ZEKALIYA 6
6
Matemba awana
1Ngwandwile ceka meso ami nakutala, kaha kumana, mukaci kajipili jivali mwalovokele matemba awana. Jipili jize japwile jipili jaunengu.
2Kulitemba lyakulivanga kwapwile tuvalu vacila. Kulitemba lyamucivali kwapwile tuvalu velava.
3Kulitemba lyamucitatu kwapwile tuvalu vatoma. Kaha kulitemba lyamuciwana kwapwile tuvalu vamapelenge vakulikaka.
4Ngwahanjikile nakumwihula kangelo uze ahanjikile nayami ngwami, Ove mwata wami, ava vakivo vaka?
5Uze kangelo angukumbulwile ngwenyi, Eji jikiko jipeho jahelu jiwana, hinajilovoka oku jinemananga kuli Mwata wahamavu hosena.
6Olyo litemba kuli tuvalu velava nalilovoka nakuya kulifuci lyakunote. Kaha vaze vatoma valovokele nakuvakava. Kaha vaze vamapelenge valovokele nakuya kulifuci lyakusulo.
7Vaze vakulikaka valovokele, vasakile vayenga mangana vatambwojokenga hamavu. Kaha avambile ngwenyi, Yenu, mukatambwojokenga hamavu. Ngoco vatambwojokelenga hamavu.
8Kaha atambakanyine nakungwamba ngwenyi, Tala, ava navalovoka nakuya kulifuci lyakunote vanavendejeka lyehi Xipilitu yami mulifuci lyakunote.
Kufwanyisa cakumuvwika Yoxuwa micama
9Jino lizu lyaYehova lyejile kuli ami ngwenyi,
10Twayenu navamwe ava vanatundula, vakuli Heletai, navakuli Toviya, navakuli Yetaya, kaha ove ukeze halikumbi olyo, ukengile muzuvo yaYoxiya mwanaZefwanyiya, omu vanaxikila hakufuma kuMbavilone.
11Kambate palata naulu, ukafule micama, ukayihake mumutwe waYoxuwa mwanaYehozatake, ou kapilixitu wakulitulaho.
12Ukamwambulile ngwove, Yehova wamayongomena nambe ngwenyi, Talenu lunga ukweci lijina lyenyi ikiye #3.8.Mutango. Mwakasoka kuma lyenyi, kaha mwakatunga tembele yaYehova.
13Ikiye mwakatunga tembele yaYehova, ikiye mwakambatanga lufuma, mwakatwamanga #Isa. 9.7.nakupwa mwata halitanda lyenyi lyawangana. #Samu 110.1, 4.Mwakapwanga kapilixitu halitanda lyenyi lyawangana, kaha punga yakuunda nayikapwanga muli vaze vavali.
14Kaha micama yikapwenga yaHeleme naToviya naYetaya naHene mwanaZefwanyiya, kupwa yakwanukilangaho mutembele yaYehova.
15Vaze vali kwakusuku navakeza nakutunga mutembele yaYehova, kaha namukatacikizomu nangutumu Yehova wamayongomena kuli enu. Mukiko munacikapwa kaci nge namwononokanga cakwononoka mulizu lyaKalunga kenu Yehova.
Currently Selected:
ZEKALIYA 6: LUE70
Highlight
Share
Copy
Want to have your highlights saved across all your devices? Sign up or sign in
Luvale Bible © Bible Society of Zambia, 1970.
