkitsu> >>.

35Tsaynö willaskir trïguta jätsipakuykarmi costalninkunachö pägakuyanqan qellayninkuna bolsachö kaykaqta tariyarqan. Tsaymi kikinkuna y taytanpis alläpa mantsakäyarqan. 36Jacobnam nirqan: <<Qamkunaqa tsurïkunata ushaskiyankinam. Josépaqpis musyantsiknatsu y Simeónpis manam paqtantsiknatsu. Kananqa ¿Benjamíntanaku pushayta munaykäyanki? Kayläya llakikuywan ¿imanönatan kawashaqpis?>>

37Tsaynam Rubén nirqan: <<Taytay, kikïmi Benjamínta kutitsimushaq. Mana kutitsimuptïqa ishkan tsurïkunatam wañutsinki>>.

38Peru Jacobnam nirqan: <<Manam tsurïta pushayankitsu. Tsay mamallapita wawqin Josépis wañushqana kaptinmi payqa japallanna. Aywaykäyaptiki nänichö imapis päsaptin ¿imatatan rurayanki? Qamkunam jutsayuq kayanki llakikuywan wañuptï>>.

Currently Selected:

Génesis 42: qxn

Highlight

Copy