1 Timoteo 3
3
Mayor wawqikuna imanö kawakuyänanpaq ninqan
1 Mayor wawqi kayta munaqkunaqa allitam yarpaykäyan. Kay ninqäqa rasun kaqmi. 2Mayor wawqikunaqa kayanman pipitapis mana musyapashqa, juk warmiyuqlla, shumaq tantiyakuq, shumaq yarpachakur imatapis ruraq, pïmaypitapis respitashqa, patsatsikuq y shumaq yachatsikuq. 3Tsaynölla kayanman mana upyaq, pitapis mana ofendiq, pitapis llakipaq, qellayllapaq mana ayrajaq 4y warmintawan tsurinkunata shumaq wätaq. Tsaynölla tsurinkunata cäsukuq y respitakuq kayänanpaq yachatsinman. 5Wajinchö täkuqkunata shumaq mana yachatsirqa ¿imanöraq Dios Yayaman creyikuqkunata yachatsinman?
6Jesucristuman tsayraq creyikuykaqkunaqa manam mayor wawqi kayanmantsu. Yachayyuq tukurqa diablu castigashqa kanqannömi paykunapis castigashqa kayanqa.
7Jesucristuta mana chaskiq runakunapis rikäyänanpaq mayor wawqikuna shumaq kawakuyätsun. Shumaq kawakuyaptinqa paykunapaq manam ni pipis rimanqatsu ni diablupis toqllaman ishkitsinqatsu.#Tito 1.6-9.
Diäcunukuna imanö kayänanpaq ninqan
8Tsaynöllam diäcunukunapis kayanman respitashqa, imatapis äninqanta cumpliq, mana upyaq y qellaypaq ayrajar mana engañakuq. 9Jesucristupa willakuyninta yachakuyanqannöllam jutsata mana rurar kawakuyanman. 10Diäcunu kananpaq manaraq churar imanö kawayanqanta shumaqraqmi musyayanman. Alli kawakunqanta musyaskirraqmi diäcunu kayänanpaq churayanman.
11Tsaynöllam diäcunupa warminpis#3.11 O diacunïsapis. kanman respitashqa, pitapis mana tumpaq, shumaq tantiyakuq y imapis änikunqanta cumpliq.
12Diäcunukunaqa juk warmiyuqllam kayanman. Warminta y tsurinkunatapis shumaqmi wätayanman.
13Diäcunu kayninta shumaq cumplirqa pïmaypitapis alli rikashqam kayanqa. Jesucristuman creyikuyanqantam mana mantsakur willakuyanqa.
Pablo imapaq cartakunqan
14Timoteo, shamuyta yarparpis puntataqa cartakaykämüllaraqmi. 15Peru sas mana shamuptïpis kay cartata liyirmi wawqikunata y panikunata imanö rikänaykipaqpis tantiyanki. Noqantsikqa imayyaqpis kawaq Diospa iglesian karmi willakuyninta willakuntsik y mana alli yachatsikuqkunata corrigintsik.
16Dios Yaya musyatsimanqantsik willakuyninqa shumaqmi. Tsay willakuyninmi nin:
Jesucristuqa#3.16 Wakin qepa kaq griego copiakunachömi Diosqa nin. runanöllam yurirqan.
Wañunqanpitam Espíritu Santu kawatsimurqan.
Angelkunam payta rikäyarqan.
Mana Israel runakunatam willakuyninta willakuqkuna willayarqan.
Maytsaychömi payman creyikuyan.
Gloriaman kutiskirmi Dios Yayapa puntanchö kaykan.
Currently Selected:
1 Timoteo 3: qxn
Highlight
Share
Copy
Want to have your highlights saved across all your devices? Sign up or sign in
© 2011, Wycliffe Bible Translators, Inc. All rights reserved.
