KUPUTUKA 47
47
1Jino Yosefwe engilile, amulwezele Fwalo ngwenyi, Tata navandumbwami vanafumu kulifuci lyaKanane vaneza lyehi namautangavo avimuna vavandende nawawa avangombe navyuma vyavo vyosena, kaha tala, vali mulifuci Ngoxene.
2Kuli vandumbwenyi atwalile malunga vatanu, avemikile kumeso aFwalo.
3Fwalo avehwile vandumbwenyi ngwenyi, Enu milimo yenu yika? Vambile kuli Fwalo ngwavo, Etu vangamba jove tutufunga, nayetu navakaka jetu nawa.
4Vahanjikile kuli Fwalo ngwavo, Tuneza nakuzuzumana mulifuci lino, mwomwo kakwexi ulilo wakulila vimuna jayetu vangamba joveko. Mwomwo zala yakalombolombo yinatoho kulifuci lyaKanane. Xikaho jino, acitavetu vangamba jove tutwamenga kulifuci Ngoxene.
5Fwalo ambile kuli Yosefwe ngwenyi, Iso navandumbwove vaneza kuli ove.
6Lifuci lyaEjipitu lili kumeso ove. Katwamise iso navandumbwove kuze kunahambakana kuwaha mulifuci lino. Vatwamenga mulifuci Ngoxene. Kaci nge unatacikiza malunga vakuzangama muli vakivo, kavalingise kupwa vakulwane kumilimo yavimuna jami.
7Yosefwe engixile ise Yakova, amwimikile kumeso aFwalo, kaha Yakova akiswile Fwalo.
8Fwalo amwihwile Yakova ngwenyi, Makumbi amyaka unayoyo lyehi anahete mumyaka yingahi?
9Yakova ambile kuli Fwalo ngwenyi, Makumbi akuzuzumana cami anahete mulikulukaji lyamyaka namyaka makumi atatu. Makumbi amyaka yami ngunayoyo anapu amandende amapi, kaha kawahetele mumakumbi amyaka yize vayoyele vakaka jami hamakumbi akuzuzumana cavoko.
10Yakova akiswile Fwalo, kaha afumine kumeso aFwalo.
11Yosefwe atungixile ise navandumbwenyi, avahanyine luheto kulifuci lyaEjipitu, kuze kulifuci lyamwaza cakuhambakana cikuma, kulifuci lyaLamesese, nge omu vamulwezele kuli Fwalo.
12Yosefwe alixilenga ise navandumbwenyi navaze vakuzuvo yaise vosena, nge kumajiko avo.
13Kulifuci lyosena kakwapwile kulyako, mwomwo zala yakalombolombo yize yatohwele cikuma, xikaho. Ngoco vatu vamulifuci lyaEjipitu namulifuci lyaKanane vazeyele nazala yakalombolombo yize.
14Yosefwe akungulwile jimbongo josena japwile mulifuci lyaEjipitu namulifuci lyaKanane, hatiliku yize valanjile. Kaha Yosefwe atwalile jimbongo jize muzuvo yaFwalo.
15Omu jahwile jimbongo josena japwile mulifuci lyaEjipitu namulifuci lyaKanane, vaEjipitu vosena vejile kuli Yosefwe, vamwambile ngwavo, Tuhane kulya. Nyi tufwile ika kumeso ove? mwomwo jimbongo jinahu lyehi.
16Yosefwe avambile ngwenyi, Nehenu vimuna jenu. Kaci nge jimbongo jinahu lyehi, kaha nangumilanjisa kulya navimuna jenu.
17Vanehele vimuna javo kuli Yosefwe, kaha Yosefwe avalanjixile kulya natuvalu, namautanga avimuna vavandende, nawawa avangombe, navimbulu. Ngoco avalixile uze mwaka nakulya cakulanda navimuna javo vosena.
18Omu wahwile uze mwaka, vejile ceka kuli ikiye hamwaka wamucivali, vamwambile ngwavo, Katwexi kukuswekacoko ove mwata wetu, mwomwo jimbongo jetu tunajilande lyehi josena ma. Namautanga avimuna jetu nawa vanapu vayove mwata wetu. Kumeso ayove mwata wetu kakwasalile cipwe cuma cimweko, xina mijimba yetu kaha namavu etu.
19Nyi tufwile ika kumeso ove, etu namavu etu? Tulande nayetu namavu etu nakulya, kahetu namavu etu natupwa tuvandungo jaFwalo. Tuhane nawa mbuto mangana tuyoye, kucina natufwa, kucina mavu mwatwama amokomoko.
20Ngoco Yosefwe amulanjilile Fwalo lifuci lyaEjipitu lyosena. Mwomwo vaEjipitu valanjile mutu himutu mavu enyi, mwomwo zala yakalombolombo yize vavatohwelele. Ngoco lifuci lyalumukile kupwa lyaFwalo.
21Kaha vatu avanungulwilile mumembo kufumisa kusongo yangiza yaEjipitu yimwe palanga nakusongo yikwavo.
22Oloze mavu avapilixitu kawalanjileko. Mwomwo vapilixitu yapwilenga nacazano cavo cakuli Fwalo, valilenga cazano cavo cize avahanyinenga Fwalo, xikaho kavalanjixile mavu avoko.
23Jino Yosefwe ambile kuli vatu ngwenyi, Talenu, lelo lino ngunamilande namavu enu hamwe mupwenga muvaFwalo. Wahenu mbuto jenu eji, mukuve hamavu.
24Kaha cikasoloke, hakwaha, mukahana Fwalo cimbwa cimwe cakusokesa muvimbwa vitanu, kaha vimbwa viwana navikapwa vyenu yikapwe mbuto jamawande enu, nakulya cenu, naceci cavaze vakujizuvo jenu, naceci cavana venu.
25Vamwambile ngwavo, Unalwili myono yetu, tuwane likoji kumeso ayove mwata wetu, kaha natupwa tuvandungo jaFwalo.
26Yosefwe acilingixile kupwa luximbi kulifuci lyaEjipitu nakulikumbi lyalelo ngwenyi, Fwalo akatambulenga cimbwa cimwe cakusokesa muvimbwa vitanu. Oloze mavu avapilixitu kaha kawalumukile kupwa aFwaloko.
27Isalele atwaminenga mulifuci lyaEjipitu, mulifuci Ngoxene. Vahetelemo luheto, kaha vasemunwinyine nakuvula cikuma.
28Yakova atwamine mulifuci lyaEjipitu myaka likumi nayitanu nayivali. Ngoco makumbi aYakova, myaka yize ayoyele, yapwile myaka likulukaji namakumi awana namyaka yitanu nayivali.
29Kaha likumbi lyahetele kwakamwihi numba Isalele afwe. Asanyikile mwanenyi Yosefwe, amwambile ngwenyi, Kaci nge ngunawane likoji kumeso ove, aci hake livoko lyove muxi yatungi yami, ungutetele ungulinge mwamucano. Kanda ungufunda muEjipituko.
30Oloze omu nangusavala tulo navakaka jami, ukangufumisa muEjipitu, ukangufunjile kufuka yavo. Amwambile ngwenyi, Nangulinga nganomu unambe.
31Amwambile ngwenyi, Lixinge kuli ami. Kaha alixingile kuli ikiye. Kaha Isalele alifukwile nakulijikilila kumitwe yakahela.
Currently Selected:
KUPUTUKA 47: LUE70
Highlight
Share
Copy
Want to have your highlights saved across all your devices? Sign up or sign in
Luvale Bible © Bible Society of Zambia, 1970.