1 Timoteo 2

Dios Yayata mañakunapaq yätsinqan

1Timoteo, wawqikunata y panikunata animatsiy Dios Yayata agradëcikur llapan runakunapaq imaypis mañakuyänanpaq. 2Tsaynölla Dios Yayata mañakuyätsun reykunapaq y wakin autoridäkunapaqpis. Shumaq mandakuyänanpaq Dios Yaya yanapaptinmi noqantsikpis tranquïlu Dios Yaya munanqannö kawakushun. 3Llapan runakunapaq mañakurmi salvamaqnintsik Dios Yaya munanqannö mañakuntsik. 4Paymi llapan runakuna alli willakuyninman creyikur salvashqa kayänanta munan.

5Jukllayllam Dios Yayaqa.

Dios Yayawan alli kawakunapaq juk runallam amistatsimantsik.

Tsay runaqa Jesucristum.

6Paymi wañushqa llapan runakunata salvananpaq.

Tsaynö salvakuq kanqantam tiempun chämuptin Dios Yaya musyatsimashkantsik.#Mat. 20.28; Mar. 10.45; Gál. 1.4; Tito 2.14.

7Tsay alli willakuyta mana Israel kaqkunata willar apostolnin kanäpaqmi Dios Yaya churamashqa. Tsaymi yachatsï Diospa alli willakuyninta chaskir Jesucristuman creyikuyänanpaq.#2Tim. 1.11. Mana llullakurmi [Jesucristupa shutinchö] rasun kaqta nï.

8Noqam munä maychö qorikarpis mana rimanakuypa mana chikinakuypa wawqikuna makinkunata pallarkur Dios Yayata mañakuyänanta.

Warmikunapaq yätsinqan

9Warmikunapis shumaqllata llatapakuyätsun. Ama penqakuypaq kaq llatapakunataqa shukukuyätsuntsu. Tsaynölla aqtsankunata alläpa allitsakur qoriwan y perlaswan adornakuyänanpaq ama yarpachakuyätsuntsu. Alläpa chaniyuq llatapakunata ama shukukuyätsuntsu.#1Ped. 3.3. 10Tsaypa rantinqa Dios Yaya munanqannö kawakuq warmikunanö allikunata rurar kawakuyätsun.

11Qorikäyanqaykichö yachatsikuyanqanta warmikuna upällalla yachakuyätsun. 12Manam munätsu warmikuna ollqukunata yachatsiyänanta ni mandayänanta. Masbien upällalla kakuyätsun. 13Adánta kamaskirraq#Gén. 2.7. Evata kamashqa kaptinmi tsaynö niq.#Gén. 2.21-22. 14Manam Adántatsu Satanás engañarqan, sinöqa Evatam.#Gén. 3.1-6. Engañaptinmi jutsaman ishkirqan.

15Peru warmikunaqa wawankunata shumaq wätayätsun, Dios Yayaman creyikuyätsun, pïmaytapis kuyayätsun, shumaq tantiyakuyätsun y Dios Yaya munanqannö kawakuyätsun.#Fil. 2.12. Tsaynöpam salvakäyanqa.

Currently Selected:

1 Timoteo 2: qxn

Highlight

Copy