1 Timoteo 1

Apóstol Pablo saludakunqan

1Noqa Pablum Jesucristupa apostolnin kä. Apostolnin kanäpaqmi salvakuq Dios Yaya y creyikunqantsik Señor Jesucristo churamashqa. 2Timoteo,#Hech. 16.1-3. Jesucristuman creyikur tsurïnö kaptikim kay cartata cartakamü. Taytantsik Dios Yayawan Señornintsik Jesucristo llakipäyäshurniki alli päsakuychö kawakunaykipaq yanapaykuyälläshuy.

Mana alli yachatsikuqkunata amatsananpaq yätsinqan

3Macedonia provinciaman aywarmi Éfeso markachö jaqimurqaq mana alli yachatsikuqkunata amatsanaykipaq. 4Tsay mana alli yachatsikuqkunaqa yarpayllankunapitam unay tiempu imanö kanqanta y unay ayllunkuna pï kayanqanta yachatsikuyan. Tsaynö mana allikunata yachatsikuyaptinmi Dios Yayaman creyiyanqanpa rantin manakaqkunallapaq piñakur kaykäyan.

5Wawqikuna y panikuna piñanakuyanqanpa rantin kuyanakuyänanpaqmi tsay mana alli yachatsikuqkunata amatsanaykipaq niq. Tsaynö kuyanakuyänanpaqqa jutsata ama rurayätsuntsu, allita rurar kawayätsun y llapan shonqunkunawan Dios Yayaman creyikuyätsun.

6Tsay mana alli yachatsikuqkunam kuyanakur kawayanqanpa rantin manakaqkunallapaq piñanakur kawayan. 7Dios Yayapa leyninkunata alläpa yachayanqanta nirpis imata yachatsiyanqantapis manam musyayantsu.

8Peru musyantsikmi Dios Yaya munanqannö kawayänanpaq yachatsishqa leyninkuna alli kanqanta. 9Manam jutsannaqkunapaqtsu leyninkunata Dios Yaya entregarqan, sinöqa jutsa ruraqkunapaqmi. Tsay leyninkunam kaykan mana cäsukuqkunapaq, mana alli runakunapaq, jutsasapakunapaq, Dios Yayata mana respitaqkunapaq, mamanta y taytanta maqaqkunapaq y runa majinta wañutsiqkunapaq. 10Tsaynöllam kaykan adulteriu jutsata ruraqkunapaq, ollqupura kakuqkunapaq, warmipura kakuqkunapaq, runa majinta rantikuqkunapaq, llullakuqkunapaq, manakaqta tumpar runa majinpa contran shäriqkunapaq y alli yachatsikuyta mana cäsur jutsa ruraqkunapaq. 11Tsaytam alabashqa Dios Yayapa alli willakuyninchö nin. Tsay willakuyninta willakunäpaqmi Dios Yaya kachamashqa.

Pabluta Dios Yaya llakipanqan

12Señornintsik Jesucristutam agradëcikü willakuyninta willakunäpaq yanapamanqanpita. Tsaynöllam agradëcikü noqaman confiakamur willakuyninta willakunäpaq churamanqanpita. 13Unayqam Jesucristuta manakaqman churarqä. Payman creyikuqkunatapis ashiykur ashiykurmi carcelman qaykatsirqä.#Hech. 8.3; 9.4-5. Manaraq musyar tsaynö ruranqäpitam Dios Yaya llakipämar perdonamashqa. 14Perdonamarmi tantiyatsimashqa Jesucristuman creyikur pïmaytapis llakipänäpaq.

15Jutsasapakunata salvananpaqmi kay patsaman Jesucristo shamushqa. Tsaytaqa pïmaypis creyiyätsun. Noqatapis llapan runakunapita mas jutsasapa kaykaptïmi 16llakipämar salvamashqa. Tsaynö salvamarqan Jesucristo perdonakuq kanqanta wakin runakunapis tantiyakurnin payman creyikur mana ushakaq kawayta tariyänanpaqmi. 17¡Dios Yayam imayyaqpis poderösu rey, imayyaqpis kawaq y mana rikakaq! Pay japallanmi Dios kaykan. [Manam ni pipis paynö yachayyuqqa kantsu.] ¡Imayyaqpis alabashqa kaykullätsun! ¡Amén!

Jesucristupa willakuyninta imaypis willakunanpaq yätsinqan

18Kuyay Timoteo, tsurï cuenta kaptikim Dios Yayapa shutinchö wawqikuna niyäshunqaykillata noqapis niq: Alli soldädu mana mantsakuypa pelyanqannö qampis mana mantsakuypa Jesucristupa willakuyninta willakuy. 19Tsaynö willakurnin Jesucristuman creyikur Dios Yaya munanqannö imaypis kawakuy.

Wakin kaq runakunam Dios Yaya munanqannö mana kawar Jesucristuman creyikuyantsu. 20Tsaynöllam Alejandruta y Himeneuta creyikuyninkunata dëjayanqanpita Satanáspa poderninman entregashkä. Tsaynö ñakatsiptin talvezchi tantiyakurnin llutanta yachatsikuykanqanta dëjaskir Jesucristuman yapay creyikuyanman.

Currently Selected:

1 Timoteo 1: qxn

Highlight

Copy