MIKA 4

Wangana waYehova wakumafuci osena

(Isa. 2.1-4)

1Oloze hamakumbi akukuminyina nacikasoloka, pili yazuvo yaYehova nayikapwanga yakuzama helu lyajipili jikwavo, navakayitundula helu lyajipili jikwavo, kaha vatu veka naveka navakaumbukilangako.

2Vaka-mafuci amavulu navakayaya nakulyamba ngwavo, Twatuyenu, tukandukenu kupili yaYehova, kuzuvo yaKalunga kaYakova. Ikiye mwakatulweza kujijila jenyi, kaha natutambukangamujijila jenyi. Mwomwo muZeyone mukiko namukalovokanga jiximbi, mazu aYehova nawakalovokanga muYelusalema.

3Mwakayulanga muli vatu veka naveka vavavulu, mwakahanjikila vaka-mafuci vakujikiza vali kwakusuku, kaha jipoko javo jamikwale navakajifululula nakutenga matemo, makungavo navakawafululula nakutenga jipoko jakunongesa kumilondo. Vaka-lifuci limwe kavexi kukakajila vaka-lifuci likwavo jipoko jamikwaleko, kaha kavexi kukalinangula ceka jitako.

4Oloze navakatwamanga mutu himutu muxina yamuvinyo wenyi, mutu himutu muxina yamukuyu wenyi, kakwexi kukapwou wakuvacikimisa womako. Mwomwo kanwa kaYehova wamayongomena kanacihanjika.

5Mwomwo vatu veka naveka vosena veji kutambukanga mutu himutu mulijina lyakalunga kenyi, kahetu natukatambukanga mulijina lyaKalunga ketu Yehova haya myaka yosena.

VaIsalele navakavasokola muufunge

6Yehova ngwenyi, Halikumbi lize nangukavakungulula vaka-kunjalikita, nangukavahomesa vaze vahangile, vaze vene ngunamwenesa lupi.

7Vaka-kunjalikita nangukavalingisa kupwa vakusalaho, vaze vatundula kwakusuku nangukavalingisa kupwa vaka-lifuci vakujikiza. Yehova Mwakapwanga mwangana wavo kupili Zeyone kufumisa haze nahaya myaka yosena.

8Kaha ove kapoxi kautanga, ove pili yamwanaZeyone, naukaheta mbwe nakuli ove, wata wakulivanga naukeza, ukiko wangana wamwanaYelusalema.

9Kaha jino, ikaze nautetela miteto? Muli ove kamwexi mwanganako tahi? Muka-kukwata nove punga nanongo lyehi tahi? numba kukulinjilile misongo nge yapwevo ali nakusapuluka.

10Ove mwanaZeyone, wivwe misongo useme, nge mwapwevo ali nakusapuluka. Mwomwo jino naulovoka mwimbo nakukatwamanga mucipapa, naukaheta mbwe nakuMbavilone. Kwakuze vene navakakupululwila, kwakuze vene #Isa. 48.20; 52.9-12.mwakakusokwela Yehova mumavoko avakakole jove.

11Kaha jino kunakukungulukila vaka-mafuci amavulu, veji kulyambanga ngwavo, Vamujilulule, meso etu amone omu tunasakila haZeyone.

12Oloze vakivo kavatacikijilevi najinyi Yehovako, punga yenyi kayavalumbunukilileko, mwomwo navahomesela nge mikuta yatiliku kucizungwilo.

13Ove mwanaZeyone, katuka #Isa. 41.15.uzungule, mwomwo jimbinga jove nangujilingisa kupwa jafwelu, jisende jove nangujilingisa kupwa jaunengu, #Yele. 51.20-23.naukatwatwa vatu veka naveka vavavulu. Nganyo yavo nangukayitengulwila kuli Yehova, vikumba vyavo nangukavitengulwila kuli Mwata wahamavu hosena.

Currently Selected:

MIKA 4: LUE70

Highlight

Copy