HANGAI 2

Upahu watembele yayihya

1Hakakweji wamucitanu navavali, halikumbi lyakakweji lyakusokesa mumakumi avali nalimwe, lizu lyaYehova lyejile muli kapolofweto Hangai ngwenyi,

2Hanjika jino kuli Zeluvavele mwanaXeyalacele, ou nguvulu yavaYuta, nakuli Yoxuwa mwanaYehozatake, ou kapilixitu wakulitulaho, nakuli vatu ava vanasaleho ngwove,

3Muli enu munasale iya #Ezela 3.12.amwene zuvo eyi naupahu wayo wakulivanga? Kaha jino munayimono muka? Kumeso enu yinapu nge cuma cauci nyi?

4Oloze ove Zeluvavele, likolezeze jino. Mukiko mwanambe Yehova. Ngwenyi, Ove kapilixitu wakulitulaho Yoxuwa mwanaYehozatake, likolezeze. Enu vatu vamulifuci muvosena, likolezezenunga, muzatenga. Mukiko mwanambe Yehova. Mwomwo Ami nguli nenu hamwe, xikaho. Mukiko mwanambe Yehova wamayongomena.

5Nguli nenu nge kutesa nalizu lize ngwalixikile nenu omu mwalovokele muEjipitu, omu atwaminenga Xipilitu yami muli enu. Kanda mwivwa womako.

6Mwomwo Yehova wamayongomena nambe ngwenyi, #Hepe. 12.26.Ceka nawa kamwe kaha, hanapu hahandende kaha, numba ngunyikise melu namavu, nakalungalwiji natunda yakuma.

7Nangukanyikisa vaka-mafuci osena, kahovyo vanevwila cipepa kuli vaka-mafuci osena hinavikeza, kaha zuvo yino #Vamya. 1, 8.11; Isa. 60.7.nangukayisulisa upahu. Mukiko mwanambe Yehova wamayongomena.

8Palata yinapu yami, naulu nawa unapu wami. Mukiko mwanambe Yehova wamayongomena.

9Upahu wazuvo yino wakukuminyina naukapwanga wauvulu kuhambakana uze wakulivanga. Mukiko mwanambe Yehova wamayongomena. Kaha muma muno nangukahanyinamo kuunda. Mukiko mwanambe Yehova wamayongomena.

Navavahanjikila vatu hakukana cavo kuxixika

10Halikumbi lyakusokesa mumakumi avali naawana hakakweji wamucitanu navawana hamwaka waNdaliu wamucivali, lizu lyaYehova lyejile muli kapolofweto Hangai ngwenyi,

11Yehova wamayongomena nambe ngwenyi, Vehulenu jino vapilixitu jiximbi ngwenu,

12Kaci nge mutu nambate #Kulo. 29.37; Levi 6.27, 29; 7.6.nyama yajila musanya yakuvwala cenyi, nge sanya yenyi nayikwata hambolo, cipwe hakulya cakuteleka lyehi, cipwe havinyo, cipwe hamaji, cipwe hakulya hikulya, nacijila tahi? Kaha vapilixitu vamukumbulwile ngwavo, Nduma.

13Ngoco Hangai avehwile ngwenyi, Kaci nge #Levi 22.4-6; Kula. 19.22.ou napihi hali mufu mwakwata havyuma vyosenovyo, navipihya tahi? Kaha vapilixitu vamukumbulwile ngwavo, Navipihya.

14Ngoco Hangai avakumbulwile ngwenyi, Mukiko muvanapu vatu ava, mukiko muvanapu vaka-lifuci eli kumeso ami. Mukiko mwanambe Yehova. Ngwenyi, Mukiko muvinapu vilinga vyamavoko avo vyosena, kahovyo veji kupandamisangako vinapihi.

15Oloze jino nyingililenu kufumisa kulikumbi lyalelo nakutwala kunyima, ximbu kwapwilenga kanda vacihake lilolwa halilolwa mutembele yaYehova.

16Kufumisa kumakumbi aze, mutu hakwiza kumulumba wavyesekelo makumi avali, kwapwile likumi kaha. Kaha mutu hakwiza mwakukwacila vinyo mangana aswitemo vyesekelo makumi atanu, mwapwile makumi avali kaha.

17Ngwamivetelenga nakuzuza cajimbuto nakambutungulu navula yamalolwa mumilimo yamavoko enu yosena, oloze kamwalumukilile kuli Amiko. Mukiko mwanambe Yehova.

18Acinyingililenu kufumisa kulikumbi lyalelo nakutwala kunyima, kufumisa kulikumbi lyakakweji wamucitanu navawana lyakusokesa mumakumi avali naawana, kufumisa kulikumbi eli vanale cihela catembele yaYehova, cinyingililenu.

19Jimbuto jili lyehi muvisete numba? Camwenemwene mivinyo namikuyu namiloma namilive kanda vime. Nangumiwahisanga kufumisa kulikumbi lyalelo.

Omu mwalixika Yehova naZeluvavele

20Lizu lyaYehova lyejile kamucivali kuli Hangai halikumbi lyakakweji uze lyakusokesa mumakumi avali naawana ngwenyi,

21Mwambulile Zeluvavele, ou nguvulu yavaYuta, ngwove, Nangukanyikisa melu namavu.

22Litanda lyamawangana nangukalikatumuna, ngolo jamawangana avaka-mafuci nangukajinongesa. Matemba nangukawakatumuna navaze vanatambukaho nawa. Kaha tuvalu nawa navaze vanatambukaho navakasuluka, mutu himutu kupoko yandumbwenyi yamukwale.

23Yehova wamayongomena ngwenyi, Halikumbi lize nangukakwitavilove ngamba yami Zeluvavele mwa naXeyalacele. Mukiko mwanambe Yehova. Ngwenyi, Kaha nangukakulingisa kupwa nge ukazekeso kakatacikijilo, mwomwo ngunakusakula, xikaho. Mukiko mwanambe Yehova wamayongomena.

Currently Selected:

HANGAI 2: LUE70

Highlight

Copy