KUPUTUKA 48
48
Yakova mwakisula Efwalime naManase
1Kaha casolokele, hakukumisa vyumevi mutu umwe ambile kuli Yosefwe ngwenyi, Tala, iso ali nakuviza. Ayile navana venyi vamalunga vavali, Manase naEfwalime.
2Mutu umwe amulwezele Yakova ngwenyi, Tala, mwanove Yosefwe ou mweza kuli ove. Kaha Isalele alikolezezele, atwamine hakahela kenyi.
3Yakova ambile kuli Yosefwe ngwenyi, Kalunga ukweci ngolo josena alisolwele kuli ami kuLuze mulifuci lyaKanane. Angukiswile,
4ambile kuli ami ngwenyi, Tala, nangukakuhana kusemunwina nakukuvulisa, nangukakulingisa kupwa uliwuka lyavatu veka naveka, kaha nangukahana lifuci lino kuli vaka-tanga yove navakakukava vakalihetenga haya myaka yosena.
5Jino vana vove vamalunga vavali, ava unaseme mulifuci lyaEjipitu ximbu ngwapwile kanda ngwize kuli ove muEjipitu, vanapu vami. Efwalime naManase navapwa vami nge omu vapwa Luvene naXimeyone.
6Vaze naukasema munyima yavo navakapwa vayove, kaha kuuswana wavo navakavavulukila hamajina avayayavo.
7Kahami, haze ngwafumine kuPatane, Lakele afwile kumeso ami mujila mulifuci lyaKanane, omu hasalile hahandende kaha nakuheta kuEfwalate. Ngwamufunjile muze mujila yakuya kuEfwalate (kukiko kuMbetelema).
8Isalele avatalile vana vaYosefwe, amwambile ngwenyi, Ava veya?
9Yosefwe ambile kuli ise ngwenyi, Vakivo vana vami, ava nanguhane Kalunga kuno. Amwambile ngwenyi, Aci vanehe kuno kuli ami, kaha nanguvakisula.
10Jino meso aIsalele afuvalalile hauxinakaji, ngoco kahaxile kumona kanawako. Avapandamixile kuli ikiye, kaha avasweswenyele nakuvakwata mukapanga.
11Isalele ambile kuli Yosefwe ngwenyi, Kangwaxinganyekele kumona meso oveko, kaha jino Kalunga nangulingisa kumona vana vove nawa.
12Yosefwe avalowele mukaci kamahinji enyi, alifukwile nameso enyi hamavu.
13Yosefwe avakwacile vosena vavali, Efwalime nalivoko lyenyi lyacilyo nakumuhana kulivoko lyaIsalele lyacimoswe, naManase nalivoko lyenyi lyacimoswe nakumuhana kulivoko lyaIsalele lyacilyo, nakuvapandamisa kuli ikiye.
14Isalele olwele livoko lyenyi lyacilyo, alinangikile hamutwe waEfwalime, ikiye kanyike, nalivoko lyenyi lyacimoswe hamutwe waManase. Asepasanyine mavoko enyi mwakutacikiza, mwomwo Manase ikiye watwatwa.
15Kaha akiswile Yosefwe, ambile ngwenyi, Kalunga, Ou vene kumeso enyi vatambukilenga yatata Apalahama naIsaka, KalungOu angulixilenga makumbi ami osena nakulikumbi lyalelo lino,
16Kangelo Ou angusokwele kulupi lwosena, Ikiye avawahisenga vakweze, kaha vakavavuluke nalijina lyami namajina avatata Apalahama naIsaka. Vakavule vakapwe liyongomena muli vaka-mavu.
17Omu amwene Yosefwe ise nanangika livoko lyenyi lyacilyo hamutwe waEfwalime, evwile kupihya. Azundwile livoko lyaise ngwenyi, alifumise hamutwe waEfwalime alinangike hamutwe waManase.
18Yosefwe ambile kuli ise ngwenyi, Ove tata, kexi ngocoko, mwomwo mwanami watwatwa you, nangika livoko lyove lyacilyo hamutwe wenyi.
19Ise akanyine, amwambile ngwenyi, Ngunatacikiza, mwanami, ngunatacikiza. Ikiye nawa mwakapwa muyaci wavatu, ikiye nawa mwakatohwa. Oloze songo yenyi mwaka-muhambakana, kaha vaka-tanga yenyi navakapwa liyongomena lyavaka-mafuci amavulu.
20Halikumbi lize avakiswile ngwenyi, Hali ove hakiko navakakisula valsalele ngwavo, Kalunga akakulingise kupwa nge Efwalime naManase. Kaha ahakile Efwalime kulutwe lwaManase.
21Isalele ambile kuli Yosefwe ngwenyi, Tala, ami hikufwa. Oloze Kalunga mwakapwa nayenu hamwe, nakumihetesa ceka mulifuci lyavakaka jenu.
22Kaha nawa ngunakuhane cazano cimwe cakuhambakana cize cavandumbwove, cize ngwatambwile kumavoko avaAmole napoko yami yamukwale nauta wami wamanana.
Currently Selected:
KUPUTUKA 48: LUE70
Highlight
Share
Copy
Want to have your highlights saved across all your devices? Sign up or sign in
Luvale Bible © Bible Society of Zambia, 1970.